ဇူလိုင် ၄၊ The Nation Voice
သတင်း- TNV စစ်ကိုင်းရုံးခွဲ
စစ်ကိုင်းတိုင်း၊ ချောင်းဦးမြို့နယ်မှာ ကင်းပုန်းဝပ်ဖို့ထွက်လာတဲ့ အာဏာသိမ်းစစ်တပ်ကို မိုင်းဆွဲတိုက်ခိုက်ခဲ့တယ်လို့ BLDF ရဲ့စစ်ဒေသ တာဝန်ရှိသူတစ်ဦးက The Nation Voice ကိုပြောပါတယ်။
ဇူလိုင်လ ၃ရက် နေ့လယ် ၂နာရီ ၄၅မိနစ်ဝန်းကျင်မှာ ချောင်းမြို့မြပုလဲဂိတ်ကနေ ခင်မွန်ရွာဘက်ကို လက်နက်ငယ်တွေနဲ့ပစ်ခတ်ပြီး မုံရွာ -မန္တလေးလမ်းပိုင်းတစ်နေရာမှာ ကင်းပုန်းယူဖို့ ထွက်လာတဲ့ အာဏာသိမ်းစစ်တပ်ကို မိုင်းဆွဲတိုက်ခိုက်ခဲ့တာလို့သိရပါတယ်။
“ကင်းပုန်းယူဖို့ထွက်လာတဲ့ စခ ၁၅ကောင်ခန့်ကို ကျွန်တော်တို့ ဗမာလွတ်မြောက်ရေးဒီမိုကရက်တစ်တပ်ဦး(BLDF)ရဲ့ စစ်ဒေသ(၃) သလ္လာဝတီစစ်ကြောင်း-အညာမိုင်းတပ်ခွဲမှ အသင့်စောင့်ကြိုမိုင်းဆွဲတိုက်ခိုက်ခဲ့တာပါခင်ဗျ” လို့ BLDF ရဲ့စစ်ဒေသ တာဝန်ရှိသူတစ်ဦးက ပြောပါတယ်။
အဲဒီတိုက်ခိုက်မှုအတွင်းအာဏာသိမ်းစစ်တပ်ရဲ့ တပ်သားနှစ်ဦးသေဆုံးတာကို အတည်ပြုနိုင်ခဲ့ပြီး ကျန်တဲ့ ထိခိုက်မှုကိုတော့ သေချာစုံစမ်းနေဆဲလို့ ဆိုပါတယ်။
အဆိုပါတိုက်ခိုက်မှုမှာ တော်လှန်ရေးရဲဘော်တွေ အထိခိုက်မရှိပြန်လည်ဆုတ်ခွာနိုင်ခဲ့တယ်လို့ BLDF ရဲ့စစ်ဒေသ တာဝန်ရှိသူတစ်ဦးက The Nation Voice ကိုပြောပါတယ်။
