လေကြောင်းကနေ ဗုံးကြဲတဲ့အခါ အသက်မသေအောင် ကာကွယ်ဖို့ဆိုပြီး တူးခဲ့တဲ့ ဗုံးခိုကျင်းက မိသားစုဝင် ငါးဦးကို သတ်ပြီး စွန့်ပစ်ထားစရာ နေရာ ဖြစ်သွားသတဲ့လား။ အသတ်ခံရတာ သိပေမယ့်လည်း စစ်ကြောင်းထိုးနေဆဲမို့ ရွာထဲ မဝင်ရဲလို့ ရက်လည်ပြီးမှ သဂြိုလ်ရတဲ့ ဖြစ်ရပ်ကို ပြန်မတွေးချင်တော့ဘူး ဆိုပေမယ့် မျက်စိထဲမှာ ပြန်မြင်ယောင်နေတုန်း၊ လူရုပ်တောင် မပေါ်တော့တဲ့ သူတို့တွေကို သဂြိုလ် ပေးခဲ့ရတာ မေ့နိုင်ပါ့မလားလေ။

ပြီးခဲ့တဲ့ ဩဂုတ်လ ၁၆ ရက်နေ့က အာဏာသိမ်းစစ်တပ်နဲ့ ပျူစောထီးအဖွဲ့တွေ မြေပြင်စစ်ကြောင်းထိုးလို့ သိပ်မဝေးတဲ့ တောထဲကို တစ်ရွာလုံးစစ်ရှောင်ခဲ့ကြပါတယ်။

အဲဒီနေ့မှာပဲ အတော်လေးကြာတော့ စစ်တပ်က ပြန်သွားပြီအထင် နဲ့ အသက် ၄၀ အရွယ် ဦးပြုံးချိုတစ်ယောက် သူ့တဲကို ပြန်သွားပါတယ်၊ ဒါဟာ ပြန်လမ်းမရှိတဲ့ အခြေအနေကို ရောက်သွားမယ်ဆိုတာ သူကြိုမသိခဲ့ပါဘူး။ သူ့တဲကို ပြန်သွားပြီး သိပ်မကြာဘူး၊ စစ်ရှောင်နေတဲ့ သူ့ရဲ့မိသားစုဝင်တစ်ဦးဆီကို ဦးပြုံးချို ဖုန်းခေါ်ပြီး သူ့ဆီလိုက်လာဖို့ ပြောခဲ့ပါတယ်။

ဒီနောက်မှာတော့ ဦးပြုံးချိုရဲ့ မိသားစုဝင်နှစ်ဦးက ဦးပြုံးချိုရှိရာတဲ့ဆီကို လိုက်သွားခဲ့ပါတယ်။ ဒီနောက်မှာတော့ ဦးပြုံးချိုအပါအဝင် နောက်ကလိုက်သွားတဲ့ မိသားစုဝင်တွေပြန်မလာတာကြောင့် နောက်ထပ်မိသားစုဝင် နှစ်ဦးကပါ ဦးပြုံးချိုတို့ သုံးဦးရှိရာကို ထပ်မံလိုက်သွားပြီး အခြေအနေကိုသွားရောက်စုံစမ်းခဲ့ပါတယ်။

ဦးပြုံးချိုအပါအဝင် တဲဆီကိုလိုက်သွားသူတွေကတော့  အဲဒီညမှာ စစ်ဘေးရှောင်ရာနေရာကို ပြန်ရောက်မလာခဲ့ကြပါဘူး။

နောက်တစ်ရက်မှာတော့ ဦးလေးတွေ အဒေါ်တွေ သွားတာ ပြန်လည်းမလာကြဘူးဆိုပြီး တူဖြစ်သူက တဲကိုလိုက်သွားတော့မှ  သွေးအိုင်ထဲမှာ မိသားစုဝင် ငါးဦးရဲ့ အလောင်းတွေထပ်လျက်  ဗုံးခိုကျင်းထဲ စွန့်ပစ်ထားခဲ့တာကို တွေ့လိုက်ရတော့တာ။

ဇာတ်ပေါင်းလိုက်ခါမှ ဒီဖြစ်ရပ်တစ်ခုလုံးကို သိလိုက်ရတာကတော့ “သားမက်ဖြစ်သူကို စစ်တပ်က ဖုန်းနဲ့မျှားခေါ်ခိုင်းပြီး လိုက်လာတဲ့ မိသားစုဝင်တွေ အားလုံးကို သတ်လိုက်ကြတယ်” ဆိုတာပါပဲ။

အသတ်ခံရတဲ့ နေရာကတော့  မန္တလေးတိုင်း၊ မြင်းခြံခရိုင် ၊ နွားထိုးကြီးမြို့နယ်၊ တံစိုး ကျေးရွာအနီးက ခွေးရေတောဆိုတဲ့နေရာမှာပါ။ သေဆုံးသူ မိသားစုတွေဟာ သက်ကြီးပိုင်း အရွယ်တွေ ဖြစ်ကြပြီး လယ်ယာအလုပ်၊ မွေးမြူ‌ရေး စတဲ့ တောသူတောင်သား လုပ်ငန်း လုပ်ကိုင်ကြသူတွေပါ။  စစ်တပ်ရဲ့ သတ်ဖြတ်ခြင်းကို ခံရတဲ့ သူတွေကတော့ အသက် ၇၄ နှစ်အရွယ် ဦးသန်းအောင်၊ အသက် ၆၄ နှစ် အရွယ်ဒေါ်ဝင်းကြည်၊ အသက် ၆၀ နှစ်အရွယ် ဒေါ်မြင့်မြင့်ခိုင် ၊ အသက် ၅၄ နှစ်အရွယ် ဒေါ်အေး နဲ့ အသက် ၄၀ နှစ်အရွယ် ဦးပြုံးချို တို့ဖြစ်ပါတယ်။

စစ်ကြောင်းတွေ ရှိနေသေးတော့ သေဆုံးသွားပြီဆိုတာကို သိသော်ငြားလည်း အလောင်းမကောက်ရဲလို့ သူတို့ သေဆုံးပြီး ၁၀ ရက် အကြာ သြဂုတ်လ ၂၆ ရက်နေ့ရောက်မှပဲ သဂြိုလ် ပေးလိုက်နိုင်တာပါ။

“အလောင်းတွေ သဂြိုလ်ဖို့လုပ်တော့ ပိန်တဲ့သူတွေကအရိုးတွေပဲ ရှိတော့တယ်၊ ဝတဲ့သူတွေက အသားနည်းနည်းကျန်တယ်။ အလောင်းက ကြာတော့ အရိုးစုတွေလို ဖြစ်နေပြီ” လို့ သေဆုံးသူတွေနဲ့ ရပ်ဆွေရပ်မျိုးလို နေသူတစ်ဦးက သူမြင်တွေ့ခဲ့ရတာကို ပြောပါတယ်။ သူတို့ရဲ့နောက်ဆုံးခရီးကို စစ်ကြောင်းရန် ကြောက်ရလို့ ရပ်ဆွေရပ်မျိုး အကုန်တောင် လိုက်မပို့နိုင်လိုက်ဘဲ နာရေးကို အကျဉ်းရုံးလေးစီစဉ်လိုက်ရတာလို့ သူက ဆိုပါတယ်။

ဒေါ်ဝင်းကြည်တို့ မိသားစုလိုက် သေဆုံးရတဲ့ဖြစ်စဉ်ဟာ အစုလိုက်အပြုံလိုက် သတ်ဖြတ်ခံရမှု ဖြစ်ပါတယ်။ လူငါးဦးနဲ့ ငါးဦးထက်ပိုတဲ့ အစုလိုက်အပြုံလိုက် သတ်ဖြတ်မှုတွေကို အာဏာသိမ်း စစ်တပ်က ကျူးလွန်လာတာ ဒီနှစ်တွေထဲမှာ အညာဒေသတွေဖြစ်တဲ့ စစ်ကိုင်း၊ မန္တလေး၊ မကွေးတိုင်းတို့ မှာ အဖြစ်များလာတယ်လို့ ဉာဏ်လင်းသစ်သုတေသနအဖွဲ့ ကနေ သိရပါတယ်။

၂၀၂၅ ခုနှစ် ဇန်နဝါရီလကနေ ဧပြီလထိ လေးလအတွင်းမှာ လူငါးဦးနဲ့အထက် အစုလိုက် အပြုံလိုက် သတ်ဖြတ်မှု ဖြစ်စဉ် အရေအတွက်အားဖြင့် ၅၀ ရှိခဲ့တယ်လို့ ဉာဏ်လင်းသစ် သုတေသနအဖွဲ့ ရဲ့ ထုတ်ပြန်ချက်အရ သိရပါတယ်။ အဲဒီဖြစ်ရပ်တွေမှာ သေဆုံးသူ ရာခိုင်နှုန်းရဲ့ ထက်ဝက်ဟာ အညာဒေသမှာ ဖြစ်ပွားခဲ့တာလို့ သိရပါတယ်။ အာဏာသိမ်း စစ်တပ်ရဲ့ မြေပြင်စစ်ကြောင်းထိုးတာ၊ လက်နက်ကြီးနဲ့ ပစ်ခတ်တာအပြင် လေကြောင်းကနေ ဗုံးကြဲတာတွေ ကြောင့် အစုအလိုက် အပြုံလိုက် သေဆုံးမှုဖြစ်စဉ်တွေ တိုးလာနေတာ ဖြစ်ပါတယ်။

အာဏာသိမ်းစစ်တပ်က မန္တလေးတိုင်းဒေသကြီးအတွင်းက မြင်းခြံနဲ့ နွားထိုးကြီးမြို့နယ်တွေမှာရှိတဲ့ အနည်းဆုံး ကျေးရွာ ပေါင်း နှစ်ဆယ် ဝန်းကျင်ကို ဩဂုတ်လ လဆန်းပိုင်းကစပြီး ဩဂုတ်လ ၂၅ ရက်နေ့အထိ တစ်ရွာဝင် တစ်ရွာထွက်စစ်ကြောင်းထိုးနေသလို ရွာတချို့ကိုလည်း မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။

အဲဒီလို စစ်တပ်က မြေပြင် စစ်ကြောင်းထိုးနေတာကြောင့် ဩဂုတ်လအတွင်းမှာပဲ ကျေးရွာ ၁၀ ရွာကျော်က အသတ်ခံရတဲ့ ရွာသူ၊ ရွာသား အယောက် ၃၀ နီးပါးရှိတယ်လို့ ကျေးရွာတွေမှာ ရှိတဲ့ The Nation Voice ရဲ့ သတင်းရင်းမြစ်တွေရဲ့ အဆိုအရ သိရပါတယ်။

မြင်းခြံမြို့နယ်ကကျေးရွာ ၅ရွာနဲ့ နွားထိုးကြီးမြို့နယ်က ရွာ ၄ ရွာတို့ မှာ စစ်တပ်နဲ့ ပျူစောထီးတို့ရဲ့  သတ်ဖြတ်မှုကြောင့်သေဆုံးသူ စုစုပေါင်း ၂၆ ဦး ရှိတယ်လို့ မြင်းခြံလူထုလှုပ်ရှားမှုကော်မတီက ဩဂုတ်လ ၂၄ ရက်မှာထုတ်ပြန်ထားပါတယ်။

အသတ်ခံရသူတွေထဲမှာ အသက် ၁၀ နှစ်အောက်အရွယ် ကလေးနှစ်ဦး အပြင် လူ့လောကထဲမရောက်လာသေးတဲ့ ကလေးကို လွယ်ထားရတဲ့ ကိုယ်ဝန်ဆောင်တစ်ဦးလည်း ပါဝင်ပါတယ်။

ပြီးခဲ့တဲ့ ဩဂုတ်လ ၄ ရက်နေ့က မြင်းခြံမြို့နယ်၊ မြောက်ကုန်းကျေးရွာကို စစ်ကြောင်း ဝင်ရောက်လာတာ မြင်လို့ ကြောက်လန့်တကြား ထွက်ပြေးတဲ့ ရွာသားတွေကို စစ်တပ်က ပစ်သတ်ခဲ့တာကြောင့် ကိုယ်ဝန်ဆောင်အမျိုးသမီးနဲ့ သူ့ရဲ့ သမီးအကြီးဖြစ်သူ အသက် ၁၀ နှစ်အရွယ်ကလေးတစ်ဦး အတူတူ သေဆုံးသွားခဲ့ရပါတယ်။

“ချင်းယားကျေးရွာက လူကိုဆို ပါးစပ်ထဲကို အဝတ်ထိုးထည့်ပြီး ရိုက်သတ်ထားတယ်။ လက်သမားကန်ရွာက တစ်ယောက်ကိုတော့ မျက်နှာကို သေနတ်တေ့ပစ်ထားတာ” လို့ မြင်းခြံမြို့နယ်ထဲက ချင်းယားကျေးရွာ ဒေသခံတစ်ဦးက ပြောပါတယ်။

မြင်တွေ့သမျှ အရပ်သားတွေကို သတ်ဖြတ်တာ ရှိသလို တချို့တစ်ယောက်စ၊ နှစ်ယောက်စကိုတော့ ပြန်လွှတ်ပေးတာမျိုးလည်း ရှိတယ်လို့ ဒေသခံတွေ က ဆိုပါတယ်။

“အသတ်ခံရတဲ့သူတွေက PDF တွေလည်းမဟုတ်ဘူး အကြောင်းမဲ့သတ်တာ၊ စစ်ကြောင်းက ငါးယောက်တစ်ဖွဲ့ ၊ ဆယ်ယောက်တစ်ဖွဲ့ သွားတော့ မတူကြဘူး၊ ရက်စက်တဲ့အဖွဲ့က ပစ်သတ်ပြီး တချို့လမ်းကြောင်းမတူတဲ့အဖွဲ့က ပြန်လွှတ်ပေးတာရှိတယ်” လို့ ဒေသခံ တစ်ဦးက ပြောပါတယ်။

မြင်တွေ့သမျှ ရွာတိုင်းလိုလိုမှာ အပုပ်နံ့တွေလှိုင်လှိုင်ထွက်နေတဲ့အပြင် ပစ်သတ်ခံထားရတဲ့ အလောင်းတွေကို နေရာတိုင်းမှာ တွေ့မြင်နေရတဲ့အတွက် နောက်ထပ် လက်လှမ်းမမီတဲ့ နေရာမှာ အသတ်ခံရသူတွေလည်း ရှိနေနိုင်သေးတယ်လို့ မြင်းခြံမြို့နယ် ပြည်သူ့အုပ်ချုပ်ရေးအဖွဲ့ဝင် တစ်ဦးက ဆိုပါတယ်။

အရင်ကစစ်ကြောင်းထိုးပြီးပြီဆိုရင် ရွာသူရွာသားတွေဟာ ကိုယ့်အိမ်ကို ပြန်နေကြပေမယ့် ဒီလို သတ်ဖြတ်ခံရတဲ့ ဖြစ်စဉ်တွေ ကြားရပြီး ရွာကို ပြန်မလာရဲကြတော့ဘူးလို့ ဆိုပါတယ်။ ဒေသခံတွေဟာ ဘေးလွတ်ရာ တောတောင်တွေထဲမှာသာ ဖြစ်သလို စစ်ရှောင်နေရတယ်လို့ စစ်ရှောင် နေတဲ့ ဒေသခံတွေဆီက သိရပါတယ်။

အခုက မိုးရာသီဆိုတော့ မိုးသည်းရင် ရေအိုင်ထဲ ဒီအတိုင်းနေရတယ်၊ မိုးကာတဲ မလုပ်နိုင်တဲ့အတွက် တောတွေထဲက ခြုံတွေထဲမှာ ကြုံသလို မိုးခိုပြီးနေကြရတာလို့ သူတို့က ပြောပြပါတယ်။ မစင်စွန့်ဖို့ကို ဆိုင်ကယ်နဲ့ သွားရတယ်၊ ဝမ်းရောဂါ ဖြစ်မှာစိုးလို့ အလေးသွားဖို့ကိုဝေးတဲ့နေရာမှာ သတ်မှတ်ထားတာလို့ စစ်ရှောင်ဒေသခံတွေဆီက သိရပါတယ်။

“သွားကြည့်သမျှ အလောင်းတွေကို တွေ့နေလို့ အရင်လိုဘယ်သူမှ ပြန်မနေရဲကြတော့ဘူး၊ တချို့ဆိုလည်း သူတို့အိမ်တွေ မီးရှို့ခံရ ရင်လည်း ခံရမယ်လို့ အစကတည်းက တွေးထားပြီးသားပေါ့၊ ပြည်သူတွေလည်း နောက်ထပ်လည်း သူတို့ကို အနိုင်မတိုက်နိုင် သေးရင်တော့ ဒီလိုပဲ ဒုက္ခကြုံတွေ့ရဦးမှာပေါ့၊ အဲဒီလိုတွေတွေးကြတာပေါ့” လို့ ဒေသခံ တစ်ဦးက ဆိုပါတယ်။

အာဏာသိမ်းစစ်တပ်က စစ်ကြောင်းထိုးတာအပြင် နေအိမ်တွေကိုမီးရှို့တာကြောင့် အိမ်တွေမီးလောင်ဆုံးရှုံးရတဲ့အပြင် အိမ်မှာသိုလှောင်ထားတဲ့ လယ်ယာထွက်ကုန် တွေဖြစ်တဲ့ ဆန်၊စပါး၊ မြေပဲတွေ ပါ မီးလောင်ပျက်စီးသွားလို့ ဘဝပါပျက်ရတယ်လို့ သူက ဆက်ပြောပါတယ်။

“မြေပဲတွေဆိုရင်လည်း လုပ်ဖို့ကိုင်ဖို့၊ စိုက်ဖို့ ဆဲဆဲတွေရော၊ စိုက်ပြီးသားတွေရော၊ စိုက်ပြီးသားကျ ထားခဲ့ရလို့ပျက်စီးပေါ့” လို့ အဆိုပါဒေသခံက ဝမ်းနည်းငိုကြွေးရင်း ပြောပြပါတယ်။

အခုလည်း တံစိုးကျေးရွာအနီးက ခွေးရေတောထဲမှာ အစုလိုက် အပြုံလိုက် အသတ်ခံခဲ့ရတဲ့ ဒေါ်ဝင်းကြည်တို့ မိသားစုမှာ ကျန်ရစ်ခဲ့သူ တွေကတော့ စစ်ရှောင်ရင်း တခြားသူတွေ ကျွေးတာ စားနေရတယ်လို့ နီးစပ်သူတွေက ဆိုကြပါတယ်။

ရွာကိုလာတဲ့ စစ်တပ်နဲ့ ပျူစောထီး စစ်ကြောင်းက လူသတ်သွားတာအပြင် သေဆုံးသူတွေရဲ့ ရွှေလက်ကောက် နှစ်ကွင်း၊ ဆွဲကြိုးတစ်ကုံး၊ နားကပ် တစ်ရံနဲ့ ဖုန်းနှစ်လုံးကိုပါ ယူဆောင်သွားတယ်လို့ နီးစပ်သူတွေ က ပြောပါတယ်။ ဒါ့အပြင် စုဆောင်းထား တဲ့ ငွေကျပ် သိန်း ၈၀ ကိုလည်း ယူဆောင်သွားကြတယ်လို့လည်း ဆိုပါတယ်။ လူ့အသက်တွေလည်းပေးရ၊ ပိုင်ဆိုင်တာတွေလည်း ယူသွား ဆိုတော့ ရှင်ကျန်ရတဲ့ မိသားစုဝင်တွေ အခက်တွေ့ရပါတယ်။

တကယ်တော့ အခုအသတ်ခံခဲ့ရတဲ့ ဒေါ်ဝင်းကြည် မှာ သမီးတစ်ယောက်ရှိခဲ့ပါတယ်၊ အဲဒီသမီးဟာ ၂၀၂၄ သြဂုတ်လမှာပဲ မြင်းခြံမြို့ပေါ်ကို စျေးဝယ်ဖို့သွားတဲ့အချိန်  စစ်တပ်နဲ့ပျူစောထီး စစ်ကြောင်းနဲ့ တိုးလို့ အဖမ်းခံခဲ့ရပါတယ်။ ပြီးတော့ အသက်ရှင်လျက် ပြန် မလာနိုင်ဘဲ ပျူစောထီးတွေရဲ့ သတ်ဖြတ်မှုကို ခံခဲ့ရသူပါ။

သမီးလေး အသတ်ခံရပြီးနောက် ခြောက်လအကြာမှာ သူမရဲ့ ဖခင်၊ ဒေါ်ဝင်းကြည်ရဲ့ အမျိုးသားဟာလည်း ဆိုင်ကယ်မတော်တဆဖြစ်လို့ ကွယ်လွန်ခဲ့ပါတယ်။ သမီးလေး အသတ်ခံရတဲ့ တစ်နှစ်ပြည့်မှာ မိခင်ဖြစ်သူ ဒေါ်ဝင်းကြည် ဟာ သမီးနည်းတူ စစ်တပ်ကသတ်ဖြတ်တာကို ခံခဲ့ရပြန်ပါတယ်။

ဒီလိုသားအမိနှစ်ယောက်ရဲ့ အဖြစ်ဆိုး၊ ၁၀ ရက်အကြာ ရက်လည်ပြီးမှ သဂြိုလ်ပေးလိုက်ရတဲ့ အဖြစ်ဆိုး၊ အစုလိုက်အပြုံလိုက် အသတ်ခံရတဲ့ အဖြစ်ဆိုး၊ နေစရာ အိမ်တွေ မီးရှို့ခံရတဲ့ အဖြစ်ဆိုး၊ တောင်သူတွေ လယ်ယာလုပ်ငန်းခွင် မဝင်နိုင်တဲ့ အဖြစ်ဆိုး၊ ဒီအဖြစ်ဆိုးတွေကနေ ဘယ်တော့မှ လွတ်မှာပါလိမ့်။

ဂါရာရေးသားသည်။

The Nation Voice Journal ကို စစ်ကိုင်းတိုင်းနဲ့ မကွေးတိုင်းတို့မှာ ပုံနှိပ်ထုတ်ဝေဖြန့်ချိနေပါပြီ။

သတင်းနဲ့ ဆောင်းပါးတွေဖတ်ဖို့ အခုပဲ အခမဲ့ Download ရယူလိုက်ပါ . . .

https://www.mediafire.com/file_premium/1k405ipkhwdu2zw/The_Nation_Voice_18.1.pdf/file

သတင်းတွေသိရဖို့ မျှဝေပေးပါ

မုသားနဲ့အမုန်းစကားတွေ တွင်တွင်သုံးလာကြတဲ့ စစ်အာဏာရှင် နောက်မြီးဆွဲများ

ကလေးတွေစာသင်နေတဲ့ ကျောင်းကို လေကြောင်းက တိုက်ခိုက်ခဲ့ပြီး ပုံစံအမျိုးမျိုးနဲ့ လိမ်ညာ သတင်းစကားဆိုနေတဲ့ စစ်အာဏာရှင်အောက်ဆွဲတွေက သူတို့ရဲ့ မုသားနဲ့ အမုန်းစကားတွေကို အညာပြည်သူတွေဆီကို ပစ်မှတ်ထားပို့လွှတ်နေကြပါတယ်။

ပုဂ္ဂိုလ်ရေး အချက်အလက်တွေ၊ ဗုံးကြဲ ဖို့နေရာတွေကို ဆိုရှယ်မီဒီယာမှာ တင်လိုက်ခြင်းက အွန်လိုင်းမှာတင်မကဘဲ မြေပြင်မှာပါ အသက်အန္တရာယ် ထိခိုက်နိုင်လောက်တဲ့ လှုံ့ဆော်မှုတွေ ဖြစ်တဲ့အတွက် အမုန်းစကားပြောတာနဲ့ တိုက်ရိုက်သက်ဆိုင်ပါတယ်လို့ အမုန်းစကားဆန့်ကျင်ရေး ဆောင်ရွက်နေသူတွေက ဆိုပါတယ်။ အမုန်းစကားဟာ လူမျိုးတုံးသတ်ဖြတ်တဲ့အထိ ဖြစ်စေနိုင်တဲ့ စကားတွေပါ။ လူ့အခွင့်အရေး ယန္တရားတွေကလည်း ဒါကို တားဆီး ပိတ်ပင်ထားပါတယ်။

“စစ်တပ်လော်ဘီ Telegram အကောင့်တွေကဆိုရင် အမုန်းစကားတွေ၊ အချက် အလက်အမှားတွေအပြင် ဘာသာရေး၊ လူမျိုးရေးကို အသုံးချပြီး သွေးထိုးတာမျိုးတွေက ရခိုင်ကိစ္စ၊ ရှမ်းမြောက်ကိစ္စလိုမျိုးတွေမှာ ပိုပြီးသိသိသာသာ မြင်ရတယ်။ နောက်ပိုင်းမှာ လူတွေက ဒါကို လော်ဘီလုပ်တာဆိုတာ နားလည်လာကြတော့ သူတို့က တဖက်လှည့် နဲ့ သတင်းဌာနလို အယောင်ဆောင်တာ၊ တော်လှန်ရေးဘက်ကလို အယောင်ဆောင်ပြီး အချက်အလက်အမှန်နဲ့ အမှားတွေ ရောပြီး ထင်ယောင်ထင်မှားဖြစ်အောင် လုပ်တာမျိုးတွေလည်း ရှိလာပါတယ်” လို့ အမုန်းစကား တွေကိုစောင့်ကြည့် လေ့လာနေသူတစ်ဦးက သုံးသပ်ပြောဆိုပါတယ်။

ဒီလိုအသွင်ပြောင်းပြီး သတင်းဌာနပုံစံတူ ဝါဒဖြန့်နေတဲ့ ဆိုရှယ်မီဒီယာ Page တွေထဲ က သာဓကတစ်ခုကတော့ MFG လို့ ဒေသခံ တွေကသိကြတဲ့ Facebook Page တစ်ခုပါ။

အမည်အပြည့်အစုံကတော့Myanmar Family Group ဖြစ်ပြီး အဲဒီလူမှုစာမျက်နှာဟာ တခြား စစ်တပ်လော်ဘီတွေလိုမျိုး မဟုတ်ဘဲ သတင်းဌာနအယောင်ဆောင်ပြီး သတင်းအချက်အလက်အမှားတွေနဲ့ အမုန်း စကားတွေဖြန့်ဝေနေတာကြောင့် သတင်းမီဒီ ယာအစစ်လို့ထင်နေတဲ့ ပြည်သူတွေလည်းရှိတယ်လို့ စလင်းနယ်ခံတစ်ဦးက The Nation Voice ကို ပြောပါတယ်။

Myanmar Family Group upon Facebook Page ကို ၂၀၂၄ ခုနှစ် ဇူလိုင် ၄ ရက်မှာ Mezal School Council – MSC (မဲဇလီကျောင်းကောင်စီ) ဆိုတဲ့အမည်နဲ့ ဖွင့်ခဲ့ပြီး တစ်လအကြာ ၂၀၂၄ ဩဂုတ် ၁၃ ရက်မှာ Myanmar Family Group လို့ အမည်ပြောင်းခဲ့ပါတယ်။ ဒီနောက်မှာတော့ ဖေ့ဘုတ် ဆိုရှယ်လူမှုကွန်ရက်မှာ သတင်းမီဒီယာအယောင်ဆောင်ပြီး ပြည်သူတွေဆီကို သတင်းအမှားတွေ၊ အမုန်းစကားတွေ ဖြန့်ဝေပေးနေတာ တွေ့ရပါတယ်။ ဒါ့အပြင် အညာဒေသက ဒေသခံတွေနေထိုင်ရာ ကျေးရွာတွေကို လေကြောင်းတိုက်ခိုက်ဖို့ လှုံဆော်ခဲ့ပြီး တိုက်ပွဲတွေနဲ့ပတ်သက်တဲ့ သတင်းတု၊ သတင်းမှားတွေကိုလည်း ဖြန့်ဝေနေတာကို The Nation Voice က လေ့လာတွေ့ရှိရပါတယ်။

အဆိုပါ Page တစ်ခုတည်းကပဲ ပြီးခဲ့တဲ့ ဧပြီလ တစ်လအတွင်း သတင်းတု၊ သတင်းမှား ပိုစ့်အရေအတွက် စုစုပေါင်း ၆၀ နီးပါး တင်ခဲ့ပါတယ်။ အဲဒီထဲမှာ မကွေးတိုင်း အနောက်ခြမ်းက ကျေးရွာ ၂၄ ရွာကို လေကြောင်းတိုက်ခိုက်ဖို့ လှုံ့ဆော်ခဲ့တဲ့ သတင်းတွေလည်း ပါဝင်ခဲ့ပါတယ်။

အဲဒီ Page ဟာ Facebook မှာတင်မကဘဲ YouTubeနဲ့ Telegram တို့မှာပါ သတင်းတု၊ သတင်းမှားတွေနဲ့ ဝါဒဖြန့်နေတာကို တွေ့ ရပါတယ်။

“အဲဒီ Page က စစ်လော်ဘီ Page တမင်စောင့်ဖတ်တာ၊ သူတို့ဘာတွေကြံစည်နေလဲ သိရအောင်လို့။ ခုဗုံးကြဲခိုင်းတယ်။ ဟိုးနှစ်လလောက်လည်း သူတို့က လေယာဉ်ခေါ် ပြီး နောက်ရက် လယ်မ(ပွင့်ဖြူ)ကို စက်သေနတ်နဲ့ပစ်တာ လေယာဉ်ပေါ်ကနေ၊ တော်လှန်ရေးအောင်ရင် စစ်တပ်နဲ့အတူ အမှုတွဲရမယ့် Page “လို့ ပွင့်ဖြူမြို့နယ်ခံ အမျိုးသမီး တစ်ဦးက ဆိုတယ်။

ဧပြီ ၂၁ ရက်နေ့က တင်ခဲ့တဲ့ ပိုစ့်တခုမှာ တော့ စလင်းမြို့နယ်က ၃ ရွာ၊ ပွင့်ဖြူမြို့နယ် က ၄ ရွာနဲ့ စေတုတ္တရာမြို့နယ်က ရွာ ၁၅ ရွာရဲ့ အမည်တွေကိုဖော်ပြထားပြီး အဲဒီရွာတွေ မှာ ပြည်သူမရှိဘဲ တော်လှန်ရေးအဖွဲ့ဝင်နဲ့ သူတို့ရဲ့မိသားစုဝင်တွေသာရှိလို့ လေကြောင်းတိုက်ခိုက်ရမယ့်ရွာတွေလို့ လေကြောင်းကနေ အကြမ်းဖက်ဖို့ လှုံ့ဆော်တိုက်တွန်းခဲ့ပါတယ်။

အဲဒီလို လေကြောင်းတိုက်ခိုက်ဖို့ လှုံ့ ဆော်နေတာကြောင့် အဆိုပါ Page မှာ ဖော်ပြထားတဲ့ ကျေးရွာတွေက ဒေသခံတွေဟာ စိုးရိမ်ခဲ့ကြရပြီး ကျေးရွာခံပြည်သူအများစုက ရွာကနေ ခေတ္တရှောင်နေခဲ့ကြရပါတယ်။

ဒီလိုမျိုး Page တွေဟာ မကွေးတိုင်းရဲ့ဒေသအသီးသီးမှာလည်း ရှိနေပြီး အများအားဖြင့် စစ်တပ်ထောက်ခံသူတွေနဲ့ ပြည်သူတွေကို ဝါဒဖြန့်ဖို့ အားစိုက်ထားတာကိုတွေ့ရပါတယ်။ မင်းဘူးခရိုင်၊ ယောဒေသ (ဂန့်ဂေါ ခရိုင်)နဲ့ ပခုက္ကူ ခရိုင်အတွင်း ကြည်ပြာမောင်၊ Myanmar Family Group စတဲ့ Page တွေအပြင် Kyaw Soe Oo၊  Kyaw Swar စတဲ့ telegram အကောင့်တွေကနေ သတင်းတု သတင်းမှားတွေ ဖြန့်ဝေနေပါတယ်။

တိုက်ပွဲမရှိပါဘဲနဲ့ လေကြာင်းက ဗုံးကြဲခိုင်းတာ၊ မဟာမိတ် EAO တွေဝင်လာတယ်လို့သတင်းမှား ဖြန့်ဝေတာနဲ့ စစ်ကြောင်းထိုး မီးရှို့ဖို့အတွက် လှုံ့ဆော်တဲ့ လုပ်ရပ်တွေနဲ့ မြေပြင်က အာဏာသိမ်းစစ်တပ်ရဲ့ တပ်သားတွေကို ဖိအားပေးတိုက်တွန်းလေ့ရှိပါတယ်။ အခြားတစ်ဖက်မှာလည်း အဲဒီရေးသားချက်တွေကြောင့် ဒေသခံတွေ စိုးရိမ်မှုတွေရှိနေရပြီး နေရပ်စွန့်ခွာသွားသူတွေလည်း များလာတာကို တွေ့ရပါတယ်။

“လေကြောင်းရန်နဲ့ ရွာကို မီးရှို့မှာ ကြောက်ကြတယ်။ တချို့က မီးရှို့ခံရတာထက် လေကြောင်းကို ပိုကြောက်ကြတယ်” လို့ ပြည်သူတွေနေထိုင်ရာကျေးရွာတွေကို လေကြောင်းကနေ တိုက်ခိုက်ဖို့ လှုံ့ဆော်တဲ့အပေါ် ဒေသခံတွေရဲ့ စိုးရိမ်မှုနဲ့ပတ်သက်လို့ စလင်းနယ်ခံတစ်ဦးက ပြောပြပါတယ်။

စလင်းမြို့နယ်ထဲက ကျေးရွာတွေကို အာဏာသိမ်းစစ်တပ်က ဧပြီလ ၂၀ ၂၀ ရက်နေ့ မှာ လေကြောင်းကနေ ဗုံးသီး ၁၂ လုံးဝန်းကျင် ကြဲချတိုက်ခိုက်ခဲ့ပြီး အဆိုပါတိုက်ခိုက်မှုကို MFG အနေနဲ့ အပြည့်အဝထောက်ခံကြောင်း ရေးသားခဲ့ပါတယ်။ ဒီနောက်မှာတော့ အဲဒီထောက်ခံကြောင်း ရေးသားထားတဲ့ Post ကို ဖြုတ်ချခဲ့ပြီး သိပ်မကြာခင်မှာပဲ စလင်းမြို့နယ်ငြိမ်းချမ်းဖို့ ဆုတောင်းတယ်လို့ Post တစ်ခု ထပ်မံတင်ခဲ့ပါတယ်။

MFG Page က တင်ခဲ့တဲ့ post တွေအရ အခုနှစ် မတ်လအစလောက်ထိ ပွင့်ဖြူနယ်ကို အဓိကထား သတင်းအမှားဖြန့်ခဲ့ပေမယ့် အဲဒီနောက်ပိုင်းမှာတော့ စလင်းမြို့နယ်ကို ဦးတည်လာပြီး သတင်းအချက်လက် အမှားတွေကို ဖြန့်ဝေနေတာတွေ့ရပါတယ်။

အဆိုပါလူမှုကွန်ရက်စာမျက်နှာတွေကို ပွင့်ဖြူမြို့နယ်က ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီရဲ့ အမတ်တချို့နဲ့ ယခင်မှုခင်း သတင်းထောက်တွေ၊ ပြန်ကြားရေးဌာနက သတင်းထောက်တွေနဲ့ ဖွဲ့စည်းထားတာဖြစ်တယ်လို့ အဆိုပါအဖွဲ့မှာပါဝင်တဲ့ အမည်မဖော်လိုသူ သတင်းရင်းမြစ်က the Nation Voice ကိုပြောပါတယ်။

အဆိုပါအဖွဲ့ကို နေပြည်တော်မှာ ဗိုလ်ချုပ်ဇော်မင်းထွန်းနဲ့ ပုဂ္ဂလိက လုပ်ငန်းပိုင်ရှင်

တစ်ဦးတို့က ဝါဒဖြန့်ချိရေးကို စစ်ဆင်ရေးတစ်ရပ်သဖွယ် စတင်ဖို့  ၂၀၂၁  ခုနှစ် ဖေဖော်ဝါရီလ မတိုင်ခင် ကတည်းက ကြိုးပမ်းခဲ့တာလို့ သတင်းရင်းမြစ်က ထုတ်ဖော်ရှင်းပြပါတယ်။

မကွေးတိုင်း၊ ပွင့်ဖြူမြို့နယ်အတွင်းမှာ ၂၀၂၄ ခုနှစ် ဇူလိုင်လကနေ ၂၀၂၅ ဖေဖော်ဝါရီလ အထိ တိုက်ပွဲကြီးငယ်ဖြစ်ပွား ခဲ့ပြီး MFG Page ဟာ အဆိုပါတိုက်ပွဲတွေနဲ့ပတ်သက်လို့ သတင်းမှားဖြန့်ချိတာ၊ ကာကွယ်ရေးအဖွဲ့ဝင်တွေရဲ့ အချက်လက်တွေကို ဖော်ပြလှုံ့ဆော်တာတွေ ပြုလုပ်ခဲ့ပါတယ်။

MFG Page ကနေ ဒေသတွင်းကျေးရွာတွေနဲ့ ပတ်သက်လို့ သတင်းအမှားတွေ တင်ထား ထားပြီးနောက်ရက် အနည်းငယ်မှာ အာဏာသိမ်းစစ်တပ်က အဲဒီကျေးရွာတွေကို စစ် ကြောင်းထိုးတာတွေရှိတယ်လို့ ဒေသခံတွေ ကပြောပါတယ်။

“ဟန်ငြိမ်းဦးတို့လိုမျိုး ချန်နယ်လုပ်တဲ့ သဘောပဲ၊ တကယ်တော့ သူတို့ရည်ရွယ်ထားတဲ့ လူပုဂ္ဂိုလ်၊ ဒါမှမဟုတ် ကျေးရွာတွေကို စစ်ဆင်ရေးတွေ ဖမ်းဆီးတာတွေလုပ်ဖို့ သက်ဆိုင်ရာနယ်မြေအဖွဲ့အစည်းတွေနဲ့ သူတို့က ကြိုပြီး တိုင်ပင်လား၊ ပြင်ဆင်ထားပြီးသား ဒါပေမယ့် သူတို့ရဲ့ ဩဇာလွှမ်းမိုးနိုင်ဖို့ အားလုံးပြင်ဆင်ပြီးတဲ့အချိန်မှာ သူတို့ချန်နယ်တွေ သူတို့ကထုတ်ဖော်ရေးသားရင် စစ်တပ်ကလိုက်လုပ်ရတယ်ဆိုတာမျိုး ဖြစ်အောင်လို့ပေါ့” လို့ အာဏာသိမ်းစစ်တပ်ရဲ့ ဝါဒဖြန့် ချန်နယ်တွေကို စောင့်ကြည့်လေ့လာနေသူ သုတေသနသမားတစ်ဦးကဆိုပါတယ်။

အာဏာသိမ်းစစ်တပ်ရဲ့ လေတပ်ဟာ လက်နက်ကိုင်အဖွဲ့တွေမရှိတဲ့ ကျေးရွာတွေ ကို လေကြောင်းတိုက်ခိုက်ခြင်းမပြုပါလို့ ဧပြီလ ၂၄ ရက်မှာ MFG က ဝါဒဖြန့်ထားပေမယ့် အဲဒီနေ့ ညနေ ၅ နာရီ ၄၅ မိနစ်ဝန်းကျင်မှာ စလင်းမြို့နယ်က တောင်ဘိုရွာသစ်ရွာနဲ့ ဘုန်းကြီးကျောင်းကို လေကြောင်းတိုက်ခိုက်ခဲ့ပြီး တစ်နာရီဝန်းကျင်အကြာ ညနေ ၆ နာရီ ၅၅ မိနစ်မှာတော့ စေတုတ္တရာမြို့နယ်၊ လုံးဇွန် ရွာကို လေကြောင်းတိုက်ခိုက်ခဲ့ပါတယ်။

အဲဒီလေကြောင်းတိုက်ခိုက်မှုတွေကြာင့် စလင်းမြို့နယ်က ဒေသခံ ၃ ဦး ဒဏ်ရာရခဲ့ပြီး စေတုတ္တရာမြို့နယ်၊ လုံးဇွန်ရွာက နေအိမ် ၅ဝ ဝန်းကျင် မီးလောင်ခဲ့ပါတယ်။

The Nation Voice ရဲ့ လေ့လာတွေ့ ရှိချက်အရ MFG အဖွဲ့ရဲ့ ဥက္ကဌဟာ ဦးစောရန်ပိုင်ဆိုသူဖြစ်ပြီး အဖွဲ့သားတွေထဲမှာတော့ စလင်းမြို့နယ်ဒေသခံတွေ၊ ပွင့်ဖြူမြို့နယ် ဒေသခံတွေနဲ့ စေတုတ္တရာမြို့နယ်ဒေသခံတွေ အများဆုံးပါဝင်နေပြီး MFG အဖွဲ့ဝင်တွေအနေနဲ့ အဲဒီဒေသတွေမှာ ၁၅ နှစ်နီးပါး နေထိုင်ခဲ့တယ်လို့ အဲဒီချန်နယ်ရဲ့ တရားဝင်ပြောကြားချက်တွေအရ သိထားရပါတယ်။

“ဒီပေ့ချ်က စစ်ကောင်စီရဲ့ ဝါဒဖြန့်ချိရေးတစ်စိတ်တစ်ပိုင်းပဲ ဖြစ်ပါတယ်။ အဓိက ကတော့ သူတို့လက်အောက်ခံတွေ မြေပြင်မှာ စစ်ရှုံးနေတဲ့အခါမှာ တွန်းအားပေးနေတာ လည်းဖြစ်တယ်။ တနည်းအားဖြင့် ဒေသခံလူထုတွေ စိတ်အနှောင့်ယှက်ဖြစ်အောင်လည်း တိုက်ပွဲသတင်းတုတွေ၊ သတင်းမှားတွေကို တင်ပေးနေတာ ဖြစ်တယ်။ ဒါတွေကြောင့် ပြည်သူလူထုအနေနဲ့ စိုးရိမ်စရာ မလိုဘူး။ သက်ဆိုင်ရာ ကာကွယ်ရေးအဖွဲ့တွေက ထုတ်ပြန်တာကိုသာ ကြည့်ဖို့လိုတယ်။ ဒီပေ့ချ်ကို ဂရုတစိုက်ကြည့်နေ reaction ပေး နေ share နေဦးမယ်ဆိုရင် ဒီပေ့ချ်က ရှိနေဦးမှာပါပဲ” လို့ ပွင့်ဖြူ မြို့နယ်က စစ်ရေးလေ့လာ နေသူတစ်ဦးကလည်း ပြောပါတယ်။

အမုန်းစကားတွေက Online ရော၊ Offline မှာပါ ပုံစံမျိုးစုံနဲ့ နှစ်ပေါင်းများစွာ ရှိနေ ခဲ့ပါတယ်။ နိုင်ငံရေးအခြေအနေ မတည်ငြိမ်တဲ့အပေါ် အခွင့်ကောင်းယူပြီး အမုန်းစကား တွေ၊ သတင်းအတု၊ သတင်းမှားတွေက ခုနောက်ပိုင်းမှာ ဒီဂျစ်တယ်နည်းအရ ပိုပြီးပျံ့နှံ့ လာတာ တွေ့ရပါတယ်။

ငြိမ်း၊ ကံ့ကော်၊ ကိုသိန်းတင် ရေးသားသည်။

“မောင်မောင့်ကို ပြန်လွတ်စေချင်ရင် ၃၅ သိန်း Kpay နဲ့အရင်လွှဲပေးလိုက်၊ လွှဲပြီးရင်လာခေါ်လို့ရပြီ” လို့ လေသံမာမာပြောပြီး ဖုန်းချသွားတယ်။ ငွေသိန်းသုံးဆယ်ကျော်ကို လွှဲပေးရမယ်ဆိုပေမယ့်လည်း မောင်မောင့်ရဲ့ အမေကတော့ ပျော်သွားတယ်။ သူ့သားမောင်မောင် မြို့ပေါ်ကိုစျေးသွားဝယ်ပြီး အဆက်အသွယ်ပြတ်လို့ အိမ်ပြန်မရောက်တာ ရက်အတန်ကြာပြီမို့လား။ သားပျောက်အမေဖြစ်လို့ သားကိုပြန်တွေ့ချင်ဇောနဲ့ ငွေ ၃၅ သိန်းကို လွှဲပေးလိုက်ပါတယ်။ ငွေလွှဲပြီးတော့ သားကိုသွားခေါ်ဖို့ ပြင်ဆင်ပါတော့တယ်။

မောင်မောင့်မိခင်တစ်ယောက် သူမကိုယ်တိုင်က မိန်းမသားမို့မလိုက်ဖြစ်ပေမယ့် မောင်မောင့်ရဲ့ ဦးလေး ဦးကိုကိုနဲ့ သူ့မိတ်ဆွေဖြစ်သူ ဦးမြင့်ထွန်းတို့က သားလေးမောင်မောင်ကိုခေါ်ဖို့ ထွက်သွားကြတယ်။

ဒါပေမယ့်လည်း သုံးယောက်လုံး ပြန်ရောက်လာရမယ့်ခရီးမှာ ဦးကိုကို တစ်ယောက်ထဲ ရွာကိုပြန်ရောက်လာတော့တယ်။ သားကို မျှော်နေမိပေမယ့်လည်း ကိုယ့်အဖြစ်က မြွေပါလည်းဆုံး၊ သားလည်းဆုံး။ သားပြန်လာဖို့ ကြိုးစားလိုက်တာ ငွေလည်းဆုံး၊ သားလည်းဆုံး၊ ကူပြီးလိုက်ပေးတဲ့ သူ့မိတ်ဆွေရဲ့ အသက်လည်း ဆုံးရတဲ့ အခြေအနေ။

“မြို့ပေါ်သွားလိုက်ဦးမယ် အမေရေ” ဆိုပြီး စျေးဝယ်ဖို့ နှုတ်ဆက်သွားတဲ့ ကိုမောင်မောင်က သူနေတဲ့ ရွာ နဲ့ မိုင် ၂၀ အကွာ စျေးကို မရောက်ဘဲနဲ့ “ပျုစောထီးတွေက သူတို့ကို(ကိုမောင်မောင် နဲ့ အခြား ဖမ်းခံရသူ) သတ်ပြီး ရေထဲမျှောလိုက်တယ်၊ ကျန်တာဘာမှမသိရဘူး”ဆိုတဲ့ သတင်းတခုသာ နောက်ဆုံးမှာ လက်ခံရရှိခဲ့ပါတယ်။

အာဏာသိမ်းပြီးနောက်ပိုင်းမှာ မိသားစုဝင်တွေ ပျောက်ဆုံးလို့ စုံစမ်းရတာ၊ လူပျောက်ကြော်ငြာရတာ၊ လိုက်ရှာရတာ တောရော မြို့ပါမကျန် တွေ့ကြုံလာရတာ ပိုလို့သာများလာပါတယ်။

၂၀၂၄ ခုနှစ် ဇူလိုင်လကနေ ၂၀၂၅ ခုနှစ် ဇွန်လ တစ်နှစ်တာအတွင်းမှာ လက်လှမ်းမီသလောက် စာရင်းပြုစုထားတဲ့စာရင်းအရ မန္တလေးတိုင်း၊ မြင်းခြံမြို့နယ် အတွင်းက ကျေးရွာပေါင်း ၁၀ ရွာကျော်မှာ လူပေါင်း ၂၂၀ ဝန်းကျင်ခန့်ဟာ စစ်တပ်နဲ့ ပျူစောထီး တွေရဲ့ ဖမ်းဆီးတာကို ခံခဲ့ရပြီး အဆက်အသွယ်မရ၊ စုံစမ်းမရတဲ့ အခြေအနေနဲ့ ရင်ဆိုင်နေရပါတယ်လို့ မြင်းခြံခရိုင် ထောက်ပို့အဖွဲ့ဝင်တစ်ဦးက ဆိုပါတယ်။

ဒီစာရင်းဟာ မြန်မာတစ်နိုင်ငံလုံးမှာသတင်းမရဘဲ လူတွေပျောက်ဆုံးနေတဲ့ ဖြစ်ရပ်တွေထဲက တစ်စိတ်တစ်ဒေသဖြစ်ပါတယ်။ မြို့နယ်လေးတစ်ခုထဲက ကျေးရွာ ၁၀ ရွာမှာ လူပေါင်း နှစ်ရာကျော် ပျောက်ဆုံးနေပြီး အဆက်အသွယ်မရဖြစ်နေသူတွေက တစ်ရွာကို ၁၀ ယောက်ကျော်လောက် ရှိနေတယ်လို့ခန့်မှန်းရပါတယ်။

အမျိုးသားညီညွတ်ရေးအစိုးရက ကောက်ယူထားတဲ့ စာရင်းအရ တစ်နိုင်ငံလုံးက လူပေါင်း ခုနှစ်သောင်းကျော်ဟာ အာဏာသိမ်းစစ်တပ်ရဲ့ အတင်းအဓမ္မဖမ်းဆီးတာမျိုးခံကြရတယ်လို့ ထုတ်ပြန်ထားပါတယ်။

“စစ်မှုထမ်းဥပဒေနဲ့ အာဏာသိမ်းစစ်တပ်က လူတွေကိုဖမ်းဆီး စုဆောင်းပြီး စစ်သင်တန်းတွေပေး စစ်မြေပြင်ကို စေလွှတ်အသုံးချနေတယ်”လို့ အမျိုးသားညီညွတ်ရေးအစိုးရကဆိုထားပါတယ်။

လူငယ်တွေ အထူးသဖြင့် အမျိုးသားတွေကို ဖမ်းဆီးစစ်သင်တန်း‌ပေးပြီး ရှေ့တန်းကိုလွှတ်တယ်ဆိုတဲ့ အချက်ကိုလည်း တိုက်ပွဲမှာ ဖမ်းဆီးရမိတဲ့ စစ်သားတွေရဲ့ ထုတ်ဖော်ပြောပြချက်တွေကို ကိုးကားပြီး အမျိုးသားညီညွတ်ရေးအစိုးရက ထုတ်ပြန်ထားပါတယ်။

မြင်းခြံမြို့နယ်က ဖမ်းဆီးခံခဲ့ရသူတွေထဲမှာ အသက် ၁၄ နှစ်အရွယ်ကလေးတစ်ဦးပါဝင်နေပြီး အများစုကတော့ အသက် ၂၅ကနေ အသက် ၄၀ ဝန်းကျင်အထိပါဝင်ကြတယ်လို့ အဲဒီမြို့နယ်ထဲက ဖမ်းဆီးခံရမှုတွေနဲ့ ပျောက်ဆုံးသူတွေကို လေ့လာစာရင်းပြုစုနေသူတစ်ဦးက ဆိုပါတယ်။

မကွေးတိုင်းထဲက မြို့နယ်တစ်ချို့မှာလည်း ဆိုင်ကယ်လိုင်စင်မပါလို့ဆိုတဲ့ အကြောင်းပြချက်နဲ့ ဖမ်းဆီးတာ၊ ရွာအဝင်အထွက် ဂိတ်တွေမှာ ဖမ်းဆီးတာနဲ့ ပေါ်တာဆွဲနေတာမျိုးတွေကို ကြုံကြရတယ်လို့ ဒေသခံတွေက ဆိုကြပါတယ်။

ပုံမှန်ဆိုရင် ဖမ်းဆီးပြီးတဲ့နောက် ပုဒ်မမျိုးစုံတပ်ပြီး ရဲစခန်း၊ အကျဉ်းထောင်တွေကိုပို့လေ့ရှိပေမယ့် ဒီနောက်ပိုင်းမှာတော့ မိသားစုဝင်တွေ လိုက်လံစုံစမ်းတဲ့အခါ အဲဒီနေရာတွေမှာလည်း မရှိကြတော့ပါဘူး။ သာမန်မိသားစုတွေအဖို့ ဆက်ပြီးစုံစမ်းဖို့လည်း လက်လှမ်းမမီကြတော့တဲ့ အခြေအနေလို့ ဒေသခံတွေက ဆိုကြပါတယ်။

ဖမ်းဆီးခံရသူတွေမှာ ဘာကြောင့် အဖမ်းဆီးခံရတယ် ဆိုတာကို မသိရသလို မိသားစုဝင်တွေကလည်း သတင်းအစအနပျောက်နေတာကို ဒီတိုင်းထိုင်ကြည့်နေကြရရုံသာ။

ရန်ကုန်မြို့ပေါ်မှာ အကင်ရောင်းနေတဲ့ အမျိုးသားတစ်ဦးဟာ အာဏာသိမ်းစစ်တပ်ရဲ့ ဖမ်းဆီးခံခဲ့ရပြီးနောက် စစ်သင်တန်းတက်ခဲ့ရပါတယ်။ သင်တန်းဆင်းတော့ ရှေ့တန်းကို ရောက်လာရတာ လို့ တော်လှန်ရေးတပ်တွေ ဖမ်းမိတဲ့အခါ ထုတ်ဖော်ပြောဆိုထားတာလည်း ရှိခဲ့ပါတယ်။

ဒါကြောင့် မိသားစုဝင်တစ်ဦးဦး ဖမ်းဆီးခံရတယ်လို့ကြားရင်း နီးစပ်ရာတွေ လိုက်လံစုံစမ်းကြရတာပါ။ စစ်မှုထမ်း သင်တန်းထဲ ထည့်မှာစိုးလို့ ငွေပေး ရွေးရတဲ့ဖြစ်စဉ်တွေကလည်း မြို့တိုင်းမှာ လိုလိုကြားရတဲ့ မရိုးနိုင်တဲ့ ဖြစ်ရပ်မှန်ဇာတ်လမ်းတွေဖြစ်လာခဲ့ပါတယ်။

မန္တလေးတိုင်းထဲက မြင်းခြံ-ပုဂံညောင်ဦး၊ မြင်းခြံ-တောင်သာ၊ မြင်းခြံ-နွားထိုးကြီး ကားလမ်းမတွေမှာ အာဏာသိမ်း စစ်တပ်နဲ့ သူ့ရဲ့နောက်လိုက် ပျူစောထီးတွေက စစ်ဆေးရေးဂိတ်တွေမှာ ဖမ်းဆီးနေကြတာမျိုးလည်းရှိနေတယ်လို့ ဒေသခံတွေကဆိုပါတယ်။

မြင်းခြံခရိုင်ထဲက ကျေးရွာအများစုကို ကာကွယ်ရေးတပ်ဖွဲ့တွေက စိုးမိုးထားတာမို့ အာဏာသိမ်းစစ်တပ်နဲ့ ပျူစောထီးတွေက အရပ်သား ပြည်သူတွေကို သံသယနဲ့ ဖမ်းဆီးနေကြသလို ငွေညှစ်တာမျိုးတွေလည်း ရှိနေတာပါ။

အဲဒီဒေသက ကျေးရွာတွေမှာဒေသခံတွေ ခဏတိုင်း ဖမ်းဆီးခံနေရတော့ ကြားထဲကနေ လူရွေးပေးတဲ့ အမှုပွဲစားတွေလည်း ရှိလာတယ်လို့ ဒေသခံတွေကဆိုပါတယ်။
စစ်တပ်နဲ့ ပျူစောထီးအဖွဲ့တွေဖမ်းဆီးသွားတဲ့ အရပ်သားတွေကို ငွေနဲ့ပြန်လည်ရွေးယူဖို့ ကြားကနေတဆင့်ချိတ်ဆက်ပေးတဲ့ အမှုပွဲစားလိုမျိုး ပေါ်လာတာပါ။

မောင်မောင်အတွက်ကိုတော့ ပိုက်ဆံ ၃၅ သိန်းပေးပြီးရွေးဖို့ ချိတ်ဆက် လိုက်ဆယ်ရပေမယ့် အိမ်ပြန်မလာနိုင်ခဲ့ပါဘူး။ ငွေပေးရွေးပြီး အသက်ရှင်လျက် အိမ်ပြန်လာတဲ့ သူကတော့ လူနည်းစုအရေအတွက်လေးသာပါ။

ဖမ်းခံရလို့ ငွေနဲ့ လိုက်ပြီး ပြန်ရွေးခဲ့ရတာ တချို့ဆို ငွေကျပ် သိန်းတစ်ရာထိအများဆုံး ပေးပြီးရွေးခဲ့ရတာ ရှိသလို ဒါဟာလည်း လက်ဆယ်ချောင်း အရေအတွက်လောက်ဖြစ်တဲ့ လူနည်းစုပဲ ပြန်လွတ်လာခဲ့ရတာလို့ အဆိုပါဖြစ်ရပ်တွေကို စောင့်ကြည့်နေတဲ့ မြင်းခြံဒေသခံက မှတ်ချက်ပေးပါတယ်။

“ငွေနဲ့ရွေးခိုင်းပြီးမှ လူကိုပြန်မပေးဘဲသတ်ပြီး အလောင်းဖျောက်ပစ်တာလည်း ရှိတယ်။ ပြန်လွတ်တာလည်းရှိတယ်။ ဖမ်းထားတဲ့သူတွေ ဘယ်မှာထားလဲဆိုတာ ရှေ့နေတွေကလည်း စုံစမ်းမရဘူးတဲ့။ သေသလား၊ ရှင်သလားလည်း ခုထိမသိရသေးဘူး၊ အခုဆိုမြင်းခြံကို ဘယ်သူမှမသွားရဲတော့ဘူး”လို့ မြင်းခြံခရိုင်မှာတော်လှန်ရေးအတွက် ဆောင်ရွက်နေတဲ့ ထောက်ပို့အဖွဲ့ဝင်တစ်ဦးက ဆိုပါတယ်။

ဖမ်းဆီးခံရသူတွေကို ဖမ်းဆီးတဲ့နေရာမှာပဲ ရိုက်နှက်ပြီး ကြိုးတုပ်ချည်နှောင်ကာ ခေါ်ဆောင်သွားလေ့ရှိသလို ကားအစီးလိုက် ဖမ်းဆီးခံရတာလည်း ရှိပါတယ်။

ကားပေါ်လိုက်ပါသူတွေအထဲ မသင်္ကာသူတွေကို ဆက်ဖမ်းထားပြီး ကျန်တဲ့သူတချို့ကိုတော့ ပြန်လွှတ်ပေးတာလည်းရှိတယ်လို့ မြင်းခြံဘက်က ကျေးရွာအချို့မှာ နေထိုင်တဲ့ ဒေသခံတွေကပြောပါတယ်။

ဖမ်းဆီးခံရပြီး သေဆုံးသွားရတဲ့ ကိုမောင်မောင်ဟာလည်း စျေးကို အသွားမှာ ဖမ်းဆီးခံခဲ့ရတာဖြစ်ပြီး အသတ်ခံလိုက်ရတာက သူအားပေးတဲ့ ပါတီကြောင့်လို့လည်း ဒေသခံတွေက သုံးသပ်ကြပါတယ်။

ကိုမောင်မောင်ဟာ NLDပါတီကို ထောက်ခံအားပေးသူတစ်ဦးဖြစ်ပါတယ်။ ဒါ့အပြင် ကိုမောင်မောင်ကို ရွေးဖို့ အဖော်လိုက်သွားတဲ့ ဦးမြင့်ထွန်းကလည်း NLDပါတီကို ထောက်ခံ အားပေးသူတစ်ဦးလို့ဆိုပါတယ်။

ဒီအထဲက ဦးကိုကို တစ်ယောက်သာ ပြည်ခိုင်ဖြိုးပါတီကို အားပေးသူလို့ဒေသခံတွေက သိထားကြပါတယ်။ ကိုမောင်မောင်ကို သွားရွေးခဲ့ပေမယ့် သူတစ်ယောက်ပဲ အသက်ရှင်ပြန်လာတဲ့ ဒီဖြစ်ရပ်ဟာ ဒေသခံတွေအကြား ထိတ်လန့်စရာ ဖြစ်ခဲ့ရပါတယ်။

မြင်းခြံနယ်တစ်ဝိုက်မှာ ဒီလိုအခင်းအကျင်းက သိပ်တော့မကြာလိုက်ပါဘူး။ နောက်ပိုင်းမှာတော့ ပြည်ခိုင်ဖြိုးပါတီကို အားပေးထောက်ခံသူတွေလည်း ဖမ်းဆီးငွေညှစ်ခံရ တာတွေကိုကြုံလာကြရပါတော့တယ်။

“တချို့ဆိုကားအစီးလိုက်တွေဖမ်းတော့ သိန်းငါးရာလောက်ပါသွားတာလည်းရှိတယ်။ သူတို့ကအစိမ်း(ပြည်ခိုင်ဖြိုး‌ပါတီထောက်ခံသူ) ပိုင်တယ်ပေါ့၊ အခုတော့ သူတို့ကိုထောက်ခံတာတွေ မထောက်ခံတာတွေမရှိဘူး အကုန်ဖမ်းတယ်၊ သူတို့လူတွေပါ ဖမ်းနေတာပေါ့”လို့မြင်းခြံဒေသခံတစ်ဦးက ပြောပါတယ်။

မြင်းခြံ၊ တောင်သာ၊ နွားထိုးကြီး စတဲ့မြို့နယ်တွေထဲက ကျေးရွာတွေမှာ နေထိုင်ကြတဲ့သူတွေဟာ ဒီလိုဖမ်းခံရတဲ့ဖြစ်စဉ်တွေကြောင့် မြို့ပေါ် ကိုတက်ပြီး စျေးသွားဝယ်ဖို့ လက်တွန့်နေကြရတယ်လို့ ဒေသခံတွေဆီက သိရပါတယ်။

“မြင်းခြံမြို့ပေါ်မှာ တစ်ရက် တစ်ရက် ဆိုင်ကယ်၊ ကား၊ ထော်လာဂျီ အစီး၆၀ ကနေ ၁၀၀ အထိ ရှိတယ်။ ဖမ်းဆီးတာတွေ နောက်ပိုင်း သွားလာတာ တစ်ရက်ကို ငါးစီး ၊ခြောက်စီးလောက်ပဲရှိတော့တာ၊ အခုဆို တချို့လမ်းတွေ တစ်စီးတောင် မတွေ့တော့ဘူး”လို့ မြင်းခြံမြို့မှာ နေထိုင်သူတစ်ဦးကဆိုပါတယ်။

မြင်းခြံဒေသက ပြည်သူတွေအနေနဲ့ သူတို့ရဲ့ဆွေမျိုးတွေ ဖမ်းခံရတယ်ဆိုတဲ့သတင်းပဲ သတင်းကြားရပြီး စုံစမ်းလို့ မရတော့ပဲ ပျောက်ဆုံးသွားတဲ့အခါ “သူတို့တော့ ပျောက်သွားတယ်”လို့ပဲ သတ်မှတ်လိုက်ကြရပါတော့တယ်။ ပျောက်သွားခဲ့ပြီး တစ်နှစ်ဝန်းကျင်မှာတော့ မိသားစုဝင်တွေက ပျောက်ဆုံးသွားသူတွေကို သေပြီလို့ သတ်မှတ်လိုက်ရပြီး ဓလေ့ထုံးစံတွေအတိုင်း သက်ပျောက်ဆွမ်းကပ်တာ တွေ ပြုလုပ်လိုက်ကြရတာလည်း ရှိနေကြပါတယ်။

နေဝင်သွားတဲ့အခါ မိသားစုဝင် တစ်ဦးဦးက အချိန်တန်လို့ ပြန်မရောက်သေးတာကို စိတ်ချလက်ချမနေရဲ။ စောင့်မျှော်နေရချိန်မှာလည်း မြို့ပေါ်မှာဆိုရင် ပေါ်တာဆွဲခံရတာလား….. ကျားဖြန့်ထဲ ရောင်းစားခံရတာလား….. တရုတ်ပြည်ကို လူကုန်ကူးခံရတာလား……… ရွာတွေမှာဆိုရင် စစ်တပ်က ဖမ်းထားလိုက်ပြီလား………….ပျူတွေကပဲ ခေါ်ထားလိုက်သလား……………… တော်လှန်ရေးအဖွဲ့ဝင်ထင်လို့ အသတ်များခံလိုက်ရပြီလား…………. လယ်ထဲသွားရင်း မိုင်းပဲထိသလား…………. လားပေါင်းများစွာနဲ့ မိသားစုဝင်တွေရဲ့ အပူတွေကို ဘယ်သူကူလို့ ငြိမ်းပါ့မလဲ။

( သတင်းဆောင်းပါးမှာ ပါဝင်သူများ၏ အမည်အားလုံးကို လုံခြုံရေးအရ အမည်လွှဲဖော်ပြထားပါတယ်)

ဂါရာ ရေးသားသည်။

ရွေးကောက်ပွဲဆိုတာ ဒီမိုကရေစီဖော်ဆောင်ရေး ဒီမိုကရေစီအသွင်ကူးပြောင်းရေးမှာ ပြည်သူတွေကိုယ်တိုင်ကိုယ်ကျ ပါဝင်ဆုံးဖြတ်ခွင့်ရတဲ့ နိုင်ငံရေးဖြစ်စဥ်တခုလို့ဆိုကြပါတယ်။

လွတ်လပ်ရေးရပြီးတဲ့ ၁၉၄၈ခုနှစ်ကစတွက်ရင် မြန်မာနိုင်ငံမှာ ရွေးကောက်ပွဲတွေရှိခဲ့ပါတယ်။ လွတ်လပ်ရေးရပြီးနောက် ပထမဆုံးကျင်းပတဲ့ ၁၉၅၁-၅၂ လွှတ်တော်ရွေးကောက်ပွဲမှာ ဦးနုဦးဆောင်တဲ့ ဖဆပလ အဖွဲ့ချုပ်အနိုင်ရခဲ့တယ်။ ၁၉၅၆ခုနှစ်လွှတ်တော်ရွေးကောက်ပွဲမှာ ဖဆပလအဖွဲ့ချုပ်အနိုင်ရပေမယ့် တည်မြဲနဲ့ သန့်ရှင်း နှစ်ပါတီကွဲခဲ့တယ်။ ၁၉၆၀မှာ ရွေးကောက်ပွဲပြန်ကျင်းပပြီး ဦးနုတို့အနိုင်ရတယ်။ နိုင်ငံရေးသမားတွေက အာဏာလု နေရာလုကြနဲ့ မညီညွတ်ကြဘူး၊ တိုက်စရာရှိတော့ စစ်တပ်ကတိုက်ရတယ်၊ သေစရာရှိတော့ စစ်သားတွေသေရတယ်၊ နိုင်ငံရေးသမားတွေ မညီညွတ်လို့ ပြည်ထောင်စုပြိုကွဲလိမ့်မယ် “တိုင်းပြည်ချောက်ထဲကျဖို့ လက်တလုံးအလို ” ဆိုတဲ့ အကြောင်းပြချက်နဲ့ ဗိုလ်နေဝင်းက ၁၉၆၂မှာ အာဏာသိမ်းတယ်။ လက်မခံဆန့်ကျင်တဲ့ပြည်သူတွေကို “ဓါးကိုဓါးချင်းလှံကိုလှံချင်း” မောင်းပြန်သေနတ်တွေကိုင်ပြီး စိန်ခေါ်ခဲ့တယ်။

နောက်တော့ ၁၉၇၄ဖွဲ့စည်းပုံအတွက် လူထုဆန္ဒခံယူပွဲ Referendum လုပ်တယ် အဆိုတော်အောင်ကိုလတ်ရဲ့ “မဲရုံ မဲရုံ ကွယ် ပြည်လုံးကျွတ်ဆန္ဒခံယူပွဲ” ဆိုတဲ့ သီချင်းသံတွေ ရေဒီယိုတွေက ပျံ့လွင့်ခဲ့တယ်။

၁၉၇၈၊ ၁၉၈၁၊ ၁၉၈၅ မြန်မာဆိုရှယ်လစ် လမ်းစဥ်ပါတီရဲ့ ရွေးကောက်ပွဲ၊ တပါတီစနစ်အောက်က ရွေးကောက်ပွဲကို ပြည်သူတွေကစိတ်မဝင်စားသလောက်ပါပဲ။ ဒီလိုနဲ့ လူထုဆန္ဒ၊ လူထုသဘောထားတွေ နိုင်ငံရေးအမြင်တွေမပါဝင်တဲ့ မထင်ဟတ်တဲ့ ရွေးကောက်ပွဲတွေကြောင့် ၁၉၈၈ခုနှစ် လူထူအရေးတော်ပုံကြီး ဖြစ်တယ်လို့ဆိုနိုင်ပါတယ်။ တနည်းအားဖြင့် မဆလ တပါတီစနစ်ရဲ့ လက်ညှိုးထောင်ခေါင်းညိမ့် ဒီမိုကရေစီဆိတ်သုဥ်းတဲ့ လွှတ်တော် နိုင်ငံရေး အားမကောင်းခဲ့လို့ ပြည်သူတွေက လမ်းပေါ်တက်ပြီး ဆန္ဒထုတ်ဖော်ကြတဲ့အခါ လမ်းပေါ်နိုင်ငံရေးဖြစ်ခဲ့တာလို့ ဆိုနိုင်ပါတယ်။ ဒါကိုပဲ ငြိမ်းချမ်းစွာ ဆန္ဒပြကြတဲ့ ရဟန်းရှင်လူ ကျောင်းသားပြည်သူတွေကို ဆူပူမှု၊ မင်းမဲ့စရိုက်ဆိုပြီး စစ်တပ်က မြို့လယ်ခေါင်မှာ အကြမ်းဖက်နှိမ်နင်းခဲ့တယ်။ ၁၉၈၈ခုနှစ် စက်တင်ဘာလ ၁၈ရက်မှာ စစ်တပ်က ဒုတိယအကြိမ်အာဏာသိမ်းခဲ့တယ်။ စစ်အာဏာရှင်ဗိုလ်နေဝင်းက “စစ်တပ်ဆိုတာပစ်ရင် မိုးပေါ်ထောင်ခြောက်တာမပါဘူး တည့်တည့်ပစ်တယ်”ဆိုပြီး ခြိမ်းခြောက်သွားခဲ့တယ်။ လှည်းနေလှေအောင်း မြင်းဇောင်းပါမကျန် တပြည်လုံး အုံကြွခဲ့တဲ့ ပြည်သူတွေကို ၁၉၉၀ ရွေးကောက်ပွဲကျင်းပမယ်လို့ ချွေးသိပ်တယ်။ စစ်အုပ်စုကျင်းပမယ့် ရွေးကောက်ပွဲကို မယုံကြည်တဲ့ ၈၈ အရေးတော်ပုံကြီးရဲ့ ကျောင်းသားလူငယ်တချို့ကတော့ “ရွေးကောက်ပွဲဟာထွက်ပေါက်မဟုတ်” ဆိုပြီး လက်နက်ကိုင်တော်လှန်ရေးဆင်နွှဲဖို့ တိုင်းရင်းသားလက်နက်ကိုင်တွေရဲ့ လွတ်မြောက်နယ်မြေတွေဆီကို ရောက်သွားခဲ့တယ်။ ဒီလိုနဲ့ပဲ ဗိုလ်နေဝင်းဦးဆောင်တဲ့ စစ်အာဏာရှင်စနစ်အစား ဗိုလ်စောမောင်၊ ဗိုလ်သန်းရွှေဦးဆောင်တဲ့ စစ်အာဏာရှင်စနစ်ကို ဆက်လို့ အသက်သွင်းခဲ့တယ်။ ၁၉၉၀ ရွေးကောက်ပွဲရလဒ်ကိုပစ်ပယ်၊ အနိုင်ရလွှတ်တော်ကိုယ်စားလှယ်တွေကိုဖမ်းဆီးပြီးမှ ဖွဲ့စည်းပုံရေးဆွဲရေး အမျိုးသားညီလာခံကိုကျင်းပတယ်။

စစ်တပ်ဆိုတာ ဒီမိုကရေစီကိုမလိုလားဘူး။ ရွေးကောက်ပွဲတွေ၊ လွှတ်တော်တွေဆိုတာက ပုံသဏ္ဍန်အရ ဟန်ပြပဲဆိုတာ ၁၉၈၈ခုနှစ် လူထုဖိအားကြောင့် ဖြစ်လာတဲ့ ၁၉၉၀ ရွေးကောက်ပွဲဖြစ်စဥ်မှာလည်း ပြသခဲ့ဖူးတာ သမိုင်းသက်သေပဲဖြစ်တယ်။

ဒီလိုနဲ့ ၁၉၉၀ ရွေးကောက်ပွဲရလဒ်ကို ပစ်ပယ်ပြီး ၁၉၉၃ ဇန်နဝါရီလမှာ အမျိုးသားညီလာခံကျင်းပခဲ့တယ်။ “အနာဂါတ်အမျိုးသားနိုင်ငံရေး ဦးဆောင်အခန်းကဏ္ဍမှာ တပ်မတော်ကဦးဆောင်ရမယ်”ဆိုတဲ့ နိုင်ငံရေးရည်ရွယ်ချက်နဲ့ပါ။ ဒါကလည်း ၁၉၆၂ခုနှစ် စစ်တပ်ကြီးစိုးရေးအတွေးအခေါ် သန္ဓေတည်စဉ်က စခဲ့တဲ့ တိုက်စရာရှိတော့စစ်တပ်၊ သေစရာရှိတော့ စစ်သား၊ ပါတီတွေက ပါတီနိုင်ငံရေးပဲလုပ်တာ စစ်တပ်က အမျိုးသားနိုင်ငံရေးလုပ်တာဆိုတဲ့ အတွေးအခေါ်ကို ကိုင်စွဲလို့ ကျင်းပတဲ့အမျိုးသားညီလာခံဖြစ်ခဲ့တယ်။

စစ်တပ်ကြီးစိုးရေးအတွေးအခေါ်ကို အခြေခံတဲ့ ဖွဲ့စည်းပုံရေးဆွဲခဲ့တယ်။ ရွေးကောက်ပွဲအနိုင်ရခဲ့တဲ့ အမျိုးသားဒီမိုကရေစီအဖွဲ့ချုပ်က ၁၉၉၆ခုနှစ်မှာ သပိတ်မှောက်နှုတ်ထွက်တော့ ညောင်နှစ်ပင်အမျိုးသားညီလာခံကြီး ရပ်နားလိုက်ရတယ်။ ၂၀၀၄ခုနှစ်အထိ ၈နှစ်ကြာရပ်နားခဲ့ရတယ်။ နဝတ၊ နအဖရဲ့ ဗိုလ်သန်းရွှေနဲ့ ဗိုလ်မောင်အေးပေါင်းတဲ့ဂိုဏ်းနဲ့ ဗိုလ်ခင်ညွန့်ဂိုဏ်းတို့ အာဏာလုပွဲဖြစ်တော့ အာဆီယံကို လှည့်ပတ်လိမ်ညာထားတဲ့ ဗိုလ်ခင်ညွန့်ရဲ့ လမ်းပြမြေပုံအတိုင်း အမျိုးသားညီလာခံကို ပြန်ကျင်းပတယ်။ ဒီလိုနဲ့ ၂၀၀၇စက်တင်ဘာ၃ရက်မှာ အမျိုးသားညီလာခံကြီးပြီးခဲ့တယ်။ ၁၉၈၈ခုနှစ်က ပြည်သူတွေလိုလား တောင်းတခဲ့တဲ့ ဆန္ဒတွေကိုအမျိုးသားညီလာခံက မပေးနိုင်ခဲ့ဘူး။ ဒီလိုနဲ့ပဲ အထွေထွေစီးပွားရေးအကြပ်အတည်းနဲ့ ၂၀၀၇ သံဃာတော်တွေဦးဆောင်တဲ့ ရွေဝါရောင် တော်လှန်ရေးကြီးဖြစ်ခဲ့ပါတယ်။

ငြိမ်းချမ်းစွာဆန္ဒပြတဲ့ ရဟန်းရှင်လူကျောင်းသားပြည်သူတွေကို စစ်တပ်ပီပီလက်နက်အားကိုးနဲ့ အကြမ်းဖက်နှိမ်နင်းပြန်တယ်။ ဒီတော့ နိုင်ငံတကာရဲ့ ဖိအားတွေထပ်တိုးလာတယ်။ အဲဒါကြောင့် အမျိုးသားညီလာခံက လက်စမသတ်နိုင်သေးတဲ့ ဖွဲ့စည်းပုံကို အတည်ပြုမယ်လို့ ကြေငြာပါတော့တယ်။

မေလ ၂ ရက်နေ့နဲ့ ၃ ရက်နေ့မှာတိုက်ခဲ့တဲ့ နာဂစ်မုန်တိုင်းကြောင့် ထိခိုက်သေကြေခဲ့ရတဲ့ ပြည်သူတွေကို လေးစားရကောင်းမှန်းမသိ၊ ပြည်သူတွေသေဆုံးတာကို ဝမ်းနည်းစိတ်မကောင်းဖြစ်ရကောင်းမှန်း မသိတဲ့စစ်တပ်က နာဂစ်ဖွဲ့စည်းပုံကို အတင်းအကြပ်အတည်ပြုခဲ့ပြီး အဲဒီဖွဲ့စည်းပုံအတိုင်း ၂၀၁၀မှာ စစ်ဘက်ကနေ အရပ်ဖက်ပြောင်းတဲ့ ရွေးကောက်ပွဲကိုကျင်းပတယ်။ ဗိုလ်သိန်းစိန်က ဦးသိန်းစိန်ဖြစ်ခဲ့တယ်။ အဲဒီကာလဟာ နိုင်ငံတကာမှာတော့ တူနီးရှားနိုင်ငံကစတင်တဲ့ အရပ်နွေဦးဆိုတဲ့ လူထုအင်အားနဲ့ အာဏာရှင်စစ်အစိုးရတွေကို ပြောင်းလဲတဲ့ ပြုပြင်ပြောင်းလဲမှုတွေ ပြုလုပ်နေချိန်ဖြစ်ပါတယ်။

၂၀၁၂မှာ နိုင်ငံရေးလုပ်ငန်းစဥ်ကောင်းကောင်းမရှိတဲ့ NLD ဟာ ကြားဖြတ်ရွေးကောက်ပွဲဝင်လိုက်ရတယ်။ ဒီအခင်းအကျင်းကို မြန်မာ့ဒီမိုကရေစီနွေဦးလို့ တင်စားသူတွေလည်းရှိခဲ့တယ်။ဒီလိုနဲ့ ၂၀၁၅မှာ အမျိုးသားဒီမိုကရေစီအဖွဲ့ချုပ်က အပြတ်အသတ်အနိုင်ရခဲ့တယ်။ ပြည်သူတွေ လိုလားခဲ့တဲ့ ဒီမိုကရေစီမျိုးမဟုတ်ဘဲ စစ်တပ်တပိုင်း ဒီမိုကရေစီသာဖြစ်ခဲ့တယ်။ ၂၀၂၀ ရွေးကောက်ပွဲအကြိုကာလမှာ ဗိုလ်မင်းအောင်လှိုင်က “မလုပ်ရဲတာဘာမှမရှိဘူး”လို့ဆိုတယ် အဲဒီစကားကြောင့် ပြည်သူတွေက ကိုဗစ်ကပ်ရောဂါကြားကပဲ မဲတွေထွက်ပေးကြတယ်။ ဒီလိုနဲ့ ၂၀၂၀ ရွေးကောက်ပွဲမှာ အမျိုးသားဒီမိုကရေစီအဖွဲ့ချုပ်အနိုင်ရတော့ စစ်တပ်ရဲ့ အခန်းကဏ္ဍပျောက်ဆုံးမှာကြောက်တဲ့ စစ်တပ်က လက်နက်အားကိုးနဲ့ ထုံးစံအတိုင်း အာဏာသိမ်းပြန်တယ်။ မြန်မာနိုင်ငံမှာ စစ်တပ်က အာဏသိမ်းပြီးတိုင်း ရွေးကောက်ပွဲကျင်းပပေးမယ်လို့ပြောတယ်။ သေချာတာကတော့ ပြည်သူတွေက ရွေးကောက်ပွဲဖြစ်စဥ်ကို လက်မခံတာဟုတ်ပါဘူး စစ်တပ်ကလုပ်ခဲ့တဲ့ရွေးကောက်ပွဲကို မယုံကြည်တာပဲဖြစ်တယ်။

လေကြောင်းတိုက်ခိုက်မှုအပါအဝင်တိုက်ပွဲတွေအပြင်းအထန်ဖြစ်နေချိန်၊ ရေဘေး၊ ငလျင်ဘေးလို သဘာဝဘေးတွေကြုံနေချိန် တိုင်းပြည်ရဲ့တဝက်လောက်ပဲ ထိန်းချုပ်နိုင်တဲ့ စစ်တပ်က ပြည်သူတွေအော့နှလုံးနာနေတဲ့ စစ်တပ်က အခုတခါ ရွေးကောက်ပွဲလုပ်ပြီး ဖက်ဒရယ်ဒီမိုကရေစီဖော်ဆောင်ပေးမယ်လို့ဆိုနေပြန်ပါတယ်။

စစ်မှူးငယ် ရေးသားသည်။

(ပြီးခဲ့တဲ့ ဇူလိုင်လ ၃၁ ရက်နေ့မှာ အာဏာသိမ်းစစ်တပ်ရဲ့ နေပြည်တော်အစိုးရဟာ သူတို့ရဲ့ နောက်ထပ်ခြေလှမ်းတွေကို စတင်ဖို့ ထုတ်ပြန်ခဲ့ပါတယ်။ The Nation Voice ပရိသတ်တွေ အနေနဲ့ စစ်အာဏာရှင်ရဲ့ ခြေလှမ်းတွေကို သိရှိထားနိုင်ဖို့ စုစည်းဖော်ပြလိုက်ပါတယ်)

နိုင်ငံတော်စီမံအုပ်ချုပ်ရေးကောင်စီ(နစက) မှသည် နိုင်ငံတော်လုံခြုံရေးနှင့် အေးချမ်းသာယာရေးကော်မရှင်(နလအ) ဆီသို့
****************************

၂၀၂၁ ခုနှစ် ဖေဖော်ဝါရီလမှာ အာဏာသိမ်းစစ်‌ခေါင်းဆောင် ဗိုလ်ချုပ်မှူးကြီးမင်းအောင်လှိုင်က အမျိုးသားကာကွယ်ရေးနှင့် လုံခြုံရေးကောင်စီ (ကာလုံ) ခေါ်ယူပြီး အာဏာာသုံးရပ်ကို ရယူခဲ့ပါတယ်။ အာဏာရယူပြီး နိုင်ငံတော်စီမံအုပ်ချုပ်ရေးကောင်စီ ဖွဲ့စည်းခဲ့ကာ အာဏာကို လေးနှစ်နဲ့ခြောက်လတိုင်တိုင် ခြောက်လတစ်ကြိမ် သက်တမ်းတိုးခဲ့ပါတယ်။

အခု ၂၀၂၅ ဇူလိုင်လ ၃၁ ရက်နေ့မှာတော့ နိုင်ငံတော်စီမံအုပ်ချုပ်ရေးကောင်စီ(နစက) ကို သက်တမ်းမတိုးတော့ဘဲ အာဏာာသုံးရပ်ကို ကာလုံထံ ပြန်လည်ပေးအပ်ခဲ့ပြီး နစက ကို ကာလုံအစည်းအဝေးကနေ ဖျက်သိမ်းလိုက်ပြီ ဖြစ်ပါတယ်။

၂၀၀၈ ဖွဲ့စည်းပုံအခြေခံ ဥပဒေပုဒ်မ ၄၂၉ အရ အဲဒီလို ဖျက်သိမ်းပြီး ခြောက်လအတွင်းမှာ အထွေထွေရွေးကောက်ပွဲကို ကျင်းပပေးရမှာ ဖြစ်ပါတယ်။ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်(နလအ) အနေနဲ့ ဒီခြောက်လအတွင်းမှာ ဆောင်ရွက်မယ့် ဦးတည်ချက် လေးရပ်ကို လည်း ဇူလိုင်လ ၃၁ ရက်နေ့ကထုတ်ပြန်ခဲ့ပါတယ်။

ပါတီစုံဒီမိုကရေစီ အကောင်အထည်ပေါ်လာရေး၊ စိုက်ပျိုးရေးကဏ္ဍမြှင့်တင်ရေး ၊ပညာရေးနဲ့ ကျန်းမာရေး မြှင့်တင်ရေးနဲ့ ရွေးကောက်ပွဲလုပ်ငန်းစဉ် တွေ အောင်မြင်ရေး စတာတွေနဲ့ ပတ်သက်တဲ့ လေးချက်ကို ထုတ်ပြန်ထားပါတယ်။

အထွေထွေရွေးကောက်ပွဲကျင်းပပြီး နောက် ဥပဒေပြုရေး၊ အုပ်ချုပ်ရေးနှင့် တရားစီရင်ရေးအဖွဲ့အစည်းများ ဖွဲ့စည်းပြီးသည်အထိ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်(နလအ) က တာဝန်ယူသွားမယ်လို့ ထုတ်ပြန်ပါတယ်။

နစက ဥက္ကဌ ဗိုလ်ချုပ်မှူးကြီး မင်းအောင်လှိုင် မှသည် ကော်မရှင်ဥက္ကဌ၊ ယာယီသမ္မတ ဆီသို့ ********************************************

ဇူလိုင်လ ၃၁ ရက်နေ့မှာ ကျင်းပတဲ့ ကာလုံအစည်းအဝေးအရ စစ်ကောင်စီကို ဖျက်သိမ်းပြီး နိုင်ငံတော်လုံခြုံရေးနှင့် အေးချမ်းသာယာရေးကော်မရှင် အသစ်ကို ဖွဲ့စည်းခဲ့ပါတယ်။

ရွေးကောက်ပွဲကျင်းပနိုင်ရေးနဲ့ ကြားကာလ အုပ်ချုပ်ရေးအတွက် အဲဒီကော်မရှင်ကို ၁၀ ဦးနဲ့ ဖွဲ့စည်းခဲ့တာ ဖြစ်ပါတယ်။ နိုင်ငံတော်စီမံအုပ်ချုပ်ရေးကောင်စီ(နစက) မှာ ဥက္ကဌ တာဝန်ယူခဲ့တဲ့ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပဲ ကော်မရှင်ဥက္ကဋ္ဌရာထူးနဲ့ ယာယီသမ္မတ အဖြစ် ဆက်လက် ဆောင်ရွက်သွားမှာပါ။

အခုအသစ် ဖွဲ့စည်းလိုက်တဲ့ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် မှာ အရင် နိုင်ငံတော်စီမံအုပ်ချုပ်ရေးကောင်စီ (နစက)မှာ တဝန်ယူခဲ့သူ အချို့ ပြန်လည်ပါဝင်ခဲ့ပါတယ်။ တစ်ချို့ကို စစ်တပ် ရာထူးကနေ အနားပေးပြီး ကောက်မရှင် ထဲမှာ ပြန်လည် ထည့်သွင်းခဲ့တာ ဖြစ်ပါတယ်။ အရင် နစက မှာ ပါခဲ့ပြီး ကော်မရှင်အသစ်မှာ မပါတဲ့ သူတွေကို အမျိုးသားကာကွယ်‌ ရေးနှင့် လုံခြုံရေးကောင်စီ (ကာလုံ) ဗဟိုအကြံပေးအဖွဲ့ ဖွဲ့စည်းပြီး အဲဒီမှာ အဖွဲ့ဝင်အနေနဲ့ ထည့်သွင်းပေးထားပါတယ်။

ကာလုံရုံးအဖွဲ့ အမှုဆောင်ချုပ်အဖြစ် ဦးအောင်လင်းဒွေးကို လည်း ခန့်အပ်ခဲ့ပါတယ်။ အဲဒီကာလုံရုံးအဖွဲ့ ဟာ အခုမှ အသစ် ဖွဲ့စည်းလိုက်တာ ဖြစ်ပါတယ်။ ပြည်ထောင်စုအစိုးရ အဖွဲ့ ကိုဖွဲ့စည်းရာမှာ နိုင်ငံတော် ဝန်ကြီးချုပ်အဖြစ် ဗိုလ်ချုပ်ကြီးရာထူးကနေ အငြိမ်းစား ယူထားတဲ့ ဦးညိုစော က တာဝန်ယူမှာဖြစ်ပြီးတော့ ပြည်ထောင်စုဝန်ကြီးဌာန အတွက် ဝန်ကြီး ၃၁ ဦးကို ခန့်အပ်ခဲ့ပါတယ်။ အဲဒီလို ခန့်အပ်တဲ့မူလ အမိန့်ထုတ်ပြန်ချက်မှာ ပညာရေးဝန်ကြီးဌာန ကျန်နေခဲ့လို့ ထပ်မံ ဖြည့်စွက်ပြီး ထုတ်ပြန်ခဲ့ပါတယ်။ ပြီးတော့ ဝန်ကြီးဌာနတွေအတွက် ဒုဝန်ကြီး ၃၅ ဦး ခန့်အပ်ခဲ့ပါတယ်။

မြို့နယ် ၆၃ ခုကို စစ်အုပ်ချုပ်ရေး အခြေအနေ ကြေညာ ******************************************************

လက်ရှိ အာဏာသိမ်းစစ်တပ်ရဲ့နယ်မြေစိုးမိုးမှု မရှိတဲ့ နယ်မြေတွေထဲက တိုင်းဒေသကြီးနဲ့ ပြည်နယ် ၉ ခုက ၆၃ မြို့နယ်ကို ဇူလိုင်လ ၃၁ ရက်နေ့က စစ်အုပ်ချုပ်ရေး ကြေညာခဲ့ပါတယ်။ အဲဒီလိုကြေညာတဲ့ စာရင်းထဲမှာ ရှမ်းပြည်နယ်က ၁၅ မြို့နယ်၊ ရခိုင်က ၁၄ မြို့နယ် နဲ့ အများဆုံးပါဝင်ပါတယ်။

စစ်ကိုင်းတိုင်းထဲမှာ အင်းတော် ၊ထီးချိုင့်၊ ကောလင်း၊ ပင်လယ်ဘူး ၊ခင်ဦး ၊ဝက်လက်၊ ကနီ၊ ဒီပဲယင်း၊ ပုလဲ စတဲ့ ကိုး မြို့နယ်ပါဝင်ပြီး မကွေးတိုင်းထဲမှာ ဆော ၊ပေါက် ၊မြိုင်၊ ရေစကြိုနဲ့ ထီးလင်း စတဲ့ ၅မြို့နယ် ပါဝင်ပါတယ်။ မန္တလေးတိုင်းထဲမှာဆိုရင် မိုးကုတ်၊ စဉ့်ကူး၊ ငါန်းဇွန် မြို့နယ်တွေ ပါဝင်ပါတယ်။

စစ်အုပ်ချုပ်ရေး ကြေညာခံထားရတဲ့ မြို့နယ်တွေမှာ စစ်ခုံရုံးက အုပ်ချုပ်ရေးနဲ့ တရားစီရင်ရေးကို ဆောင်ရွက်သွားမှာဖြစ်ပါတယ်။ အုပ်ချုပ်ရေးမှာ လုံခြုံရေး၊ လူမှုရေး၊ ကုန်သွယ်ရေးနဲ့ သယ်ယူပို့ဆောင်ရေး ကိစ္စရပ်တွေ ပါဝင်ပြီး တရားစီရင်ရေးမှာ လည်း ပြဌာန်းထားတဲ့ ဥပဒေအရ အမြင့်ဆုံးပြစ်ဒဏ် ပေးနိုင်တဲ့အပြင် နှစ်အကန့်အသတ်မရှိ အလုပ်နဲ့ထောင်ဒဏ် ချမှတ်တာနဲ့ သေဒဏ်အထိချမှတ်နိုင်တယ်လို့ စစ်အုပ်ချုပ်ရေးအမိန့်ထဲမှာ ဖော်ပြထားပါတယ်။ စစ်ခုံရုံးအမိန့်နဲ့ ပတ်သက်လို့ ပြင်ဆင်မှုလျှောက်ချင်ရင်တော့ ၁၅ ရက်အတွင်းမှာ လျှောက်ထားလို့ရတယ်လို့ ပါရှိပါတယ်။
(အထက်မှာဖော်ပြခဲ့တာက အာဏာသိမ်းစစ်တပ်ရဲ့ နိုင်ငံတကာနဲ့ အများပြည်သူထံကိုထုတ်ပြန်တဲ့ ထုတ်ပြန်ချက်က အချက်အလက်များကို ပြန်လည်ဖော်ပြထားခြင်းသာဖြစ်ပါတယ်။ အဆိုပါဒေသတွေမှာ အာဏာသိမ်းစစ်တပ်ရဲ့ လုပ်ကိုင်ဆောင်ရွက်နေတဲ့ ဆိုးရွားလှတဲ့ အခြေအနေတွေကိုတော့ ဒေသခံတွေက လက်တွေ့သိရှိပြီးဖြစ်ပါတယ်)

အာဏာသိမ်းစစ်တပ်က ရွေးကောက်ပွဲကို ဒီဇင်ဘာလအတွင်း ကျင်းပမယ် ***********************************************

နိုင်ငံတော်လုံခြုံရေးနှင့် အေးချမ်းသာယာရေးကော်မရှင်(နလအ)က ရွေးကောက်ပွဲကို လာမယ့် ဒီဇင်ဘာလအတွင်း မှာ ကျင်းပမယ်လို့ထုတ်ပြန်ထားပေမယ့် ရက်အတိအကျကတော့ အခုအချိန်ထိ မပြောသေးပါဘူး။ ရွေးကောက်ပွဲကို တစ်နိုင်ငံလုံး တပြိုင်နက် တစ်ရက်ထဲ ကျင်းပမှာ မဟုတ်ဘဲ ရွေးကောက်ပွဲကို သီးခြားစီ ကျင်းပမှာပါ။ တစ်နေရာနဲ့ တစ်နေရာ ပြုလုပ်တဲ့အချိန် အနည်းဆုံး တစ်ပတ်စီခြားမယ် လို့ နလအ ဥက္ကဌမင်းအောင်လှိုင် ကပြောပါတယ်။ မဲပေးတဲ့အခါမှာလည်း မဲပေးစက်တွေ အသုံးပြုသွားမယ်လို့ ဆိုပါတယ်။

မြန်မာအီလက်ထရောနစ်မဲပေးစက် (MEVM) နဲ့ ကိုယ်ပေးချင်တဲ့သူ ဘေးက ခလုပ်ကို နှိပ်လိုက်တာနဲ့ မဲပုံးထဲကို ကိုယ်ပေးလိုက်တဲ့ မဲစာရွက် ကျသွားတာမျိုး ဖြစ်ပါတယ်။ လက်ရှိအချိန်မှာ တနိုင်ငံလုံး မဲဆန္ဒရှင် တစ်သိန်းကျော်ကို သရုပ်ပြ စမ်းသပ်ထားတယ်လို့ ဆိုပါတယ်။ အကြောင်းအမျိုးမျိုးကြောင့် ရွှေ့ပြောင်းနေထိုင်ရသူတွေ အတွက်လည်း ကြိုတင်မဲဆန္ဒနဲ့ မဲပေးနိုင်ဖို့ စီစဉ်ထားတယ်လို့လည်း ဆိုပါတယ်။

ရွေးကောက်ပွဲ စနစ်နှစ်မျိုးနဲ့ ကျင်းပသွားမယ့် ဒီရွေးကောက်ပွဲကို တိုင်းရင်းသားများနဲ့ ပြည်သူ့လွှတ်တော်ကိုယ်စားလှယ်အတွက် နိုင်သူအကုန်ယူ FPTP စနစ်၊ အမျိုးသားလွှတ်တော် နဲ့တိုင်းဒေသကြီး/ပြည်နယ် လွှတ်တော်ကို ရောနှောထားသော ကိုယ်စားလှယ်အချိုးကျစနစ် (MMP- Mixed Member Proportion System) နဲ့ကျင်းပသွားဖို့ အာဏာသိမ်းစစ်တပ်က ပြင်ဆင်နေပါတယ်။

မြန်မာနိုင်ငံမှာ ကျင်းပခဲ့တဲ့ ပြီးခဲ့တဲ့ရွေးကောက်ပွဲ အားလုံးမှာ First-Past-the-Post (FPTP) နိုင်သူအကုန်ယူ ဆိုတဲ့ စနစ် ကျင်းသုံးခဲ့တာပါ။ နိုင်သူ အကုန်ယူ စနစ်ဆိုတာ မဲဆန္ဒနယ်မှာ ဆန္ဒမဲ အများဆုံးရရှိတဲ့ ကိုယ်စားလှယ်လောင်းက အနိုင်ရရှိတာ ဖြစ်ပါတယ်။ Mixed Member Proportion System ( MMP) ရောနှောထားသော ကိုယ်စားလှယ်အချိုးကျစနစ် ဆိုတာ မဲပေးထားတဲ့ ဆန္ဒမဲ အရေအတွက်ကို မတူညီတဲ့ စနစ် နှစ်ခုနဲ့ ဆုံးဖြတ်တာ ဖြစ်ပါတယ်။ ပါတီတစ်ခုက တစ်နိုင်ငံလုံး ဒါမှမဟုတ် မဲဆန္ဒနယ် တစ်ခု မှာ ဆန္ဒမဲ‌အရေအတွက် ရာခိုင်နှုန်း တစ်ခု ရရှိထားသော်လည်း ကိုယ်စားလှယ်နေရာ အတွက် အနိုင်မရရှိတဲ့အခါမှာ ရရှိထားတဲ့ မဲအရေအတွက်နဲ့ လွှတ်တော်ကိုယ်စားလှယ် ပါဝင်ခွင့်ရရှိတာမျိုး ဖြစ်ပါတယ်။

နိုင်ငံတော်စီမံအုပ်ချုပ်ရေးကောင်စီ မဖျက်သိမ်းမီ ရွေးကောက်ပွဲကာကွယ်ရေး ဥပဒေ ပြဌာန်း ***************************************************

သေဒဏ်အထိ ချမှတ်နိုင်တဲ့ ရွေးကောက်ပွဲကာကွယ်ရေးဥပဒေ ကို ဇူလိုင်လ ၂၉ ရက်နေ့က နိုင်ငံတော်စီမံအုပ်ချုပ်ရေးကောင်စီ ကထုတ်ပြန် ခဲ့ပါတယ်။ ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ ဆိုပြီး တော့ ထုတ်ပြန်ခဲ့တာဖြစ်ပါတယ်။ အဲဒီဥပဒေထဲက ပြစ်မှုတစ်ခုခု ကျူးလွန်ပြီး လူသေဆုံးစေခဲ့မယ်ဆိုရင် သေဒဏ်ချမှတ် နိုင်တယ်လို့ ပါရှိပါတယ်။

အဲဒီဥပဒေထဲမှာ မဲဆန္ဒရှင် တစ်ဦးဦးကို မဲမပေးနိုင်အောင် ခြိမ်းခြောက်တာ၊ ဟန့်တားတာ ၊ မလျော်ဩဇာကို တိုက်ရိုက်ဖြစ်စေ၊ သွယ်ဝိုက်ပြီး ဖြစ်စေ ပြုလုပ်မယ်ဆိုရင် ထောင်ဒဏ် ၁၅ နှစ်ကနေ ထောင်ဒဏ် တစ်သက် ချမှတ်နိုင်တယ်လို့ ပါရှိပါတယ်။ အဲဒီဥပဒေ မှာ တားမြစ်ချက် ခုနှစ်ခု ပါဝင်ပါတယ်။ ဒီဥပဒေ ဟာ လူ့အခွင့်အရေးစံနှုန်းတွေ ချိုးဖောက်ပြီး ပြဌာန်းထားတဲ့ ဥပဒေ လို့ ကျွမ်းကျင်သူတွေက သုံးသပ်ထားပါတယ်။

ဒါ့အပြင် ယခင် ပြဌာန်းထားတဲ့ ရွေးကောက်ပွဲနဲ့ ဆိုင်တဲ့ ဥပဒေ တွေကိုလည်း အာဏာသိမ်းစစ်တပ်က ဖြည့်စွက်ပြင်ဆင်ခဲ့ပါသေးတယ်။ ပြည်သူ့လွှတ်တော်ရွေးကောက်ပွဲဥပဒေ၊ တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော် ရွေးကောက်ပွဲဥပဒေနဲ့ အမျိုးသားလွှတ်တော် ရွေးကောက်ပွဲဥပဒေတွေကို ဇူလိုင် ၂၉ ရက်နေ့က ပြင်ဆင်ခဲ့ပါတယ်။ အဲဒီထဲမှာ လွှတ်တော်ကိုယ်စားလှယ်လောင်းက အခြေခံပညာအထက်တန်းအဆင့် အောင်မြင်သူ ဖြစ်ရမယ်ဆိုတဲ့ အချက်တွေအပြင် ကြိုတင်မဲ ပေးတာနဲ့ ပတ်သက်လို့ နေရပ်စွန့်ခွာနေရတဲ့ မဲဆန္ဒရှင်တွေက ကိုယ့်ရဲ့ မဲစာရင်းပါနေတဲ့ မဲဆန္ဒနယ်အတွက် ကြိုတင်မဲ ပေးနိုင်တဲ့ အချက်တွေကို ပြင်ဆင်ဖြည့်စွက်ခဲ့ပါတယ်။

ဒါ့အပြင် နိုင်ငံရေးပါတီများ မှတ်ပုံတင်ခြင်းဥပဒေကို ဇူလိုင်လ ၂၈ ရက်နေ့က ပြင်ဆင်ခဲ့ပါသေးတယ်။ ရွေးကောက်ပွဲမှာ မဲမသမာမှုနဲ့ တရားမဲ့ကျူးလွန်တယ်လို့ ကော်မရှင်က တွေ့ရှိရင် ပါတီအဖြစ်ကနေ ဆက်လက်ရပ်တည်ခွင့်မရှိ ဆိုတဲ့အချက်ကိုပြင်ဆင်ခဲ့ပါတယ်။

ဆိုက်ဘာ လုံခြုံရေး ဥပဒေ ဇူလိုင်လ ၃၀ ရက်ကစပြီး အသက်ဝင် ***********************************************

အခုနှစ်ဆန်းပိုင်း ဇန်နဝါရီလက ထုတ်ပြန်ထားတဲ့ ဆိုက်ဘာလုံခြုံရေးဥပဒေကို ဇူလိုင်လ ၃၀ ရက်နေ့က စပြီး ကျင့်သုံးပြီလို့ နိုင်ငံတော်စီမံအုပ်ချုပ်ရေးကောင်စီက ဇူလိုင်လ ၃၀ ရက် ရက်စွဲနဲ့ ထုတ်ပြန်ခဲ့တယ်။ စကစ မဖျက်သိမ်းမီ တစ်ရက်အလိုမှာ ထုတ်ပြန်ခဲ့တာဖြစ်ပါတယ်။

မြန်မာနိုင်ငံမှာ သတင်းအချက်အလက် စီးဆင်းတာများတဲ့ ဖေ့စ်ဘွတ်ခ်လူမှုကွန်ရက်လို လူသုံးများတဲ့ ဒီဂျစ်တယ်ပလက်ဖောင်းတွေကို ပြည်တွင်းမှာ ထိန်းချုပ်ခွင့်နဲ့ ပိတ်သိမ်းခွင့်တွေ အပြင် ဖေ့စ်ဘွတ်ခ်၊ ယူကျုနဲ့ တစ်တော့ခ်တို့လို ဒီဂျစ်တယ် ပလက်ဖောင်းတွေအနေနဲ့ အာဏာသိမ်းစစ်တပ်ထံမှာ မှတ်ပုံတင်ရမှာ ဖြစ်ပါတယ်။

အဲဒီဥပဒေထဲမှာ VPN အသုံးပြုမှု ကန့်သတ်ထားတာတွေလည်း ပါဝင်ပါတယ်။ စစ်ဘက်ဆိုင်ရာ လျှို့ဝှက်ချက်များ ထိန်းသိမ်းကာကွယ်ခြင်းဥပဒေ ကိုလည်း ဇူလိုင်လ ၂၈ ရက်နေ့က ပြဌာန်းခဲ့ပါတယ်။

ကံ့ကော် ရေးသားသည်။