ဂျပန် လယ်ယာစိုက်ပျိုးရေးဝန်ကြီး Eto Taku ပြီးခဲ့တဲ့ တနင်္ဂနွေနေ့က ပြောတဲ့ မိန့်ခွန်းတစ်ခုအတွင်း သူဟာ ဆန်ကို ဘယ်တုန်းကမှ မဝယ်စားခဲ့ရဘူးလို့ဆိုပြီး သူ့ကို ထောက်ခံသူတွေပေးတဲ့ ဆန်တွေနဲ့တင် ပြည့်စုံနေလို့ ပြန်ရောင်းလို့တောင် ရတယ်ဆိုတဲ့ မှတ်ချက်တစ်ခုကို ပေးခဲ့ပါတယ်။အခုတော့ အဲဒီမှတ်ချက်နဲ့ ပတ်သက်လို့ တာဝန်ယူတဲ့အနေနဲ့ ဝန်ကြီးချုပ်ထံ နုတ်ထွက်စာ တင်လိုက်ပြီဖြစ်ကြောင်း ဒီကနေ့ မေလ ၂၁ ရက်နေ့မှာ အသိပေးလိုက်တယ်လို့ ဂျပန်သတင်းဌာနတွေက ဖော်ပြပါတယ်။
လက်ရှိမှာ ဂျပန်နိုင်ငံဟာ ဆန်စျေးနှုန်း မြင့်တက်နေမှုတွေနဲ့ ရင်ဆိုင်နေရပြီး စားသုံးသူတွေနဲ့ စပါးစိုက်ပျိုး ထုတ်လုပ်သူတွေ အကြားမှာ အခက်အခဲမျိုးစုံ ကြုံတွေ့နေရချိန် လယ်ယာစိုက်ပျိုးရေးဝန်ကြီးတစ်ဦးရဲ့ အခုလို ပြောကြားချက်ကြောင့် ဝေဖန်မှုတွေ များစွာ ဖြစ်ပေါ်ခဲ့ရပါတယ်။
အတိုက်အခံပါတီတွေကတော့ လယ်ယာစိုက်ပျိုးရေးဝန်ကြီးကို ပြစ်တင်ရှုတ်ချခဲ့ပြီး ရာထူးကနေ အမြန်ဆုံး နုတ်ထွက်ဖို့ တောင်းဆိုထားပါတယ်။
ဒီလို အငြင်းပွားဖွယ်မှတ်ချက်မျိုးပေးခဲ့တဲ့ လယ်ယာစိုက်ပျိုးရေးဝန်ကြီးအတွက်လည်း ဂျပန်ဝန်ကြီးချုပ် Ishiba Shigeru ကိုယ်တိုင် တောင်းပန်လိုက်ရတဲ့ အခြေအနေလည်း ဖြစ်ခဲ့ပါတယ်။ဝန်ကြီးချုပ်အနေနဲ့ လယ်ယာစိုက်ပျိုးရေး ဝန်ကြီးကို မူလရာထူးအတိုင်း ဆက်ရှိချင်တဲ့ ဆန္ဒရှိပြီး ဆန်စျေးမြင့်တက်နေမှုကို တည်ငြိမ်အောင်ပြန်လုပ်ဖို့ အရိပ်အမြွက် ပြောဆိုခဲ့ပါတယ်။ဝန်ကြီးချုပ်တစ်ဦးအနေနဲ့ သူ့ခန့်အပ်ထားတဲ့ ဝန်ကြီးတစ်ဦးက အခုလို ပြည်သူကို ပြောဆိုခဲ့လို့ တာဝန်အရှိဆုံးလူတစ်ဦးအဖြစ်လည်း ခံစားရကြောင်း အသိပေးခဲ့ပါတယ်။
ဂျပန်လယ်ယာစိုက်ပျိုးရေးဝန်ကြီးကတော့ သူ့ရဲ့ မှတ်ချက်တွေကို ပြန်ရုပ်သိမ်းကြောင်း အသိပေးပြီး တောင်းပန်မှုတွေလည်း ပြန်လည် ပြုလုပ်ခဲ့ရပါတယ်။
သတင်း – ကျော်ကျော်
