ဖမ်းဆီးခံထားရတဲ့ ဒေါ်အောင်ဆန်းစုကြည်အပါအဝင် ပြည်သူတွေကို လွှတ်ပေးဖို့၊ အကြမ်းဖက်မှုတွေ ချက်ချင်းရပ်တန့်ဖို့ နဲ့ မြန်မာ့ ဒီမိုကရေစီစနစ် ဖော်ဆောင်ဖို့ စတဲ့အချက်သုံးချက်ကို ဂျပန်နိုင်ငံခြားရေးဝန်ကြီး အိဝါယ တာကဲရှိက ဩဂုတ်လ ၁ ရက်နေ့ ရက်စွဲ နဲ့ တောင်းဆိုလိုက်ပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဖမ်းဆီးခံထားရတဲ့အပြင် လေကြောင်းတိုက်ခိုက်မှုနဲ့ အကြမ်းဖက်မှုလုပ်ရပ် တွေဆက်လက်ဖြစ်ပွားနေတဲ့အချိန်မှာ ရွေးကောက်ပွဲကျင်းပတာကို စိုးရိမ်တယ်လို့လည်း ဂျပန်နိုင်ငံခြားရေးဝန်ကြီးက ဆိုပါတယ်။
မြန်မာနိုင်ငံရေးက အာဏာသိမ်းပြီး လေးနှစ်ခွဲကြာတဲ့အထိ တိုးတက်မှုမရှိတဲ့ အပေါ်မှာလည်း စိုးရိမ်တယ်လို့ ဒီကနေ့ထုတ်ပြန်ချက်မှာ သူကပြောထားပါတယ်။
နိုင်ငံတော်စီမံအုပ်ချုပ်ရေးကောင်စီ(နစက)ကနေ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်(နလအ)အဖြစ် ဖွဲ့စည်းခဲ့ပြီး လာမယ့်ခြောက်လအတွင်း ရွေးကောက်ပွဲကျင်းပမယ်ဆိုတဲ့ အာဏာသိမ်းစစ်ခေါင်းဆောင်ရဲ့လုပ်ရပ်အပေါ် မှာ ဂျပန်နိုင်ငံခြားရေးဝန်ကြီး အိဝါယ တာကဲရှိက ရှုတ်ချလိုက်တာ ဖြစ်ပါတယ်။
သက်ဆိုင်ရာပါတီတွေနဲ့ ဆွေးနွေးတာမျိုးမရှိဘဲ ရွေးကောက်ပွဲလုပ်မယ်ဆိုရင် ပြည်သူတွေဆီကနေ ပိုပြီးပြင်းထန်တဲ့ တုံ့ပြန်မှုတွေ ရရှိလာပြီး ငြိမ်းချမ်းစွာဖြေရှင်းမှု ပိုခက်ခဲလာမှာကိုလည်း စိုးရိမ်တယ်လို့ သူကဆိုထားပါတယ်။
ဂျပန်နိုင်ငံအနေနဲ့ မြန်မာပြည်သူတွေရဲ့ အသံကို အလေးထားနားထောင်လျက်ရှိပြီး လူသားချင်းဆိုင်ရာ ကူညီမှုအထောက်အပံ့တွေ ဆက်ရှိနေမယ်လို့လည်း ထုတ်ပြန်ချက်မှာဖော်ပြထားပါတယ်။
အာဏာသိမ်းစစ်တပ်က အရေးပေါ်အခြေအနေကို ရုတ်သိမ်းလိုက်ပြီး ရွေးကောက်ပွဲကျင်းပမယ်လို့ ပြောကြားပြီးတဲ့နောက်မှာ တရုတ်နိုင်ငံအနေနဲ့ အပြုသဘောဆောင်တဲ့ ကူညီမှုတွေလုပ်ဖို့ ဆန္ဒရှိတယ်လို့ တရုတ်နိုင်ငံခြားရေး ဝန်ကြီးဌာနက ပြောရေးဆိုခွင့်ရှိသူ Guo Jiakun က ဇူလိုင်လ ၃၁ ရက်နေ့ သတင်းစာရှင်းလင်းပွဲမှာပြောခဲ့ပါတယ်။
မြန်မာနိုင်ငံ တည်ငြိမ်ရေး၊ ငြိမ်းချမ်းရေးနဲ့ ပြန်လည်သင့်မြတ်ရေးတွေကို အထူးအလေးထား ပံ့ပိုးကူညီနေတယ်လို့ သူကပဲ ဆက်ပြောထားပါတယ်။
ကံ့ကော် ရေးသားသည်။
