နိုဝင်ဘာ ၁၅၊ ၂ဝ၂၄

* ရွှေဘိုမှာ ကင်းလှည့်နေတဲ့စစ်အုပ်စုက ပစ်ခတ်လို့ အမျိုးသား ၂ ဦးသေဆုံး (အသက် ၂၆ နှစ်နဲ့ အသက် ၆၀ ကျော်အရွယ်)။

နိုဝင်ဘာ ၁၆

* ကန့်ဘလူမြို့နယ်နဲ့ ကျွန်းလှမြို့နယ်ကို အာဏာသိမ်းစစ်တပ်က လေကြောင်းတိုက်ခိုက်ခဲ့လို့ ကန့်ဘလူမြို့နယ်၊ အလယ်ခုံရွာက အသက် ၇၅ နှစ်အရွယ် အမျိုးသားတစ်ဦး သေဆုံးကာ နေအိမ်နှစ်လုံးပျက်စီး ခဲ့ပြီး ကျွန်းလှမြို့နယ်က နေအိမ်သုံးလုံး မီး လောင်ပျက်စီး။

* ကျွန်းလှမြို့နယ်၊ ရွာကုန်းကြီးကျေးရွာ နေအိမ်သုံးလုံးနဲ့ ကျွန်းလှမြို့နယ်မှာ စစ်တပ်က ဗုံးကြဲလို့ နေအိမ် ၅ လုံး ပျက်စီးပြီး အမျိုးသား ၁ ဦး ဒဏ်ရာရ။

* ပုလဲမြို့သိမ်းတိုက်ပွဲအတွင်း သုံ့ပန်း ၂၅ ဦးဖမ်းမိပြီး လက်နက် ၂၁ လက်နဲ့ ခဲယမ်း တွေသိမ်းဆည်းရရှိကြောင်း BNRA ထုတ်ပြန်။

* စစ်ကိုင်းတိုင်း၊ တန့်ဆည်မြို့နယ်နဲ့ ရေ ဦးမြို့နယ်ထဲကို ဦးဝသဝရဲ့ လက်အောက်ခံ ပျူစောထီးနဲ့ စစ်သားအင်အား ၁၈ဝ ခန့် ပါ စစ်ကြောင်း ဝင်ရောက်လာတာကြောင့် အရပ်သားပြည်သူ ငါးထောင်ကျော် ဘေးလွတ်ရာတွေဆီကို ထွက်ပြေးတိမ်းရှောင်နေ။

နိုဝင်ဘာ ၁၇

* မန္တလေးတိုင်း၊ မတ္တရာမြို့နယ်အနောက်ခြမ်း၊ ဆောက်ခြုံပေါက်ရွာမှာ နိုဝင်ဘာလ ၁၇ ရက် မနက်ပိုင်းက အာဏာသိမ်းစစ်တပ် နဲ့ တိုက်ပွဲဖြစ်ပွားခဲ့ပြီး အာဏာသိမ်းစစ်တပ် အဖွဲ့ဝင် ၁၂ ဦး သေဆုံးကာ လက်နက် ကိုးလက် သိမ်းဆည်းရမိ။

* အာဏာသိမ်းစစ်တပ်က လေကြောင်းပစ်ကူအမြောက်မြားပေးခဲ့တဲ့ ပုလဲမြို့သိမ်း တိုက်ပွဲအတွင်း BNRA တပ်ဖွဲ့ဝင် ၉ ဦး သေဆုံးပြီး ၁၀ ဦး ဒဏ်ရာရသလို မဟာမိတ် GZA က ရဲဘော်တစ်ဦးလည်း ဒဏ်ရာရရှိ။

* စစ်ကိုင်းတိုင်း၊ ချောင်းဦးမြို့နယ်မှာ ခရီး သွားကားနဲ့ ဆိုင်ကယ်တွေကို ဆက်ကြေး ကောက်နေတဲ့ အာဏာသိမ်းစစ်တပ်အဖွဲ့ဝင် တွေတိုက်ခိုက်ခံရလို့ လေးဦး သေဆုံး။

နိုဝင်ဘာ ၁၈

* ကန့်ဘလူမြို့နယ် ရွှေဘို-မြစ်ကြီးနား ကားလမ်းပေါ် သွားလာနေတဲ့ ခရီးသွားယာဉ် တစ်စီးကို အာဏာသိမ်းစစ်တပ်က ဒရုန်းနဲ့ ဗုံးသီးချတိုက်ခိုက်လို့ ကားထဲရှိ ဘုန်းကြီးတစ်ပါးအပါအဝင် ပြည်သူလေးဦး ဗုံးထိမှန် သေဆုံး။

နိုဝင်ဘာ ၁၉

* စစ်ကိုင်းတိုင်း၊ ကန့်ဘလူမြို့နယ်၊ လင်ဗန်းဆည်မှာ လှေသုံးစီးနဲ့ ငါးမျိုးလာ ဖော်တဲ့ အာဏာသိမ်းစစ်တပ် အဖွဲ့ဝင်တွေကို တိုက်ခိုက်ခဲ့လို့ လှေတစ်စီးရေထဲမြှုပ်သွား။

* စစ်ကိုင်းတိုင်း၊ မုံရွာမြို့နယ်၊ နိဗ္ဗာန်ဝ ကျေးရွာအနီးမှာရှိတဲ့ မုံရွာခရိုင် အမှတ်(၁၁) တပ်ရင်းရဲ့ ရှေ့တန်းစခန်းနှစ်ခုကို အာဏာသိမ်းစစ်တပ်က ဝင်ရောက်စီးနင်းပြီး အနီးနားပတ်ဝန်းကျင်က အမျိုးသမီးတစ်ဦးနဲ့ အမျိုးသား သုံးဦးကို PDF လို့ စွပ်စွဲဖမ်းဆီး။

နိုဝင်ဘာ ၂ဝ

* စစ်ကိုင်းတိုင်း၊ ရေဦးမြို့နယ်မှာ အာဏာသိမ်းစစ်တပ်က စစ်ကြောင်းထိုးပြီး ငါးရက်အတွင်း ရေဦးမြို့နယ်က ရွာခုနှစ်ရွာနဲ့ တန့် ဆည်မြို့နယ်ထဲက ရွာတစ်ရွာ စုစုပေါင်း ရွာ ရှစ်ရွာကို မီးရှို့ခဲ့တာကြောင့် နေအိမ် ၂၆ဝ ကျော် မီးလောင်ပျက်စီးခဲ့ပြီး ဆီဆုံရွာက အသက် ၄၈ နှစ်အရွယ် အမျိုးသမီးတစ်ဦးလည်း အရှင်လတ်လတ် မီးရှို့သတ်ဖြတ်ခံရ။

နိုဝင်ဘာ ၂၁

* မုံရွာမှာ အဝေးသင်လာရတက်နေတဲ့ ကျောင်းသားတွေကိုပါ စစ်မှုထမ်းဖို့အတွက် ဖမ်းဆီး။

နိုဝင်ဘာ ၂၂

* စစ်ကိုင်းတိုင်း၊ ရေဦးမြို့ပေါ်က စစ်တပ် လက်အောက်ခံ အထွေထွေအုပ်ချုပ်ရေးမှူးရုံးမှာ ကျင်းပပြုလုပ်တဲ့ ပျူစောထီးသင်တန်းဆင်းပွဲကို ဒရုန်းဗုံးသီး ကိုးလုံး ကြဲချတိုက်ခိုက်ခဲ့ရာမှာ စစ်တပ်ဘက်က လေးဦး သေဆုံး။

* အာဏာသိမ်းစစ်တပ်နဲ့ ပျူပူးပေါင်း အဖွဲ့ရဲ့ မီးရှို့ဖျက်ဆီးမှုကြောင့် ရွှေဘိုမြို့နယ်၊ နှမစားရစ်ကျေးရွာက နေအိမ် ၂ လုံး မီးလောင်ပျက်စီး။

နိုဝင်ဘာ၂၃

* ပစ္စတိုသေနတ်တွေကိုင်ဆောင်ထား တဲ့ အမျိုးသားခြောက်ဦးက မုံရွာမြို့၊ နန္ဒဝန်ရပ်ကွက်မှာရှိတဲ့ လူနေအိမ်တစ်အိမ်က ကလစ်ဆိုင်ကယ်တစ်စီး၊ စကူပီဆိုင်ကယ်တစ်စီးနဲ့ ပိုက်ဆံနှစ်သိန်းအပြင် အိမ်ရှင်ကို လာကူတဲ့ ဘေးအိမ်ကအမျိုးသမီးရဲ့ဖုန်းကိုပါ လုယက်သွား။

* ကန့်ဘလူမြို့နယ်၊ ဇီးကုန်းမြို့၊ လက်ဆည်ရပ်ကွက်မှာ လူတွေ့ရင် သေနတ်နဲ့ ပစ်မယ်လို့ ခြိမ်းခြောက်ပြီး အာဏာသိမ်းစစ်တပ်က ပြည်သူတွေနဲ့ ရဟန်းသံဃာတွေကို ရပ်ကွက်ထဲကထွက်ခွာခိုင်း။

နိုဝင်ဘာ ၂၅

* မုံရွာမြို့ပေါ်က လူနေအိမ်တွေကို အာဏာသိမ်းစစ်တပ်က မီတာပြေစာ ရှိမရှိစစ်ဆေးပြီး မီတာဖြတ်ပိုင်းပြေစာမပြနိုင်တဲ့ အိမ်တွေက မီးတာကြိုးတွေကိုဖြုတ်ယူ။

နိုဝင်ဘာ၂၆

* ကလေးမြို့နယ်၊ လက်ပံချောင်းရွာ ကို အာဏာသိမ်းစစ်တပ်က လက်နက်ကြီးနဲ့ ပစ်ခတ်ခဲ့လို့ အသက် ၁၄နှစ်အရွယ် ကလေးတစ်ဦး၊ အသက် ၂၅နှစ်အရွယ် မိန်းကလေးတစ်ဦး၊ အသက် ၅၄နှစ်အရွယ် စတိုးဆိုင်ပိုင်ရှင်အမျိုးသမီးတစ်ဦးနဲ့ အသက် ၆၅နှစ်အရွယ် အမျိုးသားတစ်ဦးသေဆုံး။

နိုဝင်ဘာ၂၇

* ကျွန်းလှမြို့နယ်ထဲကို အာဏာသိမ်းစစ်တပ်က စစ်ကြောင်းထိုးလို့ ကျေးရွာ ၁ဝ ရွာလောက်က ဒေသခံပြည်သူ တစ်သောင်းကျော်စစ်ဘေးရှောင်နေရ၊ ကုက္ကိုလ်ကုန်းရွာ၊ မတောင်ရွာ၊ လွှတ်တိုက်ရွာနဲ့ ဆွဲလှဲရွာတွေကို မီးရှို့တဲ့အပြင် ဒရုန်းနဲ့ဗုံးသီးချတာ၊ ဟောင်ဝှစ် ဟာတွေနဲ့ ပစ်ခတ်နေ။

စစ်ကောင်စီရဲ့တပ်စခန်းတွေ၊ မြို့တွေနဲ့ နယ်မြေအများအပြားကို ပြီးခဲ့တဲ့ တစ်နှစ်တာအတွင်း တိုက်ခိုက် သိမ်းယူနိုင်ခဲ့တဲ့ TNLA တပ်မတော်နဲ့ ၄င်းအဖွဲ့ ရဲ့ နိုင်ငံရေးပါတီဖြစ်တဲ့ ပလောင်ပြည်နယ် လွတ်မြောက်ရေးတပ်ဦး PSLF တို့က လက်ရှိဖြစ်ပွားနေတဲ့ တိုက်ပွဲတွေ လေကြောင်းတိုက်ခိုက်ခံရမှု တွေနဲ့ပတ်သက်လို့ ထုတ်ပြန်ချက်တစ်စောင်ကို နိုဝင်ဘာ ၂၅ ရက်နေ့ နေ့စွဲ နဲ့ ထုတ်ပြန် လိုက်ပါတယ်။

ဒီထုတ်ပြန်ချက်မှာ စစ်ပွဲတွေ၊ အထူးသဖြင့် စစ်ကောင်စီရဲ့ လေကြောင်းတိုက်ခိုက်မှုတွေကြောင့် ဒေသခံလူထုခံစားနေရတဲ့ ဘေးဒုက္ခတွေကို ငဲ့ညှာထောက်ထားသောအားဖြင့်သော်လည်းကောင်း နယ်စပ်တည်ငြိမ်ရေးနဲ့ တိုက်ပွဲများရပ်စဲရေးအတွက် တရုတ်နိုင်ငံရဲ့ ကြိုးပမ်းမှုကို အသိအမှတ်ပြု တဲ့အနေနဲ့သော်လည်းကောင်း စစ်ကောင်စီနဲ့ တွေ့ဆုံဆွေးနွေးဖို့ အဆင်သင့်ရှိကြောင်း ပါရှိတာဖြစ်ပါတယ်။

ဒီထုတ်ပြန်ချက်က ပြည်တွင်းက တော်လှန်ရေး လက်နက်ကိုင်အင်အားစုတွေ၊ စစ်အာဏာရှင် ပြုတ်ကျရေးအတွက် ကြိုးစားနေကြတဲ့ အဖွဲ့အစည်းတွေနဲ့ လူထုတွေကို အားလျော့စေခဲ့ပါတယ်။ TNLA အနေနဲ့ ဘာကြောင့် အခုလိုကြေညာချက်ကို ထုတ်ပြန်ရသလဲဆိုတာ ခရေစေ့တွင်းကျ မသိနိုင်ပေမယ့်လည်း တရုတ်နိုင်ငံနဲ့ ထိစပ်နေတဲ့ ပလောင်ပြည်နယ်စပ်ဒေသမှာ ရိက္ခာ၊ လောင်စာဆီနဲ့ ဆေးဝါးတွေအပါအဝင် ဝယ်ယူတင်သွင်းမှု တရုတ်နိုင်ငံဘက်က ပိတ်ပင်လိုက်တဲ့ အကျိုးဆက်တရပ်အနေနဲ့ အခုလို ကြေညာချက်ထုတ်ပြန်ရတာလို့တော့ အများက နားလည်နေကြတာပါ။

၁ဝ၂၇ စစ်ဆင်ရေးဟာ ရှမ်းမြောက်ဒေသရဲ့ နယ်မြေသိမ်းယူတဲ့ တိုက်ပွဲသက်သက်ဆိုတာထက် စစ်ကောင်စီရဲ့ တပ်စခန်းတွေ၊ မြို့တွေ၊ နယ်စပ်ကုန်သွယ်ရေး စခန်းတွေ သာမက တိုင်းစစ်ဌာနချုပ် တစ်ခုကိုပါ ဆယ်စုနှစ်များစွာအတွင်း ပထမဆုံး အနေနဲ့ သိမ်းယူနိုင်ခဲ့တာဖြစ်လို့ မြန်မာ့နိုင်ငံ ရေးအာဏာကို ဆယ်စုနှစ်များစွာချုပ်ကိုင်လာခဲ့တဲ့ စစ်တပ်ပြိုလဲမှုရဲ့ နိဒါန်းအဖြစ် မျှော် လင့်နေကြတာလည်း ဖြစ်ပါတယ်။ ဒီလိုမျှော်လင့်ချက်နဲ့ မိုင်ရာနဲ့ချီကွာဝေးတဲ့ မြန်မာနိုင်ငံ အလယ်ပိုင်းနဲ့ တောင်ပိုင်းက တပ်အင်အားစု အချို့ပါ ပူးပေါင်းကာ တိုက်ခိုက်ခဲ့ကြတာဖြစ်လို့ အခုလောက်ထိ အရေအတွက်များတဲ့ မြို့တွေ တပ်စခန်းတွေ လက်လွှတ်ဆုံးရှုံးရတဲ့အနေအထားမျိုး စစ်ကောင်စီ ရင်ဆိုင်နေရတာ ဖြစ်ပါတယ်။

မကြာသေးခင်က သတင်းဆောင်းပါး တပုဒ်မှာ ဖေါ်ပြထားခဲ့သလိုပဲ မြန်မာနိုင်ငံ အလယ်ပိုင်းက အင်အားစုတွေ၊ ကရင်နီ ပြည်နယ်က KNDF လို အင်အားစုတွေ၊ နောက် BLPA လို လက်နက်ကိုင်အဖွဲ့တွေ ပူးပေါင်းပါဝင်တဲ့ လားရှိုးမြို့သိမ်းတိုက်ပွဲက စစ်ကောင်စီတပ်နဲ့ တိုင်းရင်းသားလက်နက်ကိုင်၊ PDF တပ်ဖွဲ့ တွေအကြား စစ်ရေးချိန်ခွင်လျှာ အလှည့် အပြောင်းတစ်ခု ဖြစ်စေခဲ့တာပါ။

ဒါကြောင့် ရှမ်းမြောက် တိုက်ပွဲတွေ၊ ၁ဝ၂၇ စစ်ဆင်ရေး ပထမပိုင်းနဲ့ ဒုတိယပိုင်းတို့မှာ သိမ်းယူနိုင်ခဲ့တဲ့ တပ်စခန်းနဲ့ နယ်မြေ ပမာဏတွေထက် စိတ်ဓါတ်ရေးအရ အောင်နိုင်မှုကလည်း အရေးပါတာ ဖြစ်ပါတယ်။ ဒီလိုအခြေအနေမှာ TNLA တပ်ကို တွေ့ဆုံဆွေးနွေးရေး လမ်းကြောင်းပေါ် ရောက်အောင် ဖိအားပေးနိုင် ဆွဲခေါ်နိုင် တဲ့ တရုတ်နိုင်ငံရဲ့ ဖိအားကို လျှော့မတွက်ဖို့ အရေးကြီးပါတယ်။

မကြာသေးခင် ရက်ပိုင်းအတွင်းကလည်း MNDAA လို့ အတိုကောက်ခေါ်ဆိုတဲ့ ကိုးကန့်လက်နက်ကိုင်အဖွဲ့ရဲ့ ခေါင်းဆောင်ဖြစ်သူ ဖုန်တာရွှင်ကို တရုတ်နိုင်ငံ၊ ယူနန်ပြည်နယ်ထဲက မြို့မှာ တရုတ်အစိုးရရဲ့ အကျယ်ချုပ်ချထားတယ် ဆိုတဲ့သတင်းတွေ ပေါ်ထွက်လာခဲ့ပါသေးတယ်။ TNLA အဖွဲ့နဲ့ MNDAA တို့ထက် အင်အားကြီးတဲ့ ဝပြည် သွေးစည်းညီညွတ်ရေးတပ်မတော် UWSA သည်ပင်လျှင် တရုတ်နိုင်ငံကို တည့်တည့်ရင်ဆိုင်နိုင်တဲ့ အခြေအနေမရှိခြင်းကို ကြည့်ရင် ရှမ်းမြောက်ဒေသက တိုင်းရင်းသားလက်နက်ကိုင်အဖွဲ့တွေ အနေနဲ့ တရုတ်ရဲ့ ဖိအားကို ကြံ့ကြံ့ခံနိုင်မှုဟာ အကန့်အသတ်နဲ့ သာဖြစ်တယ်ဆိုတာ ထင်ရှားပါတယ်။

မြန်မာနိုင်ငံ အထက်ပိုင်း (တနည်းအား ဖြင့် အညာဒေသ) က ပြည်သူ့ကာကွယ်ရေး တပ်ဖွဲ့တွေအနေနဲ့ ရှမ်းမြောက်က တိုင်းရင်းသားလက်နက်ကိုင်အဖွဲ့တွေနဲ့ ပူးပေါင်းတာ၊ မဟာမိတ်ဖွဲ့တာ၊ အကူအညီယူတာတွေလုပ်ဆောင်ရမှာ အသေအချာဖြစ်သော်လည်း ရှမ်းမြောက်နဲ့ မြန်မာနိုင်ငံမြောက်ပိုင်းဒေသက တိုင်းရင်းသားလက်နက်ကိုင်အဖွဲ့တွေ အနေနဲ့ မြန်မာနိုင်ငံအလယ်ပိုင်းရဲ့ လွတ်မြောက်ရေး၊ ထိန်းချုပ်နယ်မြေထူထောင်ရေးတို့မှာ ထဲထဲဝင်ဝင်ပါဝင်နိုင်ဖို့မှာ အကန့် အသတ်ရှိနေတယ်ဆိုတာကို သဘောပေါက် ဖို့အရေးကြီးပါတယ်။

မြန်မာနိုင်ငံ အထက်ပိုင်း အညာဒေသ ရဲ့ အောင်မြင်မှုတွေ၊ လွတ်မြောက်နယ်မြေ ထူထောင်ပြီး ခိုင်ခိုင်မာမာ ထိန်းချုပ်ထားနိုင် ရေးတွေမှာ အညာဒေသတွင်းက လက်နက် ကိုင်အဖွဲ့တွေရဲ့ တစုတစည်းတည်း ပူးပေါင်းလှုပ်ရှားနိုင်မှုက အဓိကသော့ချက်ဖြစ်တယ်ဆိုတာကို အခု လတ်တလောအခြေအနေတွေက ညွှန်ပြနေတယ်လို့ဆိုရင် မှားမယ် မထင်ပါဘူး။ အညာဒေသက လက်နက်ကိုင်အဖွဲ့တွေအနေနဲ့ စစ်ရေးအရ ပူးပေါင်းဆောင်ရွက်နိုင်ဖို့ရာမှာ နိုင်ငံရေးအရ အမြင်၊ ဦးတည်ချက် ထပ်တူကျဖို့ အရေးကြီးသလို ဦးတည်ချက်ပန်းတိုင်တူတဲ့ အဖွဲ့ချင်းအကြား မှာ စစ်ရေးအရ အပြည့်အဝပူးပေါင်းဆောင်ရွက်မှုလည်း ရှိရမှာဖြစ်ပြီး ဒါမှလည်း ရှမ်း မြောက်ဒေသလို အရွေ့တစ်ခု ရသည်အထိအညာဒေသကို ပြောင်းလဲစေမှာဖြစ်ပါတယ်။

တင်အောင်မိုး ရေးသားသည်။

ကလေးတို့ရေ မင်္ဂလာပါ။ တစ်ခါတုန်းက အိပ်မက်တိုင်းပြည်ထဲကို ကလေးတွေ ကို ခေါ်ခေါ်သွားတတ်တဲ့ နာနတ်သီး ဆိုတဲ့ စက်ရုပ်လေး ရှိသတဲ့။ နာနတ်သီးစက်ရုပ် ကလေးက အန္တရာယ်များတဲ့ အရာတွေကို သိချင်၊ စမ်းကြည့်ချင်တဲ့ ကလေးတွေရဲ့ အိပ်မက်ထဲကို သွားပြီး အဲဒီကလေးတွေ လုပ်ကြည့်ချင်နေတဲ့ အရာတွေက ဘယ်လောက်တောင် အန္တရာယ်များသလဲဆိုတာကို လက်တွေ့ ပြတတ်တယ်တဲ့။ ဒီလိုပြတော့ ကလေးတော်တော်များများက အန္တရာယ်များတဲ့ အရာတွေအကြောင်းကို သိပြီး အဲဒါတွေကို မလုပ်ဖြစ်ကြတော့ဘူးတဲ့။

ဒီနေ့လည်း နာနတ်သီးစက်ရုပ်ကလေးက ဝါဆိုရဲ့ အိပ်မက်ထဲကို သွားဖို့ သွားဖို့ ပြင်နေပါ တယ်။ ဘာလို့လဲဆိုတော့ ဝါဆိုက အမေပြောပြတဲ့ အန္တရာယ်များတဲ့ လက်နက်တွေကို အမေမသိတဲ့အချိန် သွားပြီးခိုးကြည့်ဖို့ ကြံစည်နေလို့ပါ။ ဒီလိုနဲ့ ဝါဆိုအိပ်တဲ့အချိန် အိပ်မက်ထဲကို နာနတ်သီးစက်ရုပ် ဝင်ရောက် သွားပါတော့တယ်။

အိပ်မက်ထဲမှာ ဝါဆိုက ရွာကလူတွေ သွားနေကျ လမ်းမဟုတ်တဲ့ ချုံတွေထူနေတဲ့ လမ်းကို နာနတ်သီးစက်ရုပ်နဲ့ အတူတူ လျှောက်နေပါတယ်။ သွားနေရင်းနဲ့ ဝါဆိုတို့ ရှေ့မှာ မြေကြီးထဲကနေ အဝိုင်းလေးတစ်ခု မြေပေါ်ကို တဖြည်းဖြည်းပေါ်လာပါတယ်။ အဲဒါကတော့ မြေမြှုပ်မိုင်းပါ။ ရုတ်တရက် မြေမြှုပ်မိုင်းပေါ်လာတော့ ဝါဆိုလည်း လန့် သွားပါတယ်။ နာနတ်သီးစက်ရုပ်က ဝါဆို့ကို မိုင်းအမျိုးအစား ၂ မျိုးအကြောင်းကို ပြောပြ ပါတယ်။

မိုင်းတွေက အရောင်မျိုးစုံ၊ ပုံစံမျိုးစုံရှိပြီးတော့ အမျိုးအစားက လူသတ်မိုင်းနဲ့ ယာဉ် ဖျက်မိုင်းဆိုပြီး ၂ မျိုးရှိတယ် ဝါဆိုရဲ့။ နင်မြင် နေရတဲ့ မိုင်းက လူသတ်မိုင်း။ နောက်တစ်ခု က ကားတွေ ဆိုင်ကယ်တွေကို ဖျက်ဆီးနိုင် အောင် အားပြင်းတဲ့ ယာဉ်ဖျက်မိုင်း

ရှင်းပြရင်းနဲ့ နာနတ်သီးစက်ရုပ်လည်း သူဖန်တီးထားတဲ့ လူပုံစံ စက်ရုပ်လေးကို သူတို့ရှေ့က မြေမြှုပ်မိုင်းကို နင်းခိုင်းလိုက်တယ်။ မြေမြှုပ်မိုင်းကို နင်းလိုက်တာနဲ့ မိုင်းကထပေါက်ပြီး လူပုံစံ စက်ရုပ်ကလေးရဲ့ ခန္ဓာကိုယ်အောက်ပိုင်းတစ်ခုလုံး အပိုင်းပိုင်း ဖြစ်သွားပါတော့တယ်။

အဲဒီကနေ ဆက်သွားတော့ သူတို့ရဲ့ ခြေမျက်စိနားနဲ့ ခြေသလုံးနားလောက် နေရာတွေမှာ သစ်ပင်တစ်ပင်နဲ့ တစ်ပင်ကို ကြိုးလေးတွေ တန်းချီထားတာကို သူတို့တွေ့ လိုက်ရတယ်။

“ဝါဆိုရေ..။ အဲဒါက အစထွက် လူသတ်မိုင်းလို့လည်း ခေါ်တယ်။ တိုက်မိုင်းလို့လည်း ခေါ်တဲ့ မိုင်းပဲ။ အဲဒီကြိုးကို သွားမထိနဲ့နော်။ နာနတ်သီးစက်ရုပ်က ရှင်းပြရင်း နဲ့ လူပုံစက်ရုပ် နောက်တစ်ရုပ်ကို အဲဒီ အစထွက် လူသတ်မိုင်းလို့လည်းခေါ် ပြီး တိုက် မိုင်းလို့လည်း ခေါ်တဲ့ မိုင်းကြိုးကို တိုက်ဆွဲ ခိုင်းလိုက်တယ်။ ကြိုးကို တိုက်ဆွဲလိုက်တဲ့ လူပုံစက်ရုပ်လည်း ခုနကလိုပဲ မိုင်းထပေါက် လို့ စိစိညက်ညက်ကြေသွားတာပေါ့။ အဲဒါကို မြင်ပြီး ဝါဆိုလည်း အရမ်းလန့်သွားတာပေါ့။ ဒီလိုဖြစ်မှာစိုးလို့ အမေက အန္တရာယ်များတဲ့ လက်နက်တွေ ရှိတဲ့နေရာတွေကို မသွားခိုင်းတာဆိုတာကို သိသွားတာပေါ့။

အိပ်မက်ကနေ နိုးလာတာနဲ့ ဝါဆိုလည်း အမေပြောတဲ့အတိုင်း မိုင်းတွေရှိတဲ့၊ အန္တရာယ် များတဲ့ နေရာတွေကို မသွားတော့ဘူး။ အမေ့ ကို မပြောဘဲ၊ အမေမသိဘဲ ဘယ်ကိုမှ မသွား တော့ပါဘူးလို့ ကတိပေးလိုက်သတဲ့။

ဝါဆို (Waso) ရေးသားသည်။

ဂျင် (Jin) သရုပ်ဖော်သည်။

၁။ နွေဦးပလက်ဖောင်းများ

နွေဦးပလက်ဖောင်းတွေဆိုတာ ၂၀၂၁ ဖေဖော်ဝါရီလ ၁ ရက်နေ့နောက်ပိုင်းအာဏသိမ်းမှုအကြောင်းပြုလို့ စတင်ခဲ့တဲ့ နွေဦးတော်လှန်ရေးတိုက်ပွဲတွေအတွင်းမှာ ပေါ်ထွန်းလာတဲ့ ပလက်ဖောင်းတွေဖြစ်ပါတယ်။ ဒီပလက်ဖောင်းတွေဟာ သီးခြားဆီဖြစ်ထွန်းလာတာတွေရှိသလို ပလက်ဖောင်းအသေးတွေ စုပေါင်းပြီး ပလက်ဖောင်းအကြီးတွေဖြစ်သွားတာလည်းရှိပါတယ်။ တချို့ပလက်ဖောင်းတွေဟာ အပြန်အလှန်ရောယှက်ထိစပ်နေတာမျိုးတွေလည်းရှိပါတယ်။ ဒီပလက်ဖောင်းတွေကို မှတ်တမ်းတင်မယ်ဆိုရင် လက်ရှိအခြေအနေကပဲ စပြီးမှတ်တမ်းတင်မှရပါမယ်။ ဘာလို့လဲဆိုတော့ အတိတ်မှာ ပုံစံအမျိုးမျိုးပြောင်းခဲ့ကြသလို အနာဂတ်မှာလည်း ပြောင်းလဲမှုတွေရှိလာဦးမှာဖြစ်လို့ပါ။ လက်ရှိအနေအထားအရ NUCC ပလက်ဖောင်း၊ K2C( K3C) + NUG ++ ပလက်ဖောင်း၊ မြောက်ပိုင်းလက်နက်ကိုင်တပ်ဖွဲ့များပလက်ဖောင်း၊ မြေပြန့် ဖက်ဒရယ်ယူနစ်ပလက်ဖောင်းများနဲ့ ပြည်တွင်းနိုင်ငံရေးအင်အားစုများ ပလက်ဖောင်းဆိုပြီး ခွဲလို့ရပါတယ်။ ဒီနွေဦးပလက်ဖောင်းတခုချင်းစီကို သူတို့သမိုင်းဖြစ်စဉ်တွေအလိုက် မြေပုံညွှန်းစာမျက်နှာပေါ်ကိုတင်ကြည့်ရင် ဘာတွေဖြစ်လာမလဲ။

၂။ မြေပုံပေါ်တင်ကြည့်ခြင်း

ပထမဆုံးထွက်ပေါ်လာတဲ့ပလက်ဖောင်းကတော့ NUCC လို့ခေါ်တဲ့ အမျိုးသားညီညွတ်ရေးအတိုင်ပင်ခံကောင်စီ ပလက်ဖောင်းပါပဲ ၂၀၂၁ မတ်လကစတင်စုစည်းခဲ့တဲ့ ဒီပလက်ဖောင်းဟာ ဖွဲ့စည်းပုံဖျက်သိမ်းရေး အမျိုးသားညီညွတ်ရေးအစိုးရပေါ်ပေါက်ရေးစတဲ့ လုပ်ငန်းစဉ်တွေ ဆောင်ရွက်အပြီးမှာတော့ သီးခြားပလက်ဖောင်းတခုအဖြစ်ရောက်သွားပြီး အခက်အခဲပေါင်းများစွာနဲ့ လည်ပတ်မှုရပ်ဆိုင်းသွားပါတယ်။ NUCC ပလက်ဖောင်းဟာ သမိုင်းတလျှောက် အစုံလင်ဆုံးအင်အားစုတွေ စုစည်းမိတဲ့ပလက်ဖောင်းဖြစ်ခဲ့ပေမဲ့ အဲဒီလို အစုံလင်ဆုံးဖြစ်တာကပဲ အရာရာ ဆုံးဖြတ်ချက်ချဖို့ ခဲယဉ်းသွားပြီး မအောင်မြင်ဖြစ်သွားရပါတယ်။ NUCC ရဲ့ မူဝါဒရေးရာ ထစ်ငေါ့မှုတွေကြောင့် အလုပ်မဖြစ်တော့တဲ့ NUG ဟာ ပလက်ဖောင်းအသစ်ကို ကူးပြောင်းဖို့ကြိုးစားရင်း NUCC ထဲမှာပါတဲ့ EROs တချို့နဲ့ သီးသန့်ပလက်ဖောင်းတခုဖော်ဆောင်ဖို့ကြိုးစားပါတယ်။ အဲဒါကတော့ K2C+NUG ပလက်ဖောင်းပါပဲ။ ဒီပလက်ဖောင်းမှာ အစကတုန်းက NLD နဲ့ CRPH ပါ ပါဝင်ပေမဲ့ ၂၀၂၄ ဘုံသဘောထားထုတ်ပြန်ချက်နောက်မှာတော့မပါဝင်တော့ဘဲ တခြားပြည်တွင်းပြည်ပ တော်လှန်ရေးအင်အားစုတွေတော့ အမည်မဖော်ဘဲ ပူးပေါင်းပါဝင်လာကြတာတွေ ရှိပါတယ်။ အဲဒီပလက်ဖောင်းထဲမှာ KIO/KIA ကလည်း ပါဝင်သလား မပါဝင်သလားယတိပြတ်ပြောမထားပါဘူး။ ဒီပလက်ဖောင်းဟာလည်း နိုင်ငံရေးဘုံသဘောတူညီချက်တရပ်ထုတ်နိုင်တာကလွဲလို့ အားကောင်းလာတာမျိုးမရှိဘဲ ပုံမှန်ပဲရှိနေပါတယ်။ အဲဒီပလက်ဖောင်းတွေနဲ့အပြိုင် စစ်ရေးအရှိန်မြှင့်ပြီး ထင်ရှားလာတဲ့ပလက်ဖောင်းကတော့ 3BHA ဦးဆောင်တဲ့ မြောက်ပိုင်းအင်အားစုများ စစ်ရေးပလက်ဖောင်းပဲဖြစ်ပါတယ်။ တခြားအင်အားစုတွေလည်း စစ်ရေးနဲ့ ထောက်ပို့အရ နောက်ကွယ်က ပါဝင်ကြတဲ့ပလက်ဖောင်းတခုပါ။ ဒီပလက်ဖောင်းဟာ စစ်ရေးအောင်မြင်မှုတွေနဲ့အတူ ပြည်သူလူထုထောက်ခံမှုတွေအားကောင်းလာပေမဲ့ ယခုအချိန်မှာတော့ တရုတ်ရဲ့ မဟာဗျူဟာမြောက်ဟန့်တားမှုကို ရင်ဆိုင်နေရပြီး စိန်ခေါ်မှုတချို့တွေ့နေပါတယ်။ ဒီဖြစ်စဉ်နဲ့အပြိုင်ပဲ ပြည်နယ်နဲ့ လူမျိုးစုအတိုင်ပင်ခံကောင်စီတွေပူးပေါင်းထားတဲ့ Bottom up approach ကို အပြည့်အဝကျင့်သုံးမယ်ဆိုတဲ့ ကြေညာချက်နဲ့အတွက် ပြည်နယ်/လူမျိုးစုပလက်ဖောင်းတခုထပ်မံပေါ်ထွန်းလာပြန်ပါတယ်။ ဒါဟာလည်း ဒေသအလိုက် နယ်မြေသိမ်းစစ်ပွဲတွေနဲ့အပြိုင်ဖြစ်တည်လာတဲ့ နိုင်ငံရေး မျှော်ရည်ချက်ပလက်ဖောင်းတခုလို့ ယူဆရပါတယ်။

ပလက်ဖောင်းတိုင်းနဲ့ အဆင်မပြေဖြစ်နေတဲ့ NLD အင်အားစုတွေကလည်း မြေပြန့်ဖက်ဒရယ်ယူနစ်လွှတ်တော် အင်အားစုတွေနဲ့ ပေါင်းစည်းပြီး ဖက်ဒရယ်ယူနစ် အခြေခံဥပဒေရေးဆွဲရေးလုပ်ငန်းစဉ်တွေကို ဦးစားပေးဆောင်ရွက်လာတာမျိုးတွေရှိပါတယ်

ဒီလိုပဲ ပလက်ဖောင်းတိုင်းနဲ့ အဆင်မပြေဖြစ်နေတဲ့ NLD အင်အားစုတွေကလည်း မြေပြန့် ဖက်ဒရယ်ယူနစ်လွှတ်တော်အင်အားစုတွေနဲ့ပေါင်းစည်းပြီး ဖက်ဒရယ်ယူနစ် အခြေခံဥပဒေ ရေးဆွဲရေးလုပ်ငန်းစဉ်တွေကို ဦးစားပေးဆောင်ရွက်လာတာမျိုးတွေရှိပါတယ်။ အထူးသဖြင့် စစ်ကိုင်းတိုင်းမှာ ဒီလုပ်ငန်းစဉ်ဟာ အကြီးအကျယ်ဆွေးနွေးနေရတဲ့ ပလက်ဖောင်းတခုအသွင်းဆောင်လာပါတယ်။ တဖက်မှာလည်း တော်လှန်ရေးအင်အားစုတွေ၊ အရပ်ဖက်အင်အားစုတွေဟာ လူထုဖိုရမ်တွေလို ပလက်ဖောင်းတွေတည်ဆောက်ပြီး မြေပြန်ဖက်ဒရယ်ယူနစ်အခင်းအကျင်းကို ဖန်တီးဖို့ကြိုးစားနေပါတယ်။ နောက်ဆုံးတခုကတော့ နောက်ဆုံးမှပေါ်လာတဲ့ စစ်ကောင်စီထိန်းချုပ်နယ်မြေက နိုင်ငံရေးသမားတွေရဲ့ ပလက်ဖောင်းပါ။ သူတို့ဟာလည်း လက်ရှိနိုင်ငံရေးအကြပ်အတည်းကိုပြေလည်ဖို့ တွေ့ဆုံမှုတွေလုပ်ဆောင်ခဲ့ကြပြီး ငွေဆောင်တွေ့ဆုံပွဲကနေ ကြေညာချက်တရပ်ထုတ်ပြန်ခဲ့တာရှိပါတယ်။ ဒီပလက်ဖောင်းတွေကို မြေပုံပေါ်တင်ပြီး ကြည့်လိုက်ရင် တခုနဲ့တခု ဆက်စပ်နေတာ ရောထွေးနေတာ ရောယှက်နေတာ စတဲ့ အညွှန်းမြားတွေကိုမြင်ရမှာပါ။

၃။ အညွှန်းမြားများ

တချို့ပလက်ဖောင်းတွေရဲ့ အလုပ်မဖြစ်မှုဟာ တချို့ပလက်ဖောင်းတွေကို ဖြစ်ပေါ်လာစေပြီး တချို့ပလက်ဖောင်းတွေကတော့ ရှိပြီးသားပလက်ဖောင်းတွေကို အားဖြည့်ဖို့ထွက်ပေါ်လာတာဖြစ်ပါတယ်။ ဥပမာ NUCC နဲ့ K2C + NUG ++ ပလက်ဖောင်းဟာ တခုအလုပ်မဖြစ်လို့ ခွဲထွက်ပေါ်ထွန်းလာတာဖြစ်ပြီး ပြည်နယ်နဲ့ လူမျိုးစုတွေရဲ့ Bottom up approach ပလက်ဖောင်းကတော့ ရှိပြီးသား ပလက်ဖောင်းတွေကို အားဖြည့်ဖို့ထွက်ပေါ်လာတာပါ။ ဒါကြောင့် အညွှန်းမြားတွေအပြင် အပေါင်းလက္ခဏာတွေပါတွေ့ရမှာဖြစ်ပါတယ်။ တချို့ပလက်ဖောင်းတွေဟာ တခုနဲ့တခု အမှီသဟဲဖြစ်နေကြပြီး တခုမရှိရင် တခုပေါ်လာစရာမရှိတာတွေလည်းတွေ့ရပါတယ်။ ဥပမာအားဖြင့် 3BHA ပလက်ဖောင်းနဲ့ လူမျိုးစုယူနစ်များပလက်ဖောင်းဖြစ်ပါတယ်။ တချို့ပလက်ဖောင်းတွေကတော့ ဆန့်ကျင်ဘက်အသွင်ဆောင်တဲ့ ပလက်ဖောင်းတွေဖြစ်ပါတယ်။ NLD ဦးဆောင်တဲ့ မြေပြန့်ဖက်ဒရယ်ယူနစ်ပလက်ဖောင်းနဲ့ တိုင်းရင်းသား/လူမျိုးစုတွေရဲ့ Bottom up ပလက်ဖောင်းတွေဖြစ်ပါတယ်။ NUG ဟာ ပါဝါကို ဗဟိုကချုပ်ကိုင်ဖို့ ကြိုးစားနေရင်း တချို့ မြေပြန့်ယူနစ်ပလက်ဖောင်းတွေနဲ့ ဆန့်ကျင်ဘက်သဘောဆောင်သွားတာတွေလည်း တွေ့ရပါတယ်။ ဒါကြောင့် ပလက်ဖောင်းတွေစုစည်းထားတဲ့မြေပုံတွေမှာ မြားတွေ အပေါင်းလက္ခဏာတွေသာမက ကြက်ခြေခတ်တွေလည်းပေါ်ပေါက်လာရပါတယ်။ ဒီပလက်ဖောင်းအားလုံးမှာ ကွဲပြားမှုတွေရှိနေလင့်ကစား ဒီပလကဖောင်းတွေအားလုံးဟာ စစ်ကောင်စီဆိုတဲ့ ဘုံရန်သူတော့ ရှိနေတာတူပါတယ်။

၄။ တခုတည်းသော ပလက်ဖောင်း

ဒီပလက်ဖောင်တွေကို မြေပုံပေါ်တင်ကြည့်ချိန် အညွှန်းမြားတွေ၊ အပေါင်းလက္ခဏာတွေ အနုတ်လက္ခဏာတွေနဲ့ မျဉ်းပြိုင်တွေတွေ့လာရပြီး နောက်ထပ်တွေ့ရတဲ့အချက်ကတော့ တခုတည်းသော ပလက်ဖောင်းတခု ဒီပလက်ဖောင်းတွေထဲက ထွက်ပေါ်လာဖို့ဆိုတာ လုံးဝမလွယ်တော့ဘူးဆိုတဲ့အချက်ဖြစ်ပါတယ်။ ဒါဟာ အလုပ်မဖြစ်ဘူးလို့တော့မဆိုလိုပါဘူး မာတီပလက်ဖောင်းလို့ခေါ်တဲ့ ပလက်ဖောင်းများစွာနဲ့ တိုးတိုက်တဲ့ စနစ်တခု ဖြစ်လာဖွယ်ရှိတယ်ဆိုတဲ့ ဖြစ်တန်ရာခြေရှိပါတယ်။ အချုပ်အားဖြင့်ပြောရရင် နွေဦးပလက်ဖောင်းတွေကို မြေပုံထဲမှာ တင်ကြည့်တဲ့အခါ ကြီးတဲ့အရာကနေ သေးသွားတာမျိုး၊ သေးတဲ့အရာကနေ စုစည်းပြီးကြီးသွားတာမျိုးထက် အင်အားတူမျှခြေတွေကနေ ပြန်လည်ပေါင်းစည်းမှု သို့မဟုတ် ပြိုင်တူတွန်းတိုက်မှုအားကိုပဲ စနစ်တကျ ဖော်ဆောင်ရမယ်ဆိုတဲ့အချက်ကို ရရှိပါတယ်။

တူမီးသိမ်းမောင် ရေးသားသည်။

မြို့သိမ်းတိုက်ပွဲအပြီး နှစ်ပတ်ကျော်ရှိလာပေမယ့် ပုလဲမြို့ကစစ်ရှောင်ပြည်သူ တစ်သောင်းကျော်ဟာ နေရပ်မပြန်နိုင်သေးဘူးလို့ စစ်ကိုင်းတိုင်းက စစ်ဘေးရှောင်ပြည်သူတွေကို ကူညီပေးနေတဲ့ Beyind The Chindwin Organization-BCO အထွေထွေအတွင်းရေးမှူး ကိုစိုပြေမင်းထင် ဆီက သိရပါတယ်။

မြို့သိမ်းတိုက်ပွဲ စဖြစ်ခဲ့တဲ့ နိုဝင်ဘာ ၁၁ ရက်မှာ ပုလဲမြို့ပေါ်က ပြည်သူတွေနဲ့ မြို့ အနီးနား ကျေးရွာ ၁၂ ရွာက ပြည်သူတွေသာ စစ်ရှောင်ခဲ့ကြရပေမယ့် တိုက်ပွဲရဲ့နောက်ပိုင်း ရက်တွေမှာ အာဏာသိမ်းစစ်တပ်က လေ ကြောင်းတိုက်ခိုက်မှုတွေ ဆက်လုပ်နေလို့ ပုလဲမြို့ပေါ်နဲ့ ကျေးရွာ ၂၆ ရွာက ပြည်သူ ၂ သောင်းဝန်းကျင်အထိ စစ်ရှောင်ခဲ့ရတယ်လို့ ကိုစိုပြေမင်းထင်က ဆိုပါတယ်။

“စားနပ်ရိက္ခာနဲ့ ပတ်သက်လို့ရယ်၊ ကျန်းမာရေးစောင့်ရှောက်မှုတွေနဲ့ ပတ်သက် လို့ရယ် စိန်ခေါ်ချက်တွေကတော့ မြို့သိမ်း တိုက်ပွဲရဲ့ နောက်ဆက်တွဲတွေ အနေနဲ့ အဓိကရင်ဆိုင်ကြုံတွေ့နေရတာ ဒီကနေ့ထိတိုင်အောင်ပါပဲ။ အရေးကြီးဆုံးကိစ္စကတော့ တစ်နေ့တာစားဝတ်နေရေးပေါ့။ စစ်ရှောင် ပြည်သူတွေက အများကြီးပဲ တစ်နေရာနဲ့ တစ်နေရာ အသားဟင်းမပါဘဲ ကျွေးရင် တော့ ၇ သိန်း ၈ သိန်းဝန်းကျင်လောက် အထိကုန်တယ်။ အဓိကတော့ စားဝတ်နေရေး က ပထမဦးစားပေးလိုအပ်ချက်လို့ ပြောလို့ ရပါတယ်ဗျ” လို့ ကိုစိုပြေမင်းထင်က The Nation Voice ကို ပြောပါတယ်။

ကျန်းမာရေးစောင့်ရှောက်မှုအနေနဲ့ ဆေးဝါးမလုံလောက်တာကြောင့် လူဦးရေ ၁၅ဝ ဝန်းကျင်လောက်ကိုသာ ဆေးကုသပေးနိုင်ပြီး ပုံမှန် ရာသီဖျားနာတာ၊ နှာစေးချောင်းဆိုးတာနဲ့ သွေးတိုး ဆီးချို ရောဂါရှိသူတွေကို ကျန်းမာရေးစောင့်ရှောက်မှုပေးနေတယ်လို့ ကိုစိုပြေမင်းထင်က ဆက်ပြောပါတယ်။

ယခုကာလဟာ ဆောင်းရာသီရောက်လာပြီဖြစ်တာကြောင့် စစ်ရှောင်တွေအနေ နဲ့ အနွေးထည်နဲ့ ခြုံစောင်လိုအပ်ချက်တွေလည်းရှိနေတယ်လို့ အညာပစ်တိုင်းထောင်လေးများအဖွဲ့ရဲ့ အဖွဲ့ဝင်တစ်ဦးဖြစ်တဲ့ မဖူးပွင့်ဝေကဆိုပါတယ်။

“စစ်ရှောင်တွေအနေနဲ့က ပုလဲမြို့ပေါ် ကနေ ရှောင်လာတဲ့သူတွေ များတယ်ဗျ။ အဝတ်တစ်ထည် ကိုယ်တစ်ခုနဲ့ ခါတိုင်းလိုပဲ နေရပ်ပြန်ကပ်နိုင်မယ်ထင်လို့ ဘာမှမယူခဲ့ကြဘူးဗျ။ အခုဆိုသူတို့က ပြန်ဖို့ခဲယဉ်းတာပေါ့နော်။ မြို့သိမ်းတိုက်ပွဲအပြီးမှာ စကစက မြို့ပေါ်ကိုလည်း မီးရှို့မှုတွေ ဆက်တိုက်လုပ်နေတာဆိုတော့ နေရပ်မပြန်နိုင်ကြဘူး။ သူတို့အနေနဲ့ အခုဆောင်းတွင်းလည်းဖြစ်တယ်ဆိုတော့ အနွေးစောင် တို့အနေနဲ့ အခုဆောင်းတွင်းလည်း ဝင်လာ ပြီး အဝတ်တစ်ထည် ကိုယ်တစ်ခုနဲ့ပြေးလာ တွေနဲ့ အနွေးထည်တွေ လိုအပ်နေတယ်လို့ ကျွန်တော်ကြားသိရတယ်ဗျ” လို့ မဖူးပွင့်ဝေ က ပြောပါတယ်။

ပြီးခဲ့တဲ့ အောက်တိုဘာ ၁၇ ရက် သီတင်းကျွတ်လပြည့်နေ့က ဘုတလင် မြို့နယ် စီပါရွာက ဒေသခံရှစ်ဦးကို ခန္ဓာကိုယ်အပိုင်းပိုင်းခုတ်ထစ်ပြီး ခန္ဓာကိုယ်အစိတ်အပိုင်းတွေကို ရွာလယ်မှာချိတ်ဆွဲ သွားတဲ့ စစ်ကြောင်းဟာ ပုလဲမြို့နယ်ကို ရောက်ရှိနေတယ်လို့ ဒေသတွင်းစစ်ရေး အခြေအနေကိုစောင့်ကြည့်သူတွေက ဆိုပါတယ်။ ဒါကြောင့် ပုလဲမြို့သိမ်းတိုက်ပွဲအပြီးမှာ စစ်ရှောင်ပြည်သူ တစ်သောင်းဝန်းကျင်ကသာ နေရပ်ပြန်နေနိုင်ကြပြီး ကျန်တဲ့ စစ်ရှောင်ပြည်သူ တစ်သောင်းဝန်းကျင်ဟာ နေရပ်မပြန်ရဲကြသေးဘူးလို့ သိရပါတယ်။

Beyond The Chindwin Organi zation-BCO အဖွဲ့က ကောက်ယူထားတဲ့ စာရင်းတွေမှာတော့ပုလဲမြို့သိမ်းတိုက်ပွဲအတွင်း ပုလဲမြို့ပေါ်နဲ့ ကျေးရွာပေါင်း ၂၆ ရွာစစ် ဘေးရှောင်နေရပြီးဖြစ်တယ်လို့ ဖော်ပြထား ပါတယ်။ The Nation Voice အနေနဲ့ ရရှိထားတဲ့ ကျေးရွာအမည်တွေနဲ့ အိမ်ထောင်စု၊ လူဦးရေ အချက်အလက်တွေကို ပူးတွဲဇယား မှာ ဖော်ပြထားပါတယ်။

ပုလဲမြို့သိမ်းတိုက်ပွဲဟာ နိုဝင်ဘာ ၁၁ ရက်နေ့ မနက်အာရုံဦးမှာစတင်ခဲ့ပြီး နိုဝင်ဘာ ၁၄ ရက်ညနေမှာ အဆုံးသတ်ခဲ့ကာ တိုက်ပွဲကာလ လေးရက် ကြာမြင့်ခဲ့တယ်လို့ ဗမာအမျိုးသားတော်လှန်ရေးတပ်မတော် (BNRA)က နိုဝင်ဘာ ၁၇ ရက်မှာ ထုတ်ပြန်ထားပါတယ်။

ဒီတိုက်ပွဲကို ဗိုလ်နဂါးဦးဆောင်တဲ့ ဗမာအမျိုးသားတော်လှန်ရေးတပ်မတော်(BNRA) အဖွဲ့အပြင် Generation Z Army (GZA)နဲ့ Southern Yesagyo (SYSO)က ပူးပေါင်းပြီး ဖော်ဆောင်ခဲ့တယ်လို့ BNRA ကထုတ်ပြန်ပါတယ်။

ငြိမ်း ရေးသားသည်။

အာဏာသိမ်းစစ်တပ်က စစ်ကြောင်း ထိုးနေတာကြောင့် နေရပ်မပြန်ရဲတဲ့အတွက် မြေပဲဖော်ဖို့ အခက်ကြုံနေရတယ်လို့ မကွေးတိုင်း ချောက်မြို့နယ်က ဒေသခံတောင်သူတွေက The Nation Volce ကိုပြောပါတယ်။

နိုဝင်ဘာ ၂၇ ရက် မနက်ပိုင်းမှာ အာဏာသိမ်းစစ်တပ်စစ်ကြောင်းက ချောက်မြို့နယ်ထဲက တောင်သာလမ်းခွဲကို ရောက်လာပြီး အနီးဝန်းကျင်ရွာတွေကို စစ်ကြောင်းထိုးနေ တယ်လို့ ဒေသတွင်း သတင်းရင်းမြစ်တွေက ဆိုပါတယ်။

အာဏာသိမ်းစစ်တပ် စစ်ကြောင်းထိုး နေတဲ့ ကျေးရွာတွေအနီးက ကျေးရွာ ၁၃ ရွာ ဝန်းကျင်ဟာ မြေပဲဖော်ရတော့မယ့် အချိန်ကို ရောက်နေပေမယ့် စစ်ကြောင်းထိုးနေလို့ ကျေးရွာတွေက တိမ်းရှောင်နေရတဲ့အပြင် လုပ်သားငှားမရတဲ့ အခြေအနေကိုလည်း ရင်ဆိုင်နေရတယ်လို့ ဆိုပါတယ်။

“အခုက စစ်ကြောင်းကနောက်တစ်ခါ ထပ်ဝင်လာတာ၊ ပဲနှုတ်ချိန်ဆိုတော့ ပိုခက်ရော။ ဒီနှစ်တော့ လုပ်အားခ သုံးဆလောက်ပို ပေးတာတောင် အလုပ်လိုက်မယ့်သူမရှိဘူး၊ ရွာမှာရှိတဲ့ လူတွေလောက်နဲ့လည်း လုပ်အားက အဆင်မပြေဘူး”လို့ မြေပဲစိုက်တောင်သူ တစ်ဦးက ပြောပါတယ်။

ပြီးခဲ့တဲ့ နှစ်တွေမှာတော့ မြေပဲဖော်ရာသီမှာ အလုပ်သမားတစ်ဦးကို တစ်နေ့

လုပ်အားခ ငါးထောင်ကျပ်ပေးရပြီး ဒီနှစ်မှာတော့ ယာခင်းပိုင်ရှင်တောင်သူတွေက တစ်သောင်းခွဲအထိ လုပ်အားခကို တိုးမြှင့်ပေးပေမယ့် လုပ်ကိုင်သူမရှိဘူးလို့ တောင်သူတွေက ဆိုကြပါတယ်။

ကျေးရွာခံလူငယ်နဲ့ လူလတ်ပိုင်းတွေ အနေနဲ့ အာဏာသိမ်းစစ်တပ်ရဲ့ စစ်ကြောင်း ရန်ကြောင့် ကျေးရွာကိုပြန်မလာနိုင်ကြသူတွေရှိနေသလို အချို့ကတော့ မြို့ပေါ်တွေ ကိုသွားပြီး အလုပ်လုပ် ကိုင်နေကြတယ်လို့ ဒေသခံတွေက ဆိုပါတယ်။

“တန်ဆောင်မုန်းမှာပုံမှန်ဖော်တာ၊ ဝါဆိုကတည်းကစိုက်တဲ့ပဲက အခုမှ မဖော်နိုင်ရင် မြေကြီးထဲကျန်ခဲ့မှာ၊ တကယ်လို့ မုန်တိုင်းတွေဘာတွေရှိလို့ မိုးများရင် မြေပဲကပျက်ပြီ၊ အချိန်မီဖော်နိုင်ရင်အဆင်ပြေသွားမှာ”လို့ တောင်သူတစ်ဦးက မြေပဲခင်းရဲ့ အခြေအနေ ကိုရှင်းပြပါတယ်။

တောင်သူတွေအနေနဲ့ မြေပဲကိုအချိန်မှီ မဖော်နိုင်ခဲ့ရင်တော့ ဧကအကြီးအသေး အပေါ်မူတည်လို့ တစ်ဧကကို အနည်းဆုံး ခုနှစ်သိန်းကနေ ရှစ်သိန်းကျပ်အထိ ဆုံးရှုံးနိုင်တယ်လို့ တောင်သူတွေက ခန့်မှန်းကြပါတယ်။

ပြီးခဲ့တဲ့ အောက်တိုဘာလအတွင်းကလည်း အာဏာသိမ်းစစ်တပ်က စစ်ကြောင်းထိုးပြီး လေကြောင်းက ဗုံးကြဲခဲ့တာကြောင့် ချောက်မြို့နယ်ထဲက ကျေးရွာ ၂၄ ရွာက လူဦးရေ ၂ဝဝဝဝ ကျော် စစ်ဘေးရှောင်ခဲ့ရပါတယ်။

လက်ရှိမှာတော့ ညောင်ဇင်၊ ရွာမ၊ ဆူးတော၊ ချောင်းဦး၊ နရွဲတော၊ ကံသစ်ကုန်း၊ ကတိုင်(တောင်)၊ ကတိုင်(မြောက်)၊ စန်းမရေယဉ်၊ ဆယ်ကန်၊ ညောင်ပင်စမ်းနဲ့ ထိန်စမ်းရွာက မြေပဲစိုက်တောင်သူတွေဟာ မြေပဲဖော်ဖို့ အခက်အခဲဖြစ်နေတာပါ။

အဲလာ ရေးသားသည်။

စစ်ပွဲတွေနဲ့ မတည်ငြိမ် မအေးချမ်းတဲ့ မကွေးတိုင်း၊ ပေါက်မြို့နယ်ထဲက ဇာတိရွာ မှာကျန်နေတဲ့ မိအိုဖအိုတွေကို ထောက်ပံ့နိုင်ဖို့ မန္တလေးက ရှမ်းခေါက်ဆွဲဆိုင်မှာ စားရိတ် ငြိမ်း တစ်လတစ်သိန်းခွဲနဲ့ မသင်းသင်းဟာ စားပွဲထိုးဝင်လုပ်ပါတယ်။

မန္တလေးရောက်ပြီး ၆ လအကြာမှာ ဆိုင် မှာလာစားတဲ့ လူပွဲစားမတစ်ယောက်ရဲ့ စား ရိတ်ငြိမ်းဆယ်သိန်းရမယ်ဆိုတဲ့ ဆွဲဆောင်မှု နဲ့ တရုတ်နိုင်ငံကို ရောက်ရှိကာ တရုတ်မယား အဖြစ်ရောင်းစားခံခဲ့ရတာပါ။

“ပွဲစားမကို ဆက်သွယ်လို့လည်း မရ၊ တရုတ်ပြည်ထဲ အတူဝင်လာတဲ့ အဖော် တွေကိုလည်း ဆက်သွယ်မရတော့ဘူး ” လို့ အသက် ၂၁ နှစ်အရွယ် မသင်းသင်းက သူကြုံ ခဲ့ရတာကို ပြန်ပြီးပြောပြပါတယ်။

စစ်ကိုင်းတိုင်းနဲ့ မကွေးတိုင်းက ဒေသခံတွေဟာ စစ်အာဏာသိမ်းမှုနောက်ပိုင်းမှာ လက်နက် ကိုင်ပဋိပက္ခရဲ့ ဆိုးရွားတဲ့အကျိုးသက်ရောက်မှုကို ကြီးမားစွာရင်ဆိုင်နေရပြီး နေ့စဉ်စားဝတ်နေရေးဖြေရှင်းနိုင်ဖို့ ရန်ကုန်၊ မန္တလေး အပါအဝင် ပြည်တွင်း၊ပြည်ပ နိုင်ငံ ရပ်ခြားကို အလုပ်လုပ်ကိုင်ဖို့ ရွှေ့ပြောင်းနေ ကြရသူတွေအများအပြားပါ။

ဒီလို အခြေအနေမှာ စားဝတ်နေ ရေးကြပ်တည်းလာတဲ့ မိသားစုတွေထဲက အမျိုးသမီးငယ်တချို့ဟာ လူကုန်ကူးပွဲစားတွေရဲ့ သားကောင်ဖြစ်လို့လာပါတော့တယ်။

လူကုန်ကူးပွဲစားတွေဟာ Facebook, WeChat, Telegram, Tik Tok စတဲ့ လူမှုကွန်ယက်တွေကနေ အလုပ်အကိုင်အခွင့်အလမ်း ဖန်တီးပေးနိုင်တယ်လို့ ဆွဲဆောင်နေကြသလို တချို့ကတော့ တရုတ်ဇနီးမယားပြုလုပ်ဖို့ကို မက်လောက်တဲ့ ငွေကြေးနဲ့ ပေါ်ပေါ်ထင်ထင် မြူစွယ်လာကြတာကိုလည်း တွေ့မြင်လာရပါတယ်။

တချို့ပွဲစားတွေကတော့ လုပ်ငန်းအမျိုးအစား လိမ်လည်ခေါ်ဆောင်ပြီး တရုတ ပြည်ထဲရောက်မှ မြန်မာမိန်းကလေးတွေကို တရုတ်မယားအဖြစ်ရောင်းစားသွားကြတာပါ။

တရုတ်ရဲ့ ဇနီးမယားအဖြစ် ရောင်းစားခံခဲ့ရသူ မသင်းသင်းကတော့ ဘယ်သူနဲ့မှ အဆက်အသွယ်မရတော့တဲ့အတွက် တရုတ်အမျိုးသားကို ရှိခိုးတောင်းပန်ပြီး သူ့ကို ပြန်လွှတ်ပေးဖို့ အသနားခံခဲ့ပေမယ့် တရုတ်အမျိုးသားက ပြန်လွှတ်မပေးခဲ့ပါဘူးလို့ဆိုပါတယ်။

ဇနီးအဖြစ် ပေါင်းသင်းခဲ့ရပြီး ၄ လပြည့် တဲ့နေ့မှာ မသင်းသင်းဟာ တရုတ် ရဲစခန်းကို ထွက်ပြေး ဖမ်းဆီးခံခဲ့တယ်လို့ ဆိုပါတယ်။

တရုတ်ဇနီးမယားအဖြစ် ရောင်းစားဖို့စည်းရုံးမြူဆွယ်မှုတွေ မက်လုံးပေးမှုတွေ ကို စောင့်ကြည့်လေ့လာနေသူ မန္တလေးက ရှမ်းအမျိုးသမီးတစ်ဦးကတော့ အောက်ပါ အတိုင်းသုံးသပ်ပါတယ်။

“အခုနောက်ပိုင်းမှာ လူပွဲစားတွေက ပေါ်တင်ပဲ စည်းရုံးကြတော့တာ။ တရုတ်ပြည်မှာ တရုတ်မယား လုပ်ရမယ်၊ လစာတွေလည်း ကောင်းတယ်၊ ဘာမှလုပ်စရာမလိုဘူး၊ ကလေးမွေးလာရင်လည်း ကလေးကို ပြုစုရင်းနဲ့ပဲ နေရမယ်လို့ လိမ်ညာပြီးစည်းရုံး ကြတယ်”လို့ ဆိုပါတယ်။

လိမ်ညာခံရတဲ့ အမျိုးသမီးတွေဟာ တရုတ်နိုင်ငံသားရဲ့ ဇနီးအဖြစ်လက်ထပ်နိုင်ပေမယ့် မြန်မာနိုင်ငံကလာတဲ့သူတွေကို တရားဝင်အလုပ်လုပ်ခွင့် ပေးမထားဘူးလို့ တရုတ်နိုင်ငံရဲ့ ဥပဒေမှာဖော်ပြထားတယ်လို့ အဆိုပါ ရှမ်းအမျိုးသမီးကထောက်ပြပါတယ်။

“မြန်မာမိန်းကလေးကို ယူတယ်ဆိုတဲ့ သူတွေက သူတို့ကို သူတို့နိုင်ငံသူတွေက မယူလို့၊ မြန်မာအမျိုးသမီးကို ပိုက်ဆံပေး ဝယ်ကြတဲ့သဘောပဲ၊ ချမ်းသာလို့ မဟုတ်ဘူး။ အဲဒီတော့ သူတို့က တကယ်ပိုက်ဆံပေးခဲ့ရင်တောင် အစပိုင်းပဲ အဆင်ပြေကြလေ့ရှိတယ်။ နောက်တစ်ခုက ကိုယ်ကအခန်းကျဉ်းထဲမှာ တစ်ယောက်ထဲ အထီးကျန်ပြီး ဘဝကိုဖြတ်သန်းရလိမ့်မယ်” လို့ သူမက ဆိုပါ တယ်။

ပြီးခဲ့တဲ့ အောက်တိုဘာလ ၂၄ ရက် နေ့က တရုတ်မယားအဖြစ် ပေါင်းသင်းဖို့နဲ့ အငှါးကိုယ် ဝန်ဆောင်ပေးဖို့အတွက် မြန်မာ အမျိုးသမီးငယ် ၁၄ ဦးကို တရုတ်ပြည်ဘက် ကို ပို့ဆောင်မယ့် မန္တလေးအခြေစိုက် လူကုန်ကူးဂိုဏ်းတစ်ခုကို ဖမ်းမိခဲ့တဲ့အကြောင်း လူကုန်ကူးမှု တားဆီးနှိမ်နှင်းရေးအဖွဲ့ရဲ့ ထုတ် ပြန်ချက်မှာတွေ့ရပါတယ်။

အခုလို ဖမ်းဆီးရမိတာက လက်တွေ့ အခြေ အနေတွေရဲ့ မပြောပလောက်တဲ့ ပမာဏတစ်ခုသာဖြစ်ပြီး လက်ရှိမှာ တရုတ်နိုင်ငံကိုရောက်ရှိနေသူတွေရဲ့ အကူအညီ တောင်းသံတွေ မကြာခဏထွက်ပေါ်နေတယ် လို့ တရုတ်ဇနီးမယား အဖြစ်ရောင်းစားခံရမှု တွေကို စောင့်ကြည့်နေတဲ့ အမည်မဖော်လို တဲ့ ရှမ်းအမျိုးသမီးက ထောက်ပြပါတယ်။

စစ်ဘေးရှောင်ပြည်သူတွေ အများ အပြားရောက်ရှိနေကြတဲ့ ရန်ကုန်နဲ့ မန္တလေး တို့လို မြို့ကြီးတွေမှာ လူကုန်ကူးသူတွေ ဒုနဲ့ဒေး ရှိနေပါတယ်။ မိသားစုအခက်အခဲ ရှိတဲ့ အမျိုးသမီးငယ်တွေကို ပစ်မှတ်ထား တဲ့ လူကုန်ကူးသူတွေဟာ “မိသားစုကို ပိုမို ထောက်ပံ့ပေးနိုင်မယ်၊ ကြွေးမြီတွေ ပြန် ဆပ်နိုင်မယ်” ဆိုပြီး လူသုံးများတဲ့ လူမှုကွန်ရက်တွေကတဆင့်မက်လုံးပေးစည်းရုံးမြူဆွယ်စုဆောင်းနေကြတာပါ။

မသင်းသင်းကတော့ မန္တလေးမြို့က ရှမ်းခေါက်ဆွဲဆိုင်မှာအလုပ်လုပ်စဉ်က ရွာ ကအမေ့ဆီ လစာထဲက တသိန်းပြန်ပို့နိုင်ခဲ့ပြီး တရုတ်ပြည်အလုပ် ဆယ်သိန်းကို ယုံစားမိပြီးနောက်မှာ ဘဝပါပျက်ပြီး ထောင်ပါကျခဲ့ ရတယ်လို့ ဆိုပါတယ်။

အခုတော့ မသင်းသင်းဟာ ရန်ကုန်မြို့က စက်ချုပ်ဆိုင်တစ်ခုမှာ အထည်ချုပ် သင်ရင်း မှန်ကန်တဲ့အသက်မွေးဝမ်းကျောင်း အလုပ်တစ်ခုကို အားပြုလုပ်ကိုင်နေပါပြီ။

“တကယ်တော့ အွန်လိုင်းမှာ အလိမ် အညာတွေကများလွန်းပါတယ်၊ ယုံလောက် အောင်လည်း လိမ်နိုင်ကြတယ်လေ” လို့ မသင်းသင်းက ဆိုပါတယ်။

ဆူးငယ် ရေးသားသည်။

The Nation Voice Journal သည် ဖုန်းလိုင်းအင်တာနက်လိုင်းများဖြတ်တောက်ခံထားရသည့် မြန်မာနိုင်ငံ အလယ်ပိုင်းအတွက် ရည်ရွယ်ပြီး Central Myanmar Edition အဖြစ် စတင်ထုတ်ဝေလိုက်ပါသည်။

The Nation Voice သတင်းဌာနအနေဖြင့် အင်တာနက်ဖြတ် တောက်ခံထားရသည့် ဒေသများမှ ပြည်သူများ၏ အခြေခံအခွင့် ရေးများဖြစ်သည့် လွတ်လပ်စွာထုတ်ဖော်ခွင့်နှင့် သတင်းသိပိုင်ခွင့် အတွက် သတင်းဂျာနယ်ကို ရည်ရွယ်ထုတ်လုပ် ဖြန့်ချိသွားမည်ဖြစ်ပါသည်။

The Nation Voice သည် တိုင်းပြည်နှင့်ပြည်သူကို ချစ်မြတ်နိုး သည့်စိတ်ကိုအခြေခံထားပြီး မည်သည့်အမုန်းတရားများကိုမှ လက်မခံ ဆန့်ကျင့်ပါသည်။

The Nation Voice ၏ တိုင်းပြည်နှင့် ပြည်သူကို ချစ်မြတ်နိုး စိတ်သည် လူ့ဂုဏ်သိက္ခာနှင့် ဒီမိုကရေစီစံနှုန်းများကို မြတ်နိုးတန်ဖိုး ထားစိတ်ကို အခြေခံထားပါသည်။

အထူးသဖြင့် သတင်းမီဒီယာစံနှုန်းတန်ဖိုးများ လေးစားတန်ဖိုးထားလိုက်နာသည့် သတင်းမီဒီယာတစ်ခုဖြစ်ကြောင်း အသိပေးလိုပါသည်။ ပစ္စက္ခ ဆက်သွယ်ရေးနည်းပညာခေတ်ကြီးတွင် အမုန်း တရားများ၊ အငြိုးအတေးများ အာဃာတများကို လူကြီးများက တွင်တွင်ကျယ်ကျယ် ဖြန့်ချိနေချိန်တွင် အနာဂါတ် မျိုးဆက်သစ် ကလေးငယ်များကို မတူကွဲပြားမှုများကို လက်ခံပြီး လူ့ဂုဏ်သိက္ခာကို တန်ဖိုးထားနိုင်ရန်အတွက် ပေါင်းကူးပေးသွားပါမည်။

ယခုထုတ်ဝေသည့် သတင်းဂျာနယ်သည် လတ်တလောတွင် စစ်ကိုင်းတိုင်းအတွင်းမှ ပြည်သူများအတွက် ရည်ရွယ်ထုတ်ဝေသွား မည်ဖြစ်ပြီး နောင်တွင် ထပ်မံချဲ့ထွင်၍ မြန်မာနိုင်ငံအလယ်ပိုင်းမှ ပရိသတ်များအတွက် ဝန်ဆောင်မှုပေးသွားမည်ဖြစ်ပါသည်။

The Nation Voice သတင်းဂျာနယ်အား လစဉ် ၁ ရက်နေ့ နှင့် ၁၅ ရက်နေ့တို့တွင် တစ်လလျှင် ၂ ကြိမ် ပုံမှန်ထုတ်လုပ်သွားရန် ရည်ရွယ်ထားပါသည်။

ကိုစိုးဝင်းဆွေ  (အလုပ်အမှုဆောင်ကော်မတီဥက္ကဌ စစ်ကိုင်းဖိုရမ် ဖက်ဒရေးရှင်း)

The Nation Voice သတင်းဌာနအနေနဲ့ စစ်ကိုင်းမြေပြင်ပေါ့ဗျာ။ စစ်ကိုင်းအညာဒေသမှာ မြေပြင်မှာကို ဂျာနယ်ထုတ်ဝေဖြန့်ဖြူးတော့မယ်ဆိုတဲ့သတင်းကို သိရတဲ့အခါကျတော့ ကျွန်တော့်အနေနဲ့ စစ်ကိုင်းသားတစ်ယောက်၊ စစ်ကိုင်းပြည်သူတစ်ယောက်၊ စစ်ကိုင်းဒေသက တော်လှန်ရေးသမားတစ် ယောက်အနေနဲ့ အလွန်ကို ကျွန်တော်ဝမ်းသာ အားရဖြစ်မိပါတယ်ဗျ။

ဘာကြောင့်လဲဆိုတော့ ကျွန်တော်တို့ စစ်ကိုင်းမှာက အင်တာနက် ပြတ်တောက်နေတဲ့နေရာတွေ အများကြီးရှိတယ်။ ဆိုတဲ့အခါ ကျတော့ ပြည်သူလူထုအနေနဲ့ တော်လှန်ရေး သတင်းတွေ၊ စစ်ရေးသတင်းတွေ၊ မြေပြင် သတင်းတွေနဲ့ ပတ်သက်လို့ပေါ့ဗျာ၊ အချိန်နဲ့ တပြေးညီမသိရှိရတဲ့ အခက်အခဲတွေရှိပါတယ်။ ဒါတွေကို ကျွန်တော်တို့က မြေပြင် မှာ စာစဉ်တွေ၊ စာစောင်တွေ၊ သတင်းစာ တွေ၊ ဂျာနယ်တွေ ပုံစံမျိုး ထုတ်ဝေပြီးတော့ ကျွန်တော်တို့ ဖြန့်ဝေတာက ပြည်သူ
တွေအနေနဲ့ပေါ့ဗျာ သူတို့ သိသင့်သိထိုက် တဲ့ သတင်းအချက်အလက်တွေကို လွယ်လွယ်ကူကူနဲ့ သိရှိနိုင်တဲ့ အခွင့်အရေးရရှိမှာ ဖြစ်တယ်ပေါ့။ ဒါဟာ ကျွန်တော်တို့ မြေပြင်ရဲ့ လိုအပ်ချက်ကိုဖြည့်ဆည်းတာလည်းရောက် ပါတယ်။

နောက်တစ်ချက်ကကျတော့ ကျွန်တော် တို့ စစ်ကိုင်းပြည်သူလူထု အနေနဲ့က တော်လှန်ရေးလည်း အားကောင်းတဲ့ဒေသ ဖြစ်တယ်ဗျာ။ တော်လှန်ရေးရပ်ဝန်းဇုံကြီး လည်း ဖြစ်တယ်ဆိုတော့ ပြည်သူတွေအနေနဲ့ ကျွန်တော်တို့ ဘာကြောင့်တော်လှန်နေရသလဲဆိုတဲ့ တော်လှန်ရေးရဲ့ ရည်ရွယ်ချက် တွေ၊ တော်လှန်ရေးရဲ့ သဘောတရားတွေပေါ့ဗျာ ဖက်ဒရယ်လစ်ဇင်၊ အောက်ခြေ ကနေအထက်ကို ပြန်ပြီးတော့ ချည်းကပ်မှုနည်းနာဆိုတာ ဘယ်လိုဟာလဲ၊ စုပေါင်း ခေါင်းဆောင်မှု ဆိုတာက ဘယ်လိုဟာလဲ ဆိုတဲ့ တော်လှန်ရေးရဲ့ အခြေခံနိုင်ငံရေး သဘောတရားတွေကိုလည်းပဲ ပြည်သူတွေ ကြားထဲမှာ များများဖြန့်ဝေနိုင်ဖို့လိုမယ်ထင်ပါတယ်။

ဘာကြောင့်လဲ ဆိုတော့ ကျွန်တော်တို့က ဖက်ဒရယ်ဒီမိုကရေစီ ပြည်ထောင်စုထူထောင်တယ်ဆိုတဲ့ နေရာမှာ ဒီမိုကရေစီဆိုတာ ပြည်သူ့ရေချိန် မြင့်မားမှသာလျှင် ဒီမိုကရေစီစနစ်က ခိုင်ခန့်တယ်ပေါ့ဗျာ။ အားကောင်းတယ် ဆိုတဲ့ သဘောရှိပါတယ်။ ဒါကြောင့် ပြည်သူတွေအနေနဲ့က နိုင်ငံရေးအယူ အဆတွေ၊ တော်လှန်ရေးရဲ့ ရည်မှန်းချက် ပန်းတိုင်တွေနဲ့ ပတ်သက်လို့ အခြေခံလောက်ကတော့ဗျာ လူတိုင်း သိရှိနားလည်ထားသင့်တယ်။ အခြေခံရှိပြီးသားလူတွေကလည်း ဒီထက်ပိုပြီး ကျယ်ကျယ်ပြန့်ပြန့် လေ့လာနိုင်ဖို့ လိုအပ်နေပါတယ်။

ဒီကွက်လပ်ကို The Nation Voice သတင်းစာက မြေပြင်မှာ စာစဉ်ထုတ်ပြီးတော့ ဖြန့်ဝေမယ်ဆိုတော့ ဒီကွက်လပ်ကို တစ်စုံတစ်ရာအထိ ဖြည့်ဆည်းပေးနိုင်မယ်လို့တော့ ကျွန်တော်က မျှော်လင့်ပါတယ်။ ဆက်လက်ပြီးတော့လည်း ပုံမှန်ပေါ့ဗျာ ငါး လ တန်သည် ခြောက်လ တန်သည် မဟုတ် ဘဲနဲ့ ဒါကို ရေရှည်အစီစဉ် တစ်ခုအနေနဲ့ ပုံမှန် ပြည်သူတွေကြားထဲမှာ ဖြန့်ဝေပေး မယ်၊ ပြန့်နှံ့အောင်ဆောင်ရွက်ပေးမယ်ဆိုရင် တော့ အတိုင်းထက်အလွန်ဖြစ်မယ်လို့ ဒီလိုပဲ ကျွန်တော်ထင်မြင်မိပါတယ်။

ကိုလွမ်းသူ (အဖွဲ့ဝင် ယင်းမာပင် ဆားလင်းကြီး ရွာပေါင်းစုံ လူထုသပိတ်အဖွဲ့)

ဟုတ်ကဲ့ပါ။ The Nation Voice ဝိုင်း သူ ဝိုင်းတော်သားများ အားလုံးကို ဂုဏ်ယူပါတယ်။

အခုကျွန်တော်တို့ တော်လှန်ရေးကာလ ခူ တော်လှန်မီဒီယာ တစ်ခုလည်းဖြစ် လက်ရှိမှာလည်း တော်လှန်မီဒီယာ တကယ့်ကို တော်လှန်သော မြေပြင်ဆီကို အရောက်ပေးပို့မယ့် The Nation Journal ကို ထုတ်ဝေပြီးတော့မှ ဖြန့်ချိမယ်ဆိုတဲ့ အကြောင်းကြားသိရတဲ့အတွက် ကျွန်တော်တို့ များစွာ ဂုဏ်ယူဝမ်းမြောက်မိပါတယ်။

ထိုနည်းတူစွာပါပဲ ထွက်ရှိလာမယ့် ဂျာနယ်မှာလည်း တော်လှန်ရေး အကျိုးပြု၊ ပြည်သူလူထုအကျိုးပြုတာတွေ အများကြီး ပါမယ့်လို့လည်း ကျွန်တော်တို့ ယုံကြည် မျှော်လင့်ပါတယ်ခင်ဗျာ။ ဒါကြောင့်မို့ The Nation Voice ဝိုင်းတော်သူ၊ ဝိုင်းတော်သား များနဲ့ The Nation Voice မီဒီယာနဲ့ The Nation Voice ကထွက်လာမယ့် ဂျာနယ် တွေကို အားလုံး အစဉ်တစိုက် ဖတ်ရှုရင်း ကျွန်တော်တို့ တော်လှန်ရေးခရီးကြမ်းကြီးကို ပိုမိုညီညွတ်အောင်၊ ပိုမိုအောင်မြင်အောင်၊
ဆင်နွှဲနိုင်မယ်လို့ ကျွန်တော်ယုံကြည်ပါတယ်။ အဲဒီအတွက် ကျွန်တော်တို့ ထွက်ရှိလာမယ့် The Nation Voice ရဲ့ဂျာနယ်တွေမှာ ပြည်သူ တွေသိချင်တဲ့၊ ပြည်သူတွေမြင်ချင်တဲ့၊ ပြည်သူတွေကြားချင်တဲ့ အချက်အလက်တွေ၊ အကြောင်းအရာတွေ၊ စုံစုံလင်လင်၊ သုတ၊ ရသ၊ သတင်းဆောင်းပါး၊ နိုင်ငံရေး အားလုံး အားလုံး ပါဝင်ပြီးတော့မှ ကျွန်တော်တို့ နွေဦးတော်လှန်ရေးကြီး မြန်မြန်အဆုံးသတ် နိုင်ရေးအတွက် အင်မတန်မှအရေးကြီးတဲ့ စတုတ္ထမဏ္ဍိုင် အဖြစ် ဆက်ရပ်တည်နိုင်မယ် လို့လည်း လေးနက်စွာ ယုံကြည်ပြီးတော့ မှ စတုတ္ထမဏ္ဍိုင်ပီပီ ပြည်သူလူထုအကျိုး၊ တော်လှန်ရေးအကျိုးစီးပွားကို အဆုံးသတ် အောင်ပွဲရောက်သည်ထိ ပြည်သူလူထုနဲ့အတူ ထမ်းပိုးသယ်ရွက်ရင်း အခုထက်အောင်မြင် တဲ့ သတင်းမီဒီယာတစ်ခု၊ ပြည်သူလူထုက အားကိုးယုံကြည်တဲ့၊ ပြည်သူလူထုအတွက် သတင်းဦး၊ သတင်းထူးထက် သတင်းမှန်တွေ ကို စဉ်ဆက်မပြတ် တင်ပြပေးနိုင်တဲ့ မီဒီယာ တစ်ခုဖြစ်မယ်လို့လည်း ယုံကြည်ပါတယ်။

အခုလို ဆင့်ကဲကြိုးစားမှုကိုလည်း အထူးတလည် တော်လှန်ရေးရဲဘော်ရဲဘက် တစ်ယာက် အရေးတော်ပုံ တပ်သားတစ်ယောက်အနေနဲ့ မြေပြင်မှာရှိနေသော တော်လှန်ရေးသူ တော်လှန်ရေးသားတစ်ယောက်အနေနဲ့ အထူးပင် ဝမ်းမြောက်ဂုဏ်ယူပါကြောင်း ပြောကြားလိုပါတယ်ခင်ဗျာ။ ကျေးဇူး အများကြီးတင်ပါတယ်။

တူမီးသိမ်းမောင် (အယ်ဒီတာ-တူမီးတော်လှန်ရေးစာစဉ်)

The Nation Voice သတင်းစာက ပေါ့နော်။ အွန်လိုင်းတင်မကဘဲနဲ့ အခုလို on ground မှာပါ publish လုပ်နိုင်မယ် ကြားတော့ ကျွန်တော်တို့ အင်မတန်ဂုဏ်ယူဝမ်းမြောက်ပါတယ်။ ဘာဖြစ်လို့လဲဆို ကျွန်တော်တို့ တကယ့် official သတင်း Channel တွေအနေနဲ့ အပြင်မှာ သတင်းလွှာ မထုတ်ဝေနိုင်ခဲ့တာကြာပြီပေါ့နော်။ ကျွန်တော်တို့ဒီဘက်မြေပြင်မှာလည်း စာစဉ်လေးတွေ ပဲ ကျွန်တော်တို့ ဖြန့်ကျက်ပြီးတော့ ပြည်သူ နဲ့ သတင်းတွေကြားမှာ ပေါင်းကူးအဖြစ်လုပ် ပေးနေရတာလည်း တော်တော်ကြာပြီ။ အခုတော့ ဒါကျွန်တော်တို့ အညာဒေသမှာ ပထမဆုံးပေါ့နော်။ ဖြန့်ကျက်ပြီးတော့ သတင်းလွှာထုတ်ဝေနိုင်မယ်ဆိုတဲ့အပေါ်မှာ ကျွန်တော်တို့ အင်မတန် ဂုဏ်ယူဝမ်းမြောက်တယ်။

ကြိုလည်း ကြိုဆိုပါတယ်။ ကျွန်တော် တို့ လိုအပ်တဲ့အကူညီတွေလည်း တတ်နိုင်သရွေ့ ကူညီသွားဖို့ရှိပါတယ်။ ကူညီသွားဖို့လည်း ကျွန်တော်တို့ ကြိုးစားပါ့မယ်ဆိုတာ လေးကို ပြောကြားလိုပါတယ်ခင်ဗျာ။

စစ်ကိုင်းတိုင်း၊ ရေဦးမြို့နယ်ထဲက မီးဘေးသင့်ပြည်သူ တစ်သောင်းကျော်အတွက် စားနပ်ရိက္ခာအပါအဝင် တခြားသော ကူညီထောက်ပံ့မှုတွေ လိုအပ်နေဆဲဖြစ်တယ်လို့ စစ်ရှောင်တွေကို ကူညီထောက်ပံ့ပေးနေတဲ့ ဒီပဲယင်းညီနောင်များ အဖွဲ့ဆီကနေ သိရပါတယ်။

အာဏာသိမ်းစစ်တပ်က မီးရှို့ဖျက်ဆီးတာကြောင့် အိုးမဲ့အိမ်မဲ့ဖြစ်ခဲ့ရတဲ့ မီးဘေးသင့် ပြည်သူတစ်သောင်းကျော်အတွက် ဆန်၊ ဆီ ၊ ဆား စတဲ့ အခြေခံစားသောက်ကုန်တွေ အပြင် စောင်၊ ခြုံထည်၊ ဆေးဝါးပစ္စည်းတွေနဲ့ အမိုးအကာတွေပါ လိုအပ်နေသေးတယ်လို့ အဲဒီအဖွဲ့ရဲ့တာဝန်ရှိသူက ဆိုပါတယ်။

ရေဦးမြို့နယ်အခြေစိုက် People’s Defense Comrade အဖွဲ့ရဲ့ ပြန်ကြားရေး တာဝန်ခံ ကိုထူးခန့်ဇော်ကတော့ “မြေပြင်စစ်ကြောင်းတွေကို ကြောက်ရလို့ ယာယီ ဖြစ် သလိုလေးတွေနေထိုင်နေကြရတယ်။ အညာဒေသက ဆောင်းတွင်းဆို တအားအေးတော့ စောင်ခြုံတွေလည်း လိုတယ်။ စားနပ်ရိက္ခာကတော့ အဓိကအရေးပါဆုံးလိုအပ်တာပေါ့။ ပြည်သူတွေလည်း နိုင်သလောက်လေးတွေ လှူပေးကြပါတယ်။ ရလာတဲ့ ငွေပမာဏပေါ်မူတည်ပြီး ခြုံစောင်လေးတွေတို့ စားသောက်စရာလေးတွေကို မြေပြင်ထိသွားပြီး လှူဒါန်းမှုလုပ်ပေးနေတယ်”လို့ The Nation Voice ကိုပြောပါတယ်။

မီးဘေးသင့် ပြည်သူတွေဟာ မီးလောင်ကျွမ်းပြီး ကျန်ရစ်ခဲ့တဲ့ သွပ်မိုးတွေကို အမိုးအကာအဖြစ် ကာရံထားပြီး မီးလောင်ပြာကျခဲ့ရတဲ့ နေအိမ်တွေရဲ့ နေရာမှာပဲ ယာယီနေထိုင်နိုင်ဖို့ ဆောက်လုပ်ထားကြ တယ်လို့ သူက ဆက်ပြောပြပါတယ်။

မီးရှို့ခံရတဲ့အထဲမှာ ဆန်စက်၊ ဆီစက်နဲ့ အိမ်မွေးတိရိစ္ဆာန်တွေပါ မီးလောင် ဆုံးရှုံးခဲ့ရတာကြောင့် စီးပွားရေး ပြန်လည်လုပ်ကိုင် ဖို့ မလွယ်ကူတော့တဲ့အတွက် တံငါ၊ ပန်းရံ၊ လက်သမား စတဲ့ အလုပ်တွေကို လုပ်ကိုင်ပြီး မိသားစုဝမ်းရေးကို ဖြေရှင်းနေရတယ်လို့ ဒေသခံတွေကဆိုပါတယ်။

အာဏာသိမ်းစစ်တပ်က မီးရှို့ဖျက်ဆီးတာကြောင့် ပေါ်တူဂီနွယ်ဖွား ခရစ္စယာန် ဘာသာဝင် ဘုရင်ဂျီလူမျိုးတွေနေထိုင်တဲ့ ရေဦးမြို့နယ် ချမ်းသာရွာက သမိုင်းဝင် ခရစ္စယာန် ဘုရားကျောင်းကြီးအပါအဝင် အထက်တန်းကျောင်းနဲ့ ဘုန်ကြီးကျောင်းတွေပါ ရွာလုံးကျွတ် မီးလောင်ပျက်စီးခဲ့ရတာ ဖြစ်ပါတယ်။

အာဏာသိမ်းစစ်တပ်က ရေဦးမြို့နယ်မှာရှိတဲ့ ကျေးရွာ ၅၃ ရွာကို ၂ဝ၂၂ ခုနှစ်နဲ့ ၂ဝ၂၃ ခုနှစ်အတွင်း စစ်ကြောင်းထိုးဝင်ရောက်ပြီး မီးရှို့ဖျက်ဆီးခဲ့တာပါ။ အာဏာသိမ်းစစ်တပ် မီးရှို့ဖျက်ဆီးမှုကြောင့်ကျေးရွာ ၅၃ ရွာက အိမ်ခြေပေါင်း ၃၅၀၀ ကျော် မီးလောင်ဆုံးရှုံး ခဲ့ရပြီး သက်ကြီးရွယ်အို၊ ကလေးငယ်နဲ့ ကိုယ်ဝန်ဆောင် အမျိုးသမီးတွေအပါအဝင် အရပ်သားပြည်သူ တစ်သောင်းကျော်မီးဘေးသင့်ခဲ့ရတာပါ။

အာဏာသိမ်းစစ်တပ်ရဲ့ လက်အောက်ခံစစ်သားနဲ့ ပျူစောထီးတွေဟာ ရေဦးမြို့နယ် ရွာမိဿာ၊ တင်းတိမ်ရံ၊ မုံတိုင်ပင်ရွာ၊ ချမ်းသာရွာ၊ ကုံးသာရွာ၊ ရွာသစ်ရွာ၊ ထန်းပင်ကုန်းရွာ၊ ဆည်ကြီးရွာ၊ ပေါက်သာရွာ၊ ဇိန့်ဇွန်းရွာ၊ ပိဋိကပ်ကျရွာ၊ ဇဝရွာ၊ ဝက်ဖိုးရွာ၊ ငှက်ပျောတောရွာ၊ တောင်ကုန်းရွာ၊ ချောင်း ဆုံရွာ၊ သရက်ကန်ရွာ၊ မိုးဒေါင်ရွာ၊ ကွမ်းအုံရွာ၊ ညောင်ပင်သာရွာ စတဲ့ ကျေးရွာတွေကို စစ်ကြောင်းထိုး ဝင်ရောက်ပြီး လူနေအိမ်တွေ ကို မီးရှို့ဖျက်ဆီးခဲ့ကြတယ်လို့ အာဏာသိမ်းစစ်တပ်ရဲ့ အကြမ်းဖက်မှုတွေကို စောင့်ကြည့်သူတွေရဲ့မှတ်တမ်းတွေအရသိရပါတယ်။

ရေဦးမြို့နယ်က ကျေးရွာတွေကို ငါးကြိမ်ထက်မနည်း စစ်ကြောင်းထိုးဝင်ရောက်ပြီး မီးရှို့ဖျက်ဆီးသွားခဲ့တဲ့ အာဏာသိမ်းစစ်တပ် စစ်ကြောင်းဟာ မော်လိုက်အခြေစိုက်တပ်ရင်း ခမရ-၃၄၆နဲ့ မှော်ဘီအခြေစိုက် ရန်ကုန်အထူးပြု ခလရ-၇ဝ၂ တပ်ရင်းတို့ဖြစ်ပြီး အဲဒီကာလမှာ တိုက်ပွဲ ဖြစ်ပွားတာ မရှိဘဲ နယ်မြေရှင်းလင်းရေး လို့ ခေါင်းစဉ်တပ်ကာ လူနေအိမ်တွေပါ မီးရှို့ဖျက်ဆီးသွားခဲ့တဲ့အပြင် မုံတိုင်ပင်ရွာက အရပ်သား သုံးဆယ်ကျော်ကိုလည်း အစုလိုက်အပြုံလိုက် သတ်ဖြတ်သွားခဲ့တယ် လို့ စောင့်ကြည့်လေ့လာထားတဲ့ မှတ်တမ်း တွေအရ သိရပါတယ်။

သွန်းမီ ရေးသားသည်။