ဇူလိုင် ၃၁
အာဏာသိမ်းစစ်ခေါင်းဆောင် မင်းအောင်လှိုင်က အစိုးရအဖွဲ့သစ်တစ်ခုကို ဖွဲ့စည်းလိုက်ပြီး အဲဒီအစိုးရအဖွဲ့ထဲမှာ ဗိုလ်ချုပ်ကြီးညိုစောကို ဝန်ကြီးချုပ်အဖြစ် ခန့်အပ်လိုက်ပါတယ်။
ဒီနေ့ကျင်းပတဲ့ ကာ/လုံ အစည်းအဝေးမှာ ဖွဲ့စည်းပုံအခြေခံဥပဒေ ပုဒ်မ ၄၂၇၊ ပုဒ်မခွဲ (ခ)အရ ပြည်ထောင်စုအစိုးရအဖွဲ့သစ်တစ်ခု ဖွဲ့စည်းလိုက်တယ်လို့သိရပါတယ်။
အခုဖွဲ့စည်းလိုက်တဲ့ ပြည်ထောင်စုအစိုးရအဖွဲ့သစ်မှာ ဗိုလ်ချုပ်ကြီးညိုစောကို ဝန်ကြီးချုပ်အဖြစ်ခန့်အပ်ပြီး လူအယောက်သုံးဆယ်နဲ့ ဖွဲ့စည်းခဲ့တာပါ။
အဲဒီအစည်းအဝေးမှာပဲ နိုင်ငံတော်အာဏာလွှဲအပ်ဆောင်ရွက်စေခဲ့တဲ့ အမိန့်ကို ပယ်ဖျက်ပြီး နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ကို ဖွဲ့စည်းခဲ့ပါတယ်။
အဲဒီကော်မရှင်ရဲ့ ဥက္ကဌအဖြစ် တပ်မတော်ကာကွယ်ရေးဦးစီးချုပ်၊ ယာယီသမ္မတ ဗိုလ်ချုပ်မှူးကြီးမင်းအောင်လှိုင်က တာဝန်ယူခဲ့ပြီး ကော်မရှင်ကို လူဆယ်ဦးနဲ့ ဖွဲ့စည်းခဲ့ပါတယ်။
ဇူလိုင်လ ၃၀ရက်နေ့က နေပြည်တော်မှာ အာဏာသိမ်းစစ်တပ်က နိုင်ငံတော်စီမံအုပ်ချုပ်ရေးကောင်စီအဖွဲ့ဝင်တွေကို ဂုဏ်ပြုတွေ့ဆုံပွဲအခမ်းနားကျင်းပပြီး လာမယ့်ဒီဇင်ဘာလမှာ ရွေးကောက်ပွဲလုပ်မယ်လို့ ပြောခဲ့ပါသေးတယ်။
ငြိမ်း ရေးသားသည်။
