ဇူလိုင် ၂၅
မကွေးတိုင်း၊ ဆိပ်ဖြူမြို့နယ်က တော်လှန်ရေးအဖွဲ့ရဲ့ စိုးမိုးနယ်မြေမှာ အမျိုးသမီးတစ်ဦးအသတ်ခံခဲ့ရပြီး တစ်လနီးပါးကြာတဲ့အထိ ကျူးလွန်သူမမိသေးဘူးလို့ ဒေသခံတွေဆီက စုံစမ်းသိရပါတယ်။
ဇူလိုင်လ ၁ရက် ညပိုင်းမှာ ဆိပ်ဖြူမြို့နယ်၊ တက်မရွာမှာနေထိုင်တဲ့ ဒေသခံ အသက် ၄၅နှစ်အရွယ် ဒေါ်စန်းမူကို နေအိမ်ထိလာခေါ်သွားပြီးနောက် ဇူလိုင်လ ၂ရက် မနက်ပိုင်းမှာ တက်မရွာရဲ့အနောက်တောင်ဘက်နားက တက်မချောင်းဘေးမှာ အလောင်းကိုတွေ့ရှိခဲ့တယ်လို့ သိရပါတယ်။
အသတ်ခံရတဲ့ဖြစ်စဉ်ကို သိသိချင်း ဆိပ်ဖြူပကဖရဲ့ မြို့နယ်တာဝန်ခံနဲ့ ပြည်သူ့လုံခြုံရေးအဖွဲ့ ပလဖကို အမှုဖြစ်စဉ်ကို ဆက်သွယ်တိုင်ကြားထားတာရှိပေမယ့် အခုချိန်ထိစုံစမ်းစစ်ဆေးတာ မရှိသေးဘူးလို့ သေဆုံးသူ ဒေါ်စန်းမူ နဲ့နီးစပ်သူထံကနေ သိရပါတယ်။
“အလောင်းတွေ့တာတော့ ပကဖရဲဘော်တွေ သွားပြီးတော့ ကြည့်တယ်လို့တော့ ပြောပါတယ်။ ကြည့်ပြီးတော့မှလည်း ဒီနေ့အချိန်ထိ စစ်ဆေးစုံစမ်းဖော်ထုတ်တာမျိုးလည်း မကြားရသေးဘူး။ ပြည်သူတစ်ယောက်အသတ်ခံရတယ်။ ပြီးတော့ PDFစိုးမိုးနယ်မြေဖြစ်သည့်အတွက် ဒီအမှုမှန်ကို အမြန်ဆုံးပေါ်ပေါက်စေချင်တယ်။ အမြန်ဆုံးပေါ်ပေါက်အောင် ဖော်ထုတ်ပေးပါလို့လည်း တောင်းဆိုချင်ပါတယ်။ အခုချိန်ထိ ဒီအမှုက ဘာမှသဲလွန်စမရသေးဘူးဖြစ်နေတာ။ PDFစိုးမိုးနယ်မြေမှာ ဒီလိုမတရားအသတ်ခံရတာက အဖွဲ့အစည်းတွေကို စော်ကားရာလည်းကျတယ်။ ပြီးတော့ နယ်ခြေခံအဖွဲ့အစည်းတွေကလည်း အလုပ်ကို တာဝန်ယူမှု တာဝန်ခံမှု အပြည့်နဲ့ အလုပ်လုပ်စေချင်တယ်။ စိုးမိုးနယ်မြေမှာ လူသတ်မှုကို အမှုမှန်ပေါ်အောင် မဖော်ထုတ်ပေးနိုင်ရင် ပြည်သူတွေမှာ ဘယ်လိုလုံခြုံမှုရှိမှာလဲ” လို့ သေဆုံးသူ ဒေါ်စန်းမူ နဲ့နီးစပ်သူ ကပြောပါတယ်။
အသတ်ခံရတဲ့ ဒေါ်စန်းမူရဲ့ ရုပ်အလောင်းကို တက်မချောင်းဘေးမှာ ကျည်ခွံသုံးခွံနဲ့အတူတွေ့တာဖြစ်ပြီး အလောင်းမှာ နားရွက်ပြတ်ခါနီးဒဏ်ရာ၊ ခေါင်းတစ်ခြမ်းကြေမွဒဏ်ရာနဲ့ ရင်ညွန့်အောက်က နံရိုးကြားမှာ ချွန်ထက်တဲ့အရာတစ်ခုနဲ့ ထိုးထားတဲ့အပေါက်မျိုးတွေ့ရတယ်လို့ သူကဆိုပါတယ်။
“ဒေသခံအဖွဲ့အစည်းတွေကို မေးကြည့်တော့ စုံစမ်းတယ်လို့ပဲပြောတယ်။ အခုချိန်ထိ သံသယတရားခံတောင် ပေါ်လွင်တာမရှိသေးဘူး” လို့ သူက ဆက်လက်ပြောပြပါတယ်။
အခုဖြစ်စဉ်နဲ့ ပတ်သက်ပြီး တက်မရွာနဲ့ အနီးတဝိုက်မှာရှိတဲ့ ဆိပ်ဖြူမြောက်ပိုင်းပြည်သူ့ကာကွယ်ရေးတပ်ဖွဲ့ရဲ့ လူမှုကွန်ယက်စာမျက်နှာမှာ ဇူလိုင်လ ၂၁ ရက်နေ့က The Nation Voice က ဆက်သွယ်မေးမြန်းထားပေမယ့် ဇူလိုင်လ ၂၅ ရက်နေ့အထိ လက်ခံဖြေဆိုပြီး အကြောင်းပြန်တာမျိုးမရှိသေးပါဘူး။
ငြိမ်း ရေးသားသည်။
