ဇူလိုင် ၃၁
မကွေးတိုင်း၊ စလင်းမြို့နယ်၊ တညောင်တိုက်နယ်က တညောင်ရဲစခန်း မီးရှို့ခံရပြီးနောက် အင်အားအများအပြားနဲ့ စစ်ကြောင်းထိုးနေတဲ့ အာဏာသိမ်းစစ်တပ်ကို တိုက်ခိုက်ခဲ့တယ်လို့ စလင်းမြို့နယ်ပြည်သူ့ကာကွယ်ရေးအဖွဲ့ ဇုန် ၃က ကိုကျော်ကြီးက The Nation Voice ကိုပြောပါတယ်။
တညောင်စခန်းတိုက်ခိုက်ခံရပြီးနောက် မနေ့ကနေ့လယ် ၁၂နာရီဝန်းကျင်မှာ ဆိပ်ဖြူဘက်ကလာတဲ့ အာဏာသိမ်းစစ်တပ်စစ်ကြောင်းက ရဲနဲ့ ခြေမြန်တပ်က စစ်သားအင်အားအများအပြားနဲ့ တညောင်ရွာနဲ့အနီးတဝိုက်ကို စစ်ကြောင်းဖြန့်ထားတယ်လို့ တညောင်တိုက်နယ်က ဗိုလ်သတ္တိက The Nation Voice ကိုပြောပါတယ်။
“တညောင်ရဲ့ နေရာအနှံ့အပြားမှာလည်းနေရာအများကြီးဖြန့်ထားတယ်။ EPCမှာရော တညောင်တကြောမှာရော အများကြီးဖြန့်ထားတယ်။ အနေအထားအရ ပတ်ပတ်လည်ဝန်းရံထားတာဆိုတော့ အင်အား ၃၀၀ ဝန်းကျင်လောက်ရှိတယ်လို့ခန့်မှန်းရတယ်။ ထူးခြားတာတော့ ခုလိုအင်အားများစွာနဲ့ရောက်ချလာတယ်။ စခန်းအတွက်နယ်မြေရှင်းလင်းရေးလုပ်ဖို့နဲ့ သဂြိုလ်ဖို့ ရောက်လာတယ်လို့ သတင်းရထားပါတယ်။ စခန်းထဲဝင်တာခဏပဲ။ ဒါပေမယ့် တညောင်တဝိုက် အနှံ့အပြားတော့ ကင်းတွေ ပတ်လည်ယူနေတာ တွေ့ရတယ်” လို့ ဗိုလ်သတ္တိက ဆက်ပြောပါတယ်။
မနေ့ကညနေပိုင်းက အင်အား ၁၅၀ ဝန်းကျင်ပါတဲ့ အာဏာသိမ်းစစ်တပ် စစ်ကြောင်းက တညောင်ရွာရဲ့ မြောက်ဘက်က မြောက်တောကျောင်းမှာ တညောင်ရွာကစစ်ရှောင်လာတဲ့ စစ်ရှောင်တွေထဲက ငါးဦးကို လမ်းပြအဖြစ်ခေါ်သွားပြီး မိုင်းကွင်းတွေထဲ ဖြတ်ပြီး ပြန်ဆုတ်သွားတယ်လို့သိရပါတယ်။
အခုလို အင်အားအများအပြားနဲ့ စစ်ကြောင်းထိုးလာတဲ့ အာဏာသိမ်းစစ်တပ်ကို မဟာမိတ်တွေနဲ့အတူ လက်နက်ကြီးတွေနဲ့ တိုက်ခိုက်ခဲ့တယ်လို့ စလင်းမြို့နယ်ပြည်သူ့ကာကွယ်ရေးအဖွဲ့ ဇုန် ၃က ကိုကျော်ကြီးက The Nation Voice ကိုပြောပါတယ်။
“ မနေ့ညနေပိုင်းက မြောက်တောကျောင်းကနေ ကင်းပုန်းတက်လာတာကိုလည်း ကျွန်တော်တို့ကိုယ်တိုင် လက်နက်ကြီးထောက်တယ်။ ဒီနေ့မနက်မှာ တောင်ဖီလာရွာကို စစ်ကြောင်းထိုးလာတာကိုတော့ မဟာမိတ်တွေနဲ့ ပစ်ခတ်ခဲ့တာပါ။ ဆယ်မိနစ်လောက် ထိတွေ့မှုဖြစ်ပါသေးတယ်။ မနက်ကပွဲမှာ ရန်သူ့ဘက်မှ လက်နက်ကြီး သုံးလုံးလည်းထောက်ပါတယ်” လို့ ကိုကျော်ကြီးက ဆက်ပြောပါတယ်။
စစ်ကြောင်းထိုးလာတဲ့ အာဏာသိမ်းစစ်တပ်ကို စလင်းပကဖ ဇုန် ၃၊ သခင်ဖိုးလှကြီးအဖွဲ့၊ ပခုက္ကူခရိုင်အမှတ် ၄တပ်ရင်းနဲ့ သိန်းငှက်နက် ဒရုန်းလက်ရုံးတပ်တို့က ၆၀မမ လက်နက်ကြီး အလုံး ၂၀၊ ၈၁ မမလက်နက်ကြီး နှစ်လုံးတို့နဲ့ ပစ်ခတ်ခဲ့ပြီး ဒရုန်းကတော့ ဂျန်ပါမိတာကြောင့် ကင်းပဲထောက်ခဲ့ရတယ်လို့ သိရပါတယ်။
အဲဒီတိုက်ခိုက်မှုကြောင့် အာဏာသိမ်းစစ်တပ်ဟာ EPCကိုပြန်လည်ဆုတ်ခွာသွားပြီး ထိခိုက်မှုအခြေနေကို မသိရသေးဘူးလို့ဆိုပါတယ်။
အာဏာသိမ်းစစ်တပ်ဟာ တညောင်ရွာထဲက ကုန်စုံဆိုင်၊ အရက်ဆိုင်၊ ဖုန်းဆိုင် စတဲ့ဆိုင်တွေကနေ ပစ္စည်းတွေယူဆောင်တာအပြင် အိမ်တွေထဲက ပစ္စည်းတွေ၊ အိမ်မွေးတိရိစ္ဆာန်တွေကို ယူဆောင်ပြီး ထန်းနှစ်ပင်နဲ့ မြို့လှရွာကြားက EPCကို ကားတွေနဲ့ ဒီနေ့နေ့လယ်ပိုင်းမှာ ပို့ဆောင်တာတွေလုပ်နေတယ်လို့လည်း စုံစမ်းသိရပါတယ်။
အာဏာသိမ်းစစ်တပ်ရဲ့ စစ်ကြောင်းထိုး၊ အင်အားဖြန့်ထားမှုတွေကြောင့် တညောင်ရွာအနီးတဝိုက်က ဒေသခံတွေ ရှောင်တိမ်းနေရတယ်လို့ ဒေသခံတွေကပြောပါတယ်။
ပြည်သူတွေအနေနဲ့ အာဏာသိမ်းစစ်တပ်နဲ့ ထိပ်တိုက်မတွေ့အောင်နေထိုင်ကြဖို့၊ လေကြောင်းအန္တရာယ်နဲ့ စစ်ကြောင်းအန္တရာယ်တွေကို ဂရုစိုက်ကြဖို့ကိုလည်း တညောင်တိုက်နယ်က ဗိုလ်သတ္တိက ပြည်သူတွေကို အသိပေးထားပါတယ်။
ဇူလိုင်လ ၃၀ ရက်မနေ့က မနက် ၄နာရီ မိနစ် ၅၀မှာ စလင်းပကဖက တညောင်ရဲစခန်းကို ဝင်ရောက်တိုက်ခိုက်ပြီး ၃နာရီအကြာမှာ စခန်းတစ်ခုလုံးကို တိုက်ခိုက်မီးရှို့နိုင်ခဲ့တာ ဖြစ်ပါတယ်။
ငြိမ်း ရေးသားသည်။
