ဒီတစ်ပတ်မှာတော့ ဆီးလမ်းကြောင်း ပိုးဝင်ခြင်း၊ တစ်နည်းအားဖြင့် ဆီးပိုးဝင်ခြင်း အကြောင်းကို မျှဝေချင်ပါတယ်။ ဆီးထုတ်ပြွန်၊ ဆီးအိမ်နဲ့ ကျောက်ကပ်ထိ လမ်းကြောင်းတစ်လျှောက်ကို ဆီးလမ်း ကြောင်းလို့ ခေါ်ပါတယ်။ ဝမ်းထဲကနေပါလာတဲ့ ဘက်တီးရီးယားပိုးတချို့ ဆီးလမ်းကြောင်းထဲကို ဝင်တာကြောင့် ဆီးပိုးဝင်ခြင်းကို ဖြစ်စေပါတယ်။ အမျိုးသမီးတွေဟာ အမျိုးသားတွေထက် ဆီးထုတ်ပြွန်တိုတာကြောင့် ဆီးလမ်းကြောင်းပိုးဝင်ဖို့ အခွင့်အလမ်းပိုများပါတယ်။ လိင်ဆက်ဆံခြင်း၊ ကျောက်ကပ် ကျောက်တည်ခြင်း၊ ဆီးအိမ်ကျောက်တည်ခြင်း၊ ဆီးပိုက်ကြာရှည်ထည့်ထားရခြင်း၊ အသက်ကြီးတဲ့အမျိုးသားများ ဆီးကြိတ်ရှိခြင်းကြောင့် ဆီးသွားရခက်နေခြင်းများအပြင် ဆီးချိုရောဂါရှိသူနဲ့ ကင်ဆာဓာတုကုထုံးကုသခြင်းခံနေရသူတွေလို ကိုယ်ခံအားနည်းနေသူများ၊ ရေသောက်နည်းသူများ၊ လိင်အင်္ဂါနဲ့စအိုတဝိုက် သန့်ရှင်းရေးအားနည်းသူများ၊ ဝမ်းချုပ်တတ်သော ကလေးငယ်များ၊ ဆီးသွားချင်လျက် မသွားဘဲ အောင့်ထားတတ်သူများမှာ ဆီးလမ်းကြောင်းပိုးဝင်ခြင်းကို ဖြစ်စေတတ်ပါတယ်။
ဆီးလမ်းကြောင်းပိုးဝင်တဲ့ လက္ခဏာတွေကတော့ ဆီးသွားလျှင် ဆီးပူ၊ ဆီးကျဉ်၊ ဆီးအောင့်ခြင်း၊ ဆီးသွားရခက်ခြင်း၊ ပုံမှန်ထက် မကြာခဏ ဆီးသွားချင်နေခြင်း၊ ပုံမှန်လောက် ဆီးမထိန်းထားနိုင်ဘဲ အပြေးသွားရခြင်း၊ ဆီးထွက်ကျခြင်း၊ ညဘက်တွေမှာ ပုံမှန်ထက် ဆီးထသွားတဲ့အကြိမ်ရေပိုများ နေခြင်း၊ ဆီးအရောင်နောက်ခြင်း၊ ဆီးထဲသွေးရောင်ပါခြင်း၊ ချက်အောက်ပိုင်းနှင့် ဆီးစပ်နေရာများ ကိုက်ခဲနာကျင်ခြင်း၊ ခါးကိုက်ခါးနာခြင်း၊ အဖျားတက်ကာ ချမ်းတုန်နေခြင်း၊ ကိုယ်အပူချိန်ကျကာ အေးစက်နေခြင်းတွေ ဖြစ်ပါတယ်။
ကလေးငယ်တွေမှာဆိုရင် လည်ပင်း၊ ကျော၊ ဗိုက်နေရာများ ပုံမှန်ထက် ပိုပူနေခြင်း၊ နေမကောင်းသလို ဖြစ်နေခြင်း၊ ဆီးပေါက်ချခြင်း၊ ဆီးထွက်ကျခြင်း၊ အဖျားတက်ခြင်း၊ အစားကောင်းကောင်း မစားခြင်း၊ ဂျီကျခြင်း စတဲ့ လက္ခဏာများပြတတ်ပါတယ်။ အသက် အရွယ်ကြီးတဲ့ အဖိုးအဖွားများနဲ့ အိပ်ရာထဲ လဲနေတဲ့ လူနာများမှာ ဆီးလမ်းကြောင်းပိုးဝင်ရင်တော့ ပုံမှန်ထက် စိတ်တိုစိတ်ဆတ်နေခြင်း၊ ပုံမှန်ထက်ပို၍ ဆီးထွက်ကျခြင်း၊ ဆီးပေါက်ချခြင်း၊ မေးရိုက်ပြီးချမ်းတုန်နေခြင်းများ ဖြစ်တတ်ပါတယ်။
ဆီးလမ်းကြောင်းပိုးဝင်ခြင်းမှာ မပြင်းထန်ဘဲ ဆီးပူ ဆီးကျဉ်ရုံလောက်သာဆိုရင် ရေများများသောက်ခြင်း၊ ဆီးများများသွားခြင်းဖြင့် သက်သာပျောက်ကင်းနိုင်ပါတယ်။ (၂) ရက်ခန့်ကြာသည်အထိ မသက်သာဘဲ အဖျားကြီးပြီး ချမ်းတုန်ခြင်း၊ ဆန့်ကျင်ဘက်ဖြစ်သော အေးစက်နေခြင်း၊ အလွန်နုံးခွေလာခြင်း၊ ဗိုက်အောင့်ခြင်း၊ ခါးနာခြင်း၊ ဆီးထဲသွေးပါခြင်း စတဲ့ ပိုပြင်းထန်တဲ့ လက္ခဏာတွေပြလာရင်တော့ ဆေးရုံဆေးခန်းသွားပြီး ကုသမှုခံယူဖို့လိုပါမယ်။
အကယ်၍ ဆီးလမ်းကြောင်းပိုးဝင်တဲ့ လက္ခဏာတွေကို ပထမဆုံးအကြိမ် စတင်ခံစားဖူးခြင်း၊ ခံစား ရသူမှာ ကလေးငယ် သို့မဟုတ် အဖိုးအဖွားများ၊ အခြားရောဂါအခံရှိသူ၊ ကိုယ်ဝန်ရှိသူများ ဆိုလျှင်လည်း ဆေးရုံဆေးခန်းမှာ ကုသမှုခံယူရပါမယ်။ လိုအပ်လျှင် ဆီးစစ်တာ၊ ဆီးပိုးမွေးပြီး ပိုးအမျိုးအစားရှာဖွေတာတွေ လုပ်ဖို့လိုပါမယ်။
ကုသမှုမှာ အဖျားတက်၊ နာကျဉ်ကိုက်ခဲခြင်းတွေအတွက် အကိုက်အခဲပျောက်ဆေးနဲ့ ဘက်တီးရီးယားအတွက် သင့်လျော်တဲ့ပဋိဇီဝပိုးသတ်ဆေးကို ဆရာဝန်ညွှန်ကြားချက်ဖြင့် သောက်ရပါမယ်။ ဆေးတစ်ကြိမ်၊ နှစ်ကြိမ်သောက်ပြီး သက်သာသွားရင်လည်း ဆေးကိုရပ်မပစ်ဘဲ အကြိမ်ရေမှန်အောင်၊ ရက်ပြည့်အောင် သောက်ဖို့လိုပါတယ်။ ပဋိဇီဝပိုးသတ်ဆေးတွေဟာ ရက်ပြည့်အောင် မသောက်ရင် ဆေးယဉ်ပါးသွားတတ်ပြီး နောက်အကြိမ်တွေမှာ ဆေးမတိုးတော့တာ မျိုး ဖြစ်တတ်ပါတယ်။
ဆီးလမ်းကြောင်းပိုးဝင်ခြင်း မဖြစ်စေရန် ကာကွယ်နိုင်ဖို့ ကျင့်သုံးနိုင်တဲ့ ကိစ္စတွေကတော့ အိမ်သာသွားပြီးလျှင် ဆေးကြောသည့်အခါ အရှေ့မှ အနောက်ကို ဆေးရန်၊ လိင်အင်္ဂါတဝိုက်ကို သန့်ရှင်းအောင်ထားရန်၊ ဆီးမအောင့်ထားရန်၊ ဆီးသွားရင် ဆီးကုန်အောင်သွားရန်၊ ရေများများ သောက်ရန်၊ လိင်မဆက်ဆံမီနှင့် လိင်ဆက်ဆံပြီးချိန်များတွင် လိင်အင်္ဂါတဝိုက်ကို ရေဖြင့်ဆေးကြော ရန်၊ လိင်ဆက်ဆံပြီးလျှင် ချက်ချင်းဆီးသွားရန်၊ မိမိနှင့် မတည့်သောအကာအကွယ်သုံး ကွန်ဒုံးများ မသုံးဘဲ တည့်သောအမျိုးအစား ပြောင်းသုံးရန်၊ ဒိုင်ပါကဲ့သို့သော အမျိုးသမီးလစဉ်သုံးပစ္စည်းကဲ့သို့သော အညစ်အကြေးခံပစ္စည်းများ အချိန်ကြာကြာ စိုမနေစေဘဲ လဲလှယ်ရန်၊ သန့်ရှင်းခြောက်သွေ့သော ပွပွ ချောင်ချောင် ချည်ထည်အတွင်းများ ဝတ်ဆင်ရန် တို့ဖြစ်ပါတယ်။
ဆောင်ရန်ရှောင်ရန်များနဲ့ သတိပြုရမယ့် အရေးကြီးလက္ခဏာများကို ဂရုစိုက်ခြင်းဖြင့် ဆီးလမ်းကြောင်း မကြာခဏပိုးဝင်ခြင်း၊ အချိန်ကြာရှည်စွာပိုးဝင်ခြင်းများ မဖြစ်အောင် ကာကွယ်နိုင်မယ်လို့ မျှော်လင့်ပါတယ်။
CDM အထွေထွေဆရာဝန် ဒေါက်တာစန္ဒီ ရေးသားသည်။
