စစ်ကိုင်းတိုင်း၊ ကလေးမြို့နယ်တောင်ပိုင်းက ကျန်းမာရေးစောင့်ရှောက်မှုပေးနေတဲ့ ဆေးရုံ၊ ဆေးခန်းတွေကို ပစ်မှတ်ထားပြီး အာဏာသိမ်းစစ်တပ်က လေကြောင်းဗုံးကြဲတိုက်ခိုက်တာတွေ ဆက်တိုက်ပြုလုပ်နေတယ်လို့ People’s Healthcare Network (Kalay) ရဲ့ တာဝန်ရှိသူတစ်ဦးက The Nation Voice ကို ပြောပါတယ်။
ကလေးမြို့နယ် တောင်ပိုင်းက ရွှေတောင်ကြား တော်လှန်ရေးဆေးရုံ၊ တောင်ပိုင်းတိုက်နယ်ဆေးရုံ၊ Medical Centre (4) နဲ့ လူနာသယ်ပို့နားတဲ့ စာသင်ကျောင်း၊ ဘုန်းကြီးကျောင်းတွေကို အာဏာသိမ်းစစ်တပ်က ဂျက်ဖိုက်တာ လေယာဉ်အသုံးပြုပြီး ဖေဖော်ဝါရီ ၁၃ရက် ၁၄ ရက် နဲ့ ၂၃ ရက်နေ့တွေမှာ ဗုံးကြဲတိုက်ခိုက်တယ်လို့ ဆိုပါတယ်။
“တောင်ပိုင်းတိုက်နယ်ဆေးရုံကို ဖေဖော်ဝါရီ ၁၄ မှာ တစ်ခါကြဲတယ်၊ ၂၃ မှာတစ်ခါကြဲတယ်၊ ဆေးရုံကတော့ အဆောက်အဦအကုန်လုံးနီးပါး ပျက်စီးသွားတယ်၊ ကျန်းမာရေးဝန်ထမ်းတွေလည်း ထိခိုက်ဒဏ်ရာရတယ်၊ Medical Center (4) ကို ကြဲတုန်းကလည်း အရေးပေါ်ခွဲစိတ်ကုသမှု လုပ်နေတဲ့အချိန်ကြီး ကြဲချသွားတာ၊ ပြည်သူ ၃ ဦး သေတယ်၊ ထိခိုက်ဒဏ်ရာတွေလည်း ရကြတယ်” လို့ PHN-Kalay ရဲ့တာဝန်ရှိသူက ပြောပါတယ်။
အာဏာသိမ်းစစ်တပ်ရဲ့ လေကြောင်းတိုက်ခိုက်မှုတွေအတွင်း အရပ်သားပြည်သူ ၃ ဦး သေဆုံးကာ ၃ ဦး ဒဏ်ရာရရှိခဲ့ပြီး ကျန်းမာရေးဝန်ထမ်း ၇ ဦးလည်း ထိခိုက်ဒဏ်ရာရခဲ့တယ်လို့ ဆိုပါတယ်။
အာဏာသိမ်းစစ်တပ်ဟာ ကလေးမြို့နယ် မြောက်ပိုင်းက မြောက်ပိုင်းတိုက်နယ်ဆေးရုံကိုလည်း ဖေဖော်ဝါရီ ၂၀ ရက်နေ့မှာ လေကြောင်းတိုက်ခိုက်မှု နှစ်ကြိမ်ပြုလုပ်ခဲ့ပါတယ်။ အဆိုပါတိုက်ခိုက်မှုမှာတော့ ဆေးရုံကို တိုက်ရိုက်မထိမှန်ခဲ့ဘူးလို့ ဆိုပါတယ်။
လက်ရှိမှာ အာဏာသိမ်းစစ်တပ်ရဲ့ လေကြောင်းဗုံးကြဲတိုက်ခိုက်မှုတွေကြောင့် ကလေးမြို့နယ်တောင်ပိုင်းက ကျေးရွာ ဆယ်ရွာထက်မနည်းက အရေးပေါ်စစ်ဘေးရှောင်နေကြရပြီး ဒေသခံပြည်သူ နှစ်သောင်း ဝန်းကျင်အတွက် စားနပ်ရိက္ခာနဲ့ ကျန်းမာရေးအကူအညီတွေ လိုအပ်နေတယ်လို့ ဒေသခံတွေနဲ့ People’s Healthcare Network (Kalay) အဖွဲ့ရဲ့ အချက်အလက်တွေအရ သိရပါတယ်။
အာဏာသိမ်းစစ်တပ်ဟာ အခုနှစ်စပိုင်းကစလို့ စစ်ကိုင်းတိုင်းနဲ့ မကွေးတိုင်းအတွင်းက တော်လှန်ရေးအင်အားစုတွေထိန်းချုပ်ရာ ဒေသတွေကို လေကြောင်းတိုက်ခိုက်မှုတွေ အရှိန်မြှင့် လုပ်ဆောင်နေပြီး တိုက်ပွဲမရှိတဲ့ ဒေသတွေကိုပါ ပစ်မှတ်ထားတိုက်ခိုက်နေတယ်လို့ ဒေသတွင်း သတင်းရင်းမြစ်တွေက မှတ်ချက်ပြုပါတယ်။
“စကစဟာ ၂၀၂၄ တစ်နှစ်လုံး ထောက်လှမ်းရေးကောင်းကောင်းလုပ်ပြီး မြေပုံညွှန်းတွေ စုခဲ့ပုံရတယ်။ အများစုတိုက်ခိုက်ခံရတာတွေက တော်လှန်ရေးအင်အားစုတွေ ခရီးသွားရင်း တစ်ထောက်နားတတ်တဲ့နေရာတွေ၊ ထင်ရှားတဲ့ထောက်ပို့လမ်းကြောင်းတွေ၊ ဒဏ်ရာရလူနာတွေကို သယ်ထုတ်ရာလမ်းကြောင်းတွေ၊ တော်လှန်ဆေးရုံနဲ့ကျောင်းတွေ၊ တော်လှန်ရေးအင်အားစုတွေ ရုံးဒါမှမဟုတ် စခန်းအဖြစ် အသုံးပြုနေတယ်လို့ သူတို့ယူဆတဲ့ ယခင်နိုင်ငံတော်ပိုင်အဆောက်အဦတွေဖြစ်နေတာကို တွေ့ရှိရတယ်” လို့ စစ်ကိုင်းတိုင်းအတွင်း နိုင်ငံရေးလေ့လာသုံးသပ်သူ ဦးစိုးဝင်းဆွေ(HPD) ကဆိုပါတယ်။
တော်လှန်ရေးအဖွဲ့တွေရဲ့ စိုးမိုးနယ်မြေဒေသမှာ နေထိုင်ကြသူတွေအနေနဲ့ အာဏာသိမ်းစစ်တပ်ရဲ့လေကြောင်းတိုက်ခိုက်မှုတွေ အထူးဂရုပြုသင့်ပြီး လေကြောင်းရန်အကာအကွယ်တွေအတွက် အထူးပြင်ဆင်ထားဖို့ကိုလည်း ဒေသတွင်းကာကွယ်ရေးတပ်ဖွဲ့တွေက တိုက်တွန်းထားပါတယ်။
ပြီးခဲ့တဲ့ ဖေဖော်ဝါရီလ ၂၅ ရက်နေ့ကလည်း မကွေးတိုင်း၊ မြိုင်မြို့နယ်က မင်္ဂလာဆောင်တစ်ခုကို အာဏာသိမ်းစစ်တပ်က ပေါင် ၅၀၀ဗုံးနဲ့ ကြဲချတိုက်ခိုက်ခဲ့တာကြောင့် အနည်းဆုံး ၁၁ဦး သေဆုံးပြီး ၁၀ဦးကျော်ဒဏ်ရာရခဲ့ပါတယ်။
မျှော်စင် ရေးသားသည်။
