ဇူလိုင် ၄၊ The Nation Voice
သတင်း- ငြိမ်း
မန္တလေးတိုင်း၊ မတ္တရာမြို့နယ်မှာ အာဏာသိမ်းစစ်တပ်က တိုက်ပွဲဖြစ်ပွားတာမရှိဘဲ လေကြောင်းနဲ့ လက်နက်ကြီးတို့ ပစ်ခတ်တိုက်ခိုက်နေတယ်လို့ ပြည်သူ့ကာကွယ်ရေးတပ်မတော် (မန္တလေး) ကထုတ်ပြန်ထားပါတယ်။
ဇူလိုင်လ ၃ရက် နေ့လယ် ၃နာရီမှာ အာဏာသိမ်းစစ်တပ်ဟာ မတ္တရာမြို့နယ်၊ ဝေါရွာသစ်ကျေးရွာကို တိုက်ပွဲဖြစ်တာမရှိဘဲ လေကြောင်းတိုက်ခိုက်ခဲ့တာကြောင့် ကလေးငယ်တစ်ဦးသေဆုံးခဲ့ပြီး နို့စို့အရွယ်ကလေးငယ်တစ်ဦးအပါအဝင် ခုနစ်ဦးထိခိုက်ဒဏ်ရာရခဲ့တယ်လို့ သိရပါတယ်။
ဒါ့အပြင် မတ္တရာမြို့ပေါ်ကနေ ဝေါရွာသစ်ကျေးရွာကို အာဏာသိမ်းစစ်တပ်က လက်နက်ကြီးတွေနဲ့ ပစ်ခတ်ခဲ့တာကြောင့် အသက် ၇၅နှစ်အရွယ် အမျိုးသားတစ်ဦးသေဆုံးခဲ့ပြီး ၁၀ဦးဝန်းကျင် ထိခိုက်ဒဏ်ရာရခဲ့တယ်လို့ ထုတ်ပြန်ထားပါတယ်။
အာဏာသိမ်းစစ်တပ်ဟာ အရပ်သားတွေအပေါ် မဆင်မခြင် ဦးတည်တိုက်ခိုက်မှုတွေ မကြာခဏကျူးလွန်နေတာကြောင့် မတ္တရာြမို့နယ်ခံအများစုဟာ စစ်ဘေးလွတ်ရာဒေသတွေကို ပြောင်းရွှေ့နေထိုင်နေရတယ်လို့ ဆိုပါတယ်။
အာဏာသိမ်းစစ်တပ်ဟာ မတ္တရာမြို့နယ်အတွင်းမှာ တိုက်ပွဲဖြစ်ပွါးခြင်းမရှိတဲ့ ကျေးရွာတွေကို အကြောင်းမဲ့ လေကြောင်းတိုက်ခိုက်မှုတွေနဲ့ လက်နက်ကြီးပစ်ခတ်မှုတွေ ပေါ်ပေါ်ထင်ထင် ကျူးလွန်လျက်ရှိတယ်လို့ ပြည်သူ့ကာကွယ်ရေးတပ်မတော် (မန္တလေး) ကထုတ်ပြန်ထားပါတယ်။
