ဇူလိုင် ၃၀
မကွေးတိုင်း၊ စလင်းမြို့နယ်၊ တညောင်တိုက်နယ်က တညောင်ရဲစခန်းကို စလင်းမြို့နယ်ပြည်သူ့ကာကွယ်ရေးအဖွဲ့က မီးရှို့နိုင်ခဲ့တယ်လို့ ထုတ်ပြန်ထားပါတယ်။
ဇူလိုင်လ ၃၀ရက်၊ မနက် ၄နာရီ မိနစ် ၅၀မှာ စလင်းပကဖက တညောင်ရဲစခန်းကို ဝင်ရောက်တိုက်ခိုက်ခဲ့တယ်လို့ သိရပါတယ်။
အာဏာသိမ်းစစ်တပ်ရဲ့ ကင်းဘန်ကာတွေကို အပြီးသတ်တိုက်ခိုက်နိုင်ခဲ့ပြီး တညောင်ရဲစခန်ကို မီးရှို့ဖျက်ဆီးနိုင်ခဲ့တယ်လို့ ထုတ်ပြန်ထားပါတယ်။
အဲဒီတိုက်ပွဲအတွင်း အာဏာသိမ်းစစ်တပ်အဖွဲ့ဝင် ရဲ ရှစ်ဦးသေဆုံးပြီး နှစ်ဦးလက်နက်ချအဖမ်းခံခဲ့ကာ ရဲမိသားစုဝင်တွေကိုတော့ ဖမ်းဆီးထိန်းသိမ်းထားထားတယ်လို့သိရပါတယ်။
ကျန်တဲ့ ရဲတွေကတော့ မြို့လှနဲ့ထန်းနှစ်ပင်ကြားက တညောင်လျှပ်စစ်ဓာတ်အားခွဲရုံကို ထွက်ပြေးသွားခဲ့တယ်လို့ ထုတ်ပြန်ချက်အရသိရပါတယ်။
ဒါ့အပြင် အာဏာသိမ်းစစ်တပ်ဆီက G-3 သေနတ်ငါးလက်၊ Ma 13 သေနတ်တစ်လက်နဲ့ ကျည်တွေသိမ်းဆည်းရမိခဲ့ပြီး စလင်းမြို့နယ်ပြည်သူ့ကာကွယ်ရေးအဖွဲ့က ရဲဘော်တွေ ဘေးကင်းတယ်လို့ သိရပါတယ်။
တညောင်ရဲစခန်းတိုက်ခိုက်မှုပြီးတဲ့နောက် မနက် ၈နာရီ ၂၃မိနစ်မှာ အာဏာသိမ်းစစ်တပ်က ဂျက်ဖိုက်တာနဲ့ သုံးကြိမ်ပစ်ခတ်တိုက်ခိုက်ခဲ့တယ်လို့ စလင်းမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။
ငြိမ်း ရေးသားသည်။
