ဇူလိုင် ၃ ၊ The Nation Voice
သတင်း – ကံ့ကော်
မြန်မာ့စီးပွားရေးဟာ အခုဘဏ္ဍာနှစ်အတွင်းမှာ ၂ ဒသမ ၅ ရာခိုင်နှုန်း ကျဆင်းနိုင်မယ်ဆိုတဲ့ ကမ္ဘာ့ဘဏ်ရဲ့ ထုတ်ပြန်ချက်ဟာ မှန်ကန်မှုမရှိဘူးလို့ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောပါတယ်။
ဇူလိုင်လ ၂ ရက်နေ့က နေပြည်တော်မှာ ကျင်းပတဲ့ နိုင်ငံတော်၏ စီးပွားရေးတိုးတက်စေရေး လုပ်ငန်း ညှိနှိုင်းအစည်းအဝေးမှာ စစ်ခေါင်းဆောင်က ပြောကြားခဲ့တာဖြစ်ပါတယ်။
ကမ္ဘာ့ဘဏ်ရဲ့ တွက်ချက်တဲ့စာရင်းမှာ အချက်အလက်မှန်ကန်မှု နဲ့ ပြည့်စုံမှုမရှိဘူး လို့လည်း ပြောဆိုထားပါတယ်။
စစ်ကိုင်းမြို့အနီး ဗဟိုပြုပြီး အင်းအားပြင်းထန်တဲ့ ငလျင်လှုပ်ခတ်မှုအပြီးမှာ စီးပွားရေးလုပ်ငန်းရှင်များ အထိနာခဲ့ရာ ငလျင်ကြောင့် မြန်မာ့စီးပွားရေး ၂ ဒသမ ၅ ရာခိုင်နှုန်း ကျဆင်းနိုင်မယ်လို့ ဇွန်လမှာ ကမ္ဘာ့ဘဏ်က ထုတ်ပြန်ခဲ့တာ ဖြစ်ပါတယ်။
မြန်မာနိုင်ငံရဲ့ GDP မှာ အမေရိကန်ဒေါ်လာ ၇၆ ဒသမ ၄ ဘီလီယံရှိကြောင်း၊ ၂၀၂၅-၂၀၂၆ ဘဏ္ဍာနှစ်မှာ အမေရိကန်ဒေါ်လာ ၈၁ ဒမသ ၆ ဘီလီယံအထိ မျှော်မှန်းထားကြောင်း အာဏာသိမ်း စစ်ခေါင်းဆောင်က ပြောကြားထားပါတယ်။
ငလျင်ကြောင့် အဆောက်အဦတွေ ပျက်စီးမှုက ဒေါ်လာ ၁၁ ဘီလျံကျော်ရှိ ပြီး အဲဒီပမာဏဟာ မြန်မာနိုင်ငံ အသားတင်ထုတ်လုပ်မှုတန်ဖိုး (ဂျီဒီပီ) ရဲ့ ၁၄ ရာခိုင်နှုန်း ရှိတယ်လို့ ကမ္ဘာ့ဘဏ်က ထုတ်ပြန်ထားပါတယ်။
မတ်လ ၂၈ ရက်နေ့က ပြင်းထန်ငလျင်ကြောင့် စစ်ကိုင်း၊ မန္တလေး၊ နေပြည်တော် တို့ ထိခိုက်မှု များခဲ့တာမှာ အသေးစား၊ အလတ်စား လုပ်ငန်းတွေအပါအဝင် လုပ်ငန်းပေါင်း လုပ်ငန်းပေါင်း ၃၀၆ ခု ပျက်စီးဆုံးရှုံးခဲ့တယ်လို့ အာဏာသိမ်းစစ်တပ် ထုတ်ပြန်ထားချက်အရသိရပါတယ်။
စစ်ကိုင်းမြို့နဲ့ မန္တလေးမြို့က လုပ်ငန်းရှင်အချို့ဟာ ငလျင်လှုပ်ခတ်မှုအပြီး သုံးလ ကြာသည်အထိ လုပ်ငန်းလည်ပတ်နိုင်ရေး ပြင်ဆင်နေဆဲ အခြေအနေမှာ ရှိနေသေးတယ်လို့ လုပ်ငန်းရှင်အချို့ထံကနေ သိရပါတယ်။
