ဇူလိုင် ၃၀
စလင်းမြို့နယ်၊ တညောင်တိုင်နယ်၊ တညောင်ရဲစခန်းက ရဲတွေဟာ အလင်းမဝင်တာကြောင့် တညောင်စခန်းသိမ်းဖို့ ဆုံးဖြတ်လိုက်ရတာလို့ စလင်းမြို့နယ်ပြည်သူ့ကာကွယ်ရေးအဖွဲ့ရဲ့ ဇုန် ၃တာဝန်ခံက The Nation Voice ကိုပြောပါတယ်။
“အလင်းဝင်ဖို့ အချိန်ပေးထားတာကြာနေပြီ။ အလင်းမဝင်တာနဲ့ စခန်းသိမ်းဖို့ ဆုံးဖြတ်လိုက်ရတာပေါ့။ တညောင်အနီးတဝိုက်က ပြည်သူတွေကတော့ ပျော်တာပေါ့။ သူတို့ရှိတော့ ကျီးလန့်စာစားဘဝမျိုးနဲ့ နေရတာကိုး။ EPCက စခတွေ နယ်မြေကျဉ်းသွားစေတယ်။ ကားသမားတွေ ဆက်ကြေးပေးရတဲ့ ဒုက္ခလွတ်သွားစေတယ်” လို့ ဇုန် ၃တာဝန်ခံက ဆက်ပြောပါတယ်။
စလင်းမြို့နယ်က ဆင်ဖြူကျွန်း- တညောင်လမ်းပိုင်းမှာ အာဏာသိမ်းစစ်တပ်အထိုင်ချရာနေရာတွေဖြစ်တဲ့ တညောင်စခန်းနဲ့ တညောင် EPCတို့ကို ဒီနေ့ ဇူလိုင်လ ၃၀ရက် မနက်မှာ တပြိုင်တည်း စလင်းပကဖက တိုက်ခိုက်ခဲ့တာပါ။
“ စဝင်ထဲက တညောင်စခန်းကို မီးရှို့နိုင်တာ၊ ။ အဆင့်မှီဘန်ကာ လေးခု အုတ်ဘန်ကာပေါ့။ အခြားဘန်ကာ ငါးခုလောက်။ဘန်ကာတစ်ခုက တော်တော်ကြာသွားတာ RPGသုံးမှရတော့တာ။ ကျန်တာတွေက တစ်နာရီအတွင်း သိမ်းမိတယ်” လို့ ဇုန် ၃တာဝန်ခံကပြောပါတယ်။
မကွေးလေတပ်ကနေ တိုက်ပွဲဖြစ်ပွားရာ တညောင်ရဲစခန်းကို လေယာဉ်နဲ့လာရင် ငါးမိနစ်သာဝန်းကျင်သာရှိပေမယ့် ၃နာရီကြာတိုက်ပွဲဖြစ်ပြီးမှာသာ အာဏာသိမ်းစစ်တပ်က လေကြောင်းပစ်ကူ သုံးကြိမ် ပေးခဲ့တာလို့ ဆိုပါတယ်။
ရဲအင်အား ၁၁ဦးရှိတဲ့ တညောင်ရဲစခန်းကိုတိုက်ခိုက်ခဲ့ရာမှာ ရှစ်ဦးသေဆုံးပြီး၊ နှစ်ဦးလက်နက်ချကာ တစ်ဦးကတော့ ထန်းနှစ်ပင်နဲ့ မြို့လှရွာကြားက တညောင် EPC ကိုထွက်ပြေးသွားတယ်လို့သိရပါတယ်။ တညောင်ရဲစခန်းကို မီးရှို့နိုင်ခဲ့ပြီး အာဏာသိမ်းစစ်တပ်ဆီက G-3 သေနတ်ငါးလက်၊ Ma 13 သေနတ်တစ်လက်နဲ့ ကျည်တွေသိမ်းဆည်းရမိခဲ့ပါတယ်။
ရဲမိသားစုဝင်ကိုယ်ဝန်ဆောင် အမျိုးသမီးနဲ့ အသက် ၈နှစ်အရွယ်ကလေးတစ်ဦးကို စလင်းပကဖက ထိန်းသိမ်းထားပြီး ၈နှစ်အရွယ်ကလေးတစ်ဦးက ပေါင်မှာကျည်ရှပ်ထိထားတာကြောင့် ဆေးကုသပေးနေတယ်လို့ဆိုပါတယ်။
တညောင်ရဲစခန်းနဲ့ မြေပြင်အကွာအဝေး ငါးမိနစ်သာ ဝေးတဲ့ တညောင် EPCကိုလည်း စလင်းပကဖက တပြိုင်နက်တည်း စစ်ကူမလာအောင် တိုက်ခိုက်ခဲ့တယ်လို့သိရပါတယ်။
“EPC ရော တပြိုင်တည်းပစ်တာ။ EPCကို ၆၀ မမ၊ ၈၁ မမတွေ အလုံး သုံးဆယ်ကျော်ပစ်ခဲ့တယ်။ EPCက အထိခိုက်မသိရသေးဘူး” လို့ ဇုန် ၃တာဝန်ခံကပြောပါတယ်။
နေ့လယ် ၁၂နာရီ ဝန်းကျင်လောက်မှာ ဆိပ်ဖြူမြို့နယ်ဘက်က လာတဲ့ ကား ခုနစ်စီးပါ အာဏာသိမ်းစစ်တပ် စစ်ကြောင်းကတော့ တညောင်ရွာအနီးမှာ ရှိသေးတယ်လို့သိရပါတယ်။
ငြိမ်း ရေးသားသည်။
