ဇူလိုင် ၂၄
ကမ္ဘောဒီးယားနိုင်ငံက ထိုင်းနိုင်ငံ အရှေ့မြောက်ပိုင်း၊ ဆူရင်ပြည်နယ်မှာရှိတဲ့ ထိုင်းစစ်စခန်းတစ်ခုကို ဇူလိုင်လ ၂၄ ရက် ဒီနေ့ မနက်မှာ စတင်ပစ်ခတ်ခဲ့ပြီး နောက် နှစ်နိုင်ငံ စစ်ရေးအခြေအနေ တင်းမာနေရာ အမြန်ဆုံးငြိမ်းချမ်းစွာ ဖြေရှင်းရန် အမျိုးသားညီညွတ်ရေးအစိုးရ (NUG )က ဒီနေ့ညနေမှာ တိုက်တွန်းလိုက်ပါတယ်။
နှစ်နိုင်ငံကြား ပစ်ခတ်မှုတွေကြောင့် ပြည်သူတွေကို ထိခိုက်မှု ရှိလာနိုင်တာမို့ အရပ်သား ပြည်သူရဲ့ လုံခြုံရေးကို အထူးစိုးရိမ်မိတယ်လို့လည်း NUG က ထုတ်ပြန်ထားပါတယ်။
ဒါကြောင့် နှစ်နိုင်ငံ ငြိမ်းချမ်းစွာ ဖြေရှင်းဖို့ အာဆီယံအဖွဲ့ဝင်နိုင်ငံတစ်နိုင်ငံ အနေနဲ့ တိုက်တွန်းပါတယ်လို့လည်း NUG က ထုတ်ပြန်ထားပါတယ်။
ထိုင်း၊ ကမ္ဘောဒီးယားနဲ့ မြန်မာနိုင်ငံသား တို့မှာ ထိုင်းနိုင်ငံအတွင်းရှိ လုပ်ငန်းခွင်များတွင် အတူတကွ လုပ်ကိုင်နေထိုင်ကြတာဖြစ်တဲ့အတွက် မြန်မာနိုင်ငံသားတွေအနေနဲ့ ပဋိပက္ခကို ပိုမိုတင်းမာစေတဲ့ ပြောဆိုရေးသားမှုတွေကို ဆင်ခြင်ကြဖို့လည်း NUG ကအထူးတိုက်တွန်းထားပါတယ်။
ကမ္ဘောဒီးယားစစ်တပ်က ပစ်ခတ်မှုများကြောင့် ထိုင်းစစ်သား တစ်ဦးနဲ့ အရပ်သား ၁၁ ဦး သေဆုံးခဲ့ပြီးတော့ ၃၅ ဦး ဒဏာ်ရာ ရရှိခဲ့တယ်လို့ ဒီနေ့ ညနေမှာ ထိုင်းအစိုးရက ထုတ်ပြန်ထားပါတယ်။
အရပ်သားများကို ပစ်မှတ်ထားတိုက်ခိုက်ခဲ့တဲ့ ကမ္ဘောဒီးယားကို နိုင်ငံတကာက ရှုတ်ချဖို့ ထိုင်းအစိုးရက ဒီကနေ့မှာ တောင်းဆိုထားပါတယ်။
ကမ္ဘောဒီးယားဝန်ကြီးချုပ်ဟောင်း ဟွန်ဆန် တရုတ်ပြည်ကို ထွက်ပြေးသွားတယ် လို့ သတင်းတွေ ထွက်ပေါ်နေတာကို ငြင်းဆိုထားပြီး စစ်ပွဲကို ကွပ်ကဲနေတယ်လို့ ကမ္ဘောဒီးယားအစိုးရက ထုတ်ပြန်ထားပါတယ်။
ကမ္ဘောဒီးယား အနေနဲ့ ထိခိုက်၊သေဆုံးမှု တစ်စုံတစ်ရာ ထုတ်ပြန်ထားခြင်း မရှိသေးပါဘူး။
ကံ့ကော် ရေးသားသည်။
